Weblezannu 21 - Kazambale lé Sebe Sauunu 1979

Wo lomu ye Bɛnjamɛnnu zé nya

¹ Izraɛlnu bale ’nyɔɔn é kyɛn Misipa léé: Ko va mi do kpen ’ka dan é lu nɔ lɛ Bɛnjamɛn mi lɛ a na nya lo.

² Munu da Bétɛl yé wo yiri vɔ ana Bale ’lɛ. Wo dére wuo vɔ yé wo yuɛyi yoro kiɛre yé wo léé:

³ Oo, Gakelebale, Izraɛl lé Bale, mɛmalé Izraɛl vuru bɛn do ma kyɔɔ?

⁴ ’Bɛ é tu kini munu nwa bladi tutu; wo balebanna do dɔ yé wo winu kyɛ ble a ta yé wo bɔvɔ sarakanu bo.

⁵ Izraɛl munu léé: Izraɛl lé bɛnnu faa va mi kyɛn ɛ ’ka da lɛ zén lɛ ékeva Gakelebale ’lɛ loo? Naa, dé miomian ’ka da lɛ Gakelebale va Misipa lo, wo bale pa a ma é kyɛn; wo lé é kyɛn léé, wo ga dɔ a nwiin.

⁶ Izraɛl munu bli nɔla ’wo bwe Bɛnjamɛn lé we ma, yé wa fena léé, kyɔ wo bɛn do kini Izraɛl ma.

⁷ Ko dan kɛlɛ lɛ kaa yé ko lomu ye, wo lé wo ke é yuɛma tan, wo nanu nyaa? Ko Gakelebale ’nyɔɔn léé, ko ’ka dan ko lunu nɔ lɛ wo lɛ wo nanu nya lo.

⁸ Amalé wa fe kɔɔn léé, Izraɛl bɛnnu va mi do ’ka da lɛ Gakelebale va Misipa loo? Yé bé ye, mi do kpen ’ka si lɛ Jabɛs, Galaad tɛrɛ la, yé é da sɔkɔndɔna, munu lé zén‐ékevana lo.

⁹ Wo munu nɔnɔ yé Jabɛs lé ke Galaad tɛrɛ la, wolé mi do kpen ’ka ye lɛ ana lo.

¹⁰ Yé zén‐ékevamunu sunyanu baa suiɛdo pa zia wo ma, yé wo wo béli dɔ léé: ’Ka go, Jabɛs lé ke Galaad tɛrɛ la, ’ka ana munu gyɛ gwɔun nya, lomu valé nénu nya wo va.

¹¹ Ka kɛlɛ ’ko zo: Gɔnénu faa valé lomu faa lé wo gɔné dɔɔ gɔné nya, ’ka wo gyɛ.

¹² Jabɛs lé ke Galaad tɛrɛ la, ana munu méléna wo blɛnnu ye wuru fié, ’té wo ’ka tan gɔné dɔɔ lɛ lo, yé wo da wo nya sɔkɔndɔna, Silo, Kanaan tɛrɛ la.

¹³ Zén‐ékeva munu wo munu nwunvɔ we fele we gi Bɛnjamɛnnu lé wo ke Rimɔn gɔlɛ ma, wo lɛ, é valé vole drɔɔ we fe lɛ wo lɛ.

¹⁴ Bléyi ’ko va Bɛnjamɛn munu da é ziin, yé Jabɛs lé ke Galaad tɛrɛ la, ana lomu lé wo vo é yuɛma, wo wo nɔ wo lɛ. Naa, wo ’ka sɔ lɛ wo ma lo.

¹⁵ Yé munu bli nɔla Bɛnjamɛn lé we ma; Gakelebale Izraɛl bɛnnu fén so a ma, azama.

¹⁶ Zén‐ékeva munu va mi segelenu léé: Ko dan kɛlɛ lɛ kaa yé ko lomu ye a pɔnénu nanu nyaa? Wo Bɛnjamɛnnu nanu gyɛ, azama.

¹⁷ Yé wo léé: Bɛnjamɛn munu lé wo si we gi, é a lé wo ’wolé zarafɛ ye, té ’wo bɛn do fwi Izraɛl va lo we gi.

¹⁸ Naa, Izraɛl munu bale ’nyɔɔn léé: Mi lé é le nɔ Bɛnjamɛn mi do lɛ, ’wo bale pa a ma ma, amalé ko ’ka bɔa ko lunu nɔle lɛ wo lɛ wo nanu nya lo.

¹⁹ Yé wo léé: Woo fɛti kɛla Gakelebale lɛ Silo lɛɛ do do ma Bétɛl lé yirinwana bɛbolazia, zi lé é si Bétɛl yé é go Sisɛm, é a ’bɛ lé yirinwanazia, yé é a Lébona lé yirinwana bɛyilazia.

²⁰ A zuo wo lé Bɛnjamɛn munu lɛ léma: ’Ka go, ’ka yɔɔ dɔrɔyilinu kwɛɛ gi.

²¹ ’Ka nagini, yé ’ka ye, dé Silo blɛnnu bɔra nɛnɛ bona, ’ka bɔra dɔrɔyilinu kwɛɛ gi, ka faa do do ’é Silo blɛn do do kun ka nanu nya, yé ’ka go wo nya Bɛnjamɛn tɛrɛ la.

²² Dé wo tinu valé wo bwenu da ko va ka tɔ fele we gi, ko dan fe lɛ wo lɛ léé: ’Ka wo nɔ ko lɛ ma, ko ’ka wo faa zé le ye lɛ guli danna lo, azama. Kaan ka wo nɔ wo lɛ lo; naa, dé é a lé ka ɛ wo nɔ wo lɛ, ’té a we a ka nwiin.

²³ Bɛnjamɛnnu a kɛlɛ ’bɛ zo; wo lomu si wo nanu nya wo ’léé yɛrama nɛnɛbozannu lé wo wo kun, wo méléna, ’bɛ zuo wo nɔla yé wo da wozé tɛrɛ la. Wo flanu pa wo ’bin la yé wo nyana wo ta.

²⁴ ’Bɛ bléyi va Izraɛl lé nénu faa go ’wo bɛn valé wo gɔnɔ gi do do, wo nɔla ’wozé tɛrɛ la do do.

²⁵ ’Bɛ bléyi va, ’té minwiinzan ’ka Izraɛl tɛrɛ la lo. Dé wean dɔ mi do do gi wezin nya, yee lé éé a kɛla.