Weblezannu 20 - Kazambale lé Sebe Sauunu 1979

Izraɛlnu guli dan Bɛnjamɛnnu va

¹ Izraɛl lé nénu faa bɔra, é sia Dan fɔɔ Bɛɛ‐Sééba, é valé Galaad tɛrɛ la, yé wo zén ékeva bélé mi do kpen zo Gakelebale ’lɛ, Misipa.

² Munu faa nwiinmunu, Izraɛl bɛnnu faa nwiinmunu, wo bɔra a gi Bale lé munu zénle ékeva méléna, mi baa wuru do nya, ’té gwɔun a wo lee.

³ Yé Bɛnjamɛn kulunu a ’ma léé, Izraɛl lé nénu go loru Misipa. Izraɛl lé nénu léé: ’Ka we fe, wo wenyané ’ko kɛlɛ kaa?

⁴ Le lé wa gyɛ bɛ, a zana Lévi mi léma: Maa valé an na bɔ Gibéa, Bɛnjamɛn tɛrɛ la, yiile we gi.

⁵ Gibéa munu nwa an ma, yé kɔn lé maa ke a gi, wa zi lɛ sɔɔ é béli. Wa a va léé, ’wo an gya, yé wo glawe kɛlɛ an na va yé é ga.

⁶ Maa an na si yé maa a wi kini ékema, yé maa wo pa zia Izraɛl lé tɛrɛ faa la; wo wenyané kɛlɛ yé wo pɛnpɛnné gyɛ Izraɛl, azama.

⁷ Ka faa lé ka ke ’ko, Izraɛl lé nénu, ’ka ka va we ble yé ka we ’ko yuɛ gi bo ’ko.

⁸ Munu faa nwa bélé mi do zo, yé wo léé: Ko va mi do kpen ’ka dan go lɛ élé sɔkɔn ’léé lo, yé mi do kpen ’ka dan nɔla lɛ élé kɔn gi lo.

⁹ Sin, we lé ko dan a kɛlɛ lɛ Gibéa lɛ, yee lo: ko dan munu guli lɛ, ’ko go wo va.

¹⁰ Ko dan munu si lɛ Izraɛl bɛn faa gi, mi yɔ soru soru va mi vu vu, mi wuru soru soru va mi yɔ soru soru, mi baa soru soru va, mi wuru soru soru; wo dan go lɛ fɛblele si lɛ munu zé nya, léé, dé wo da wo pa gi tɔɔn, ko dan we kɛlɛ lɛ Bɛnjamɛn lé Gibéa lɛ, pɛnpɛnné faa lé wa gyɛ Izraɛl, a yɛrama.

¹¹ ’Bɛ zo lé Izraɛl lé munu faa zén ékeva fla ’ko ma bélé mi do zo.

¹² Izraɛlnu munu nwunvɔ Bɛnjamɛn gɔnɔlamunu faa lɛ, a fele we gi léé: Mɛ zoɛ wenyané lé wa kɛlɛ ka vaa?

¹³ Munu vɔnle lé wo ke Gibéa, ’ka wo pa ko lee sin, yé ko wo gyɛ, yé ko wenaané si Izraɛl tɛrɛ la. Naa, Bɛnjamɛn munu ’ka a va léé, ’wo tɔné dɔ ’wo bwenu, Izraɛlnu dére lɛ lo.

¹⁴ Bɛnjamɛn munu si ’wolé fla nuu, yé wo zén ékeva Gibéa, guli danle Izraɛl lé nénu va we gi.

¹⁵ Bɛnjamɛn munu lé wo wo nɔnɔ yi ’ko nya, wa gɔnénu baa vu ta yaa, ’té wa gwɔun dunzannu nya; ’té wo ’ka Gibéa munu vabole wuru yaa yɔ soru nɔnɔ lɛ wo va lo.

¹⁶ Munu ’ko méléna gɔné vabole wuru yaa yɔ soru ana, ’té wa bɛbodɔmunu nya; munu faa ’ko wo bɔaléé, wo paalu vuli yé wo nwin gɔ do gyɛ a nya, yé wo ’ka a buuan lo.

¹⁷ Wo Izraɛlmunu nɔnɔ é ziin, ’té Bɛnjamɛn munu ’ka wo va lo, yé wa mi baa wuru do, ’té wa gwɔun dunzannu nya, ’té wo faa a gulidanmunu nya.

¹⁸ Yé Izraɛlnu nwa yé wo go loru zia Bétɛl yé wo we zuo laa Bale lee léé: Ko va mi kyɛn ɛ dan go lɛ é vinin gulidanle we gi Bɛnjamɛn kulunu vaa? Gakelebale a zi pa léé: Juda ɛ go é vinin.

¹⁹ Bladi Izraɛlnu go yé wo sɔkɔnnu dɔ Gibéa sɔnɔ.

²⁰ Yé Izraɛl munu bié wo ’lɛ mi, gulidanle we gi Bɛnjamɛn munu va, yé wo dɔ gulidanle yɛrama wo lɛ ma lɛ ma Gibéa ’lɛ.

²¹ Bɛnjamɛnnu si Gibéa yé ’bɛ yi nya wo Izraɛl munu baa vu ta do dia tɛrɛ la.

²² Izraɛl gɔnénu bli ta dɔ plɛplɛ yé wo dɔ gulidanle yɛrama wo lɛ ma lɛ ma é ziin, fɛana lé wo dɔ yi vinin nya, ana.

²³ Yé Izraɛl lé nénu nwa yé wo yiri vɔ wuvɔle nya Gakelebale lɛ; wo we laa Gakelebale lee léé: É a lé an bié an ’lɛ é ziin mi, gulidanle we gi an bwe Bɛnjamɛn vaa? Gakelebale a zi pa léé: ’Ka nwa a ma.

²⁴ A yi fiézan nya Izraɛlmunu nwa Bɛnjamɛn munu ma.

²⁵ A yi duo nya Bɛnjamɛn munu si Gibéa yé wo da kee lɛ wo nya yé wo Izraɛl mi baa sɔraziɛn dia tɛrɛ la é ziin, ’té wa gwɔunzannu nya.

²⁶ Izraɛl munu faa nwa yé wo go Bétɛl; wo wuvɔ yé wo vo mi Gakelebale ’lɛ; wo yiri vɔ lɔrɔsɔnle nya, yé wo Gakelebale ban, wi lé wa kyɛ blé, a nya, yé wo bɔvɔ sarakanu bo a lɛ.

^27-28 ’Bɛ bléyi va Bale lé gipawe pagikɛsu a Bétɛl, ’té Arɔn be Éléazaa be Finé ɛ ke Balebanzan nya, yé Izraɛl lé nénu we laa Gakelebale lee léé: É a lé an guli dan é ziin an bwe Bɛnjamɛn va, taa, té maa go loo? Gakelebale a zi pa léé: ’Ka nwa, naa, tɛlɛ maa dan wo pa lɛ ka lee.

²⁹ Yé Izraɛl munu yɔɔ Gibéa nwun zi.

³⁰ Izraɛl lé nénu nwa Bɛnjamɛn munu ma a yi yaazan nya, yé wo dɔ gulidanle yɛrama wo lɛ ma lɛ ma Gibéa ’lɛ, bélé é vinin zo.

³¹ Bɛnjamɛn munu bɔra yé wo kee wo nya, yé Izraɛl si wo nya fla ma baa. Bɛnjamɛnnu kun munu gyɛle ma bélé é vinin zo yé munu lé wo wo gyɛ, wo mi yɔ do wɔlɛ vu bɔa. Wo wo gyɛ, zi lé é go loru Bétɛl zia, é valé zi lé é féi kini yé é go Gibéa, wo ta.

³² Bɛnjamɛnnu a fena léé: Ka yé loo? Ka wo gyɛle pélisia bélé é vinin zo. ’Té Izraɛl lé nénu a fena léé: Kaa fwila zinu ta, yé ka wo si fla ma baa.

³³ Izraɛl munu faa si ’wo dɔna yé wo dɔ é ziin Baal‐Tamaa wo lɛ ma lɛ ma, yé Izraɛl munu lé ke é yɔɔle Gibéa bwi la, wo si wo yɔɔna.

³⁴ Munu baa soru lé wo wo vabo Izraɛl faa va, wo bɔ Gibéa ’lɛ. Guli danle kɛlɛ tɔntɔn, yé zamaga lé Bɛnjamɛn munu a gona a wo lɛ bɛ, wo ’ka a gi dɔɔa lo.

³⁵ Gakelebale Bɛnjamɛn gyɛ Izraɛl ’lɛ yé Izraɛl munu Bɛnjamɛn munu gyɛ mi baa vu ta fié, mi wuru soru yɔ soru yi ’ko nya, ’té wo faa a gwɔun dunzannu nya.

Guliwuo vo Izraɛlnu lɛ

³⁶ Bɛnjamɛn munu Izraɛl munu ye guligyɛzannu nya, naa, wo dɔna nɔ Bɛnjamɛn lɛ, ’té wo bli a mi yɔɔlenu lé wo wo dɔ Gibéa sɔnɔ, wo lɛ.

³⁷ Tɔɔn, yɔɔmunu ’wii Gibéa ta, wo go wo ’lɛ yé wo flamunu faa gyɛ gwɔun nya.

³⁸ Wo tɔmase do fe ékeva léé, é a lé yɔɔmunu wo kyɛgoi zuu nwa fla.

³⁹ ’Yelele, Izraɛl munu nɔla wo ta guli nya. Bɛnjamɛn munu wolé munu gyɛ kɔɔn, dé mi yɔ do wɔlɛ vu léé, ’té wa fé léé: Wezen lé, kaa wo gyɛle pélisia bélé guli vinin zo.

⁴⁰ Tɔɔn, kyɛgoi zuu kun nwale ma fla. Bɛnjamɛnnu wo zuo nagini, yé bé ye, fla faa kyɛ ɛ blena, ’té a nɛnɛnu éé nwaan la gi.

⁴¹ Izraɛl nɔla wo ta yé di kini Bɛnjamɛn munu gi, guruzanaagiwe lé é dan bɔ lɛ wo ma, a we ma.

⁴² Wo nwun zi dɔ Izraɛl munu ta yé wo vlan buru bwii zia. Naa, Izraɛl lé sunyanu a wo gane gi yé munu lé wo si flanu ta wo wo gyɛ fɛ duona.

⁴³ Wo Bɛnjamɛn munu zi lɛ sɔɔ, wo wo zuo bin, dé wo léé, ’wo flin tɔɔn, ’té wa wo gyɛna, fɔɔ Gibéa ’lɛ yirinwanazia.

⁴⁴ Bɛnjamɛn munu dia mi baa sɔraziɛn, ’té wo faa a nyanazannu nya.

⁴⁵ Wonu lé wo nwun zi dɔ yé wo vɔ bwii Rimɔn gɔlɛ ma, Izraɛl munu wo gyɛ zinu ta mi baa fié mi wuru soru; wo wo zuo bin fɔɔ Gidéom yé wo wo gyɛ mi baa do.

⁴⁶ Bɛnjamɛn munu faa lé wo zamaga wo yi ’ko la, wa mi baa vu ta fié mi wuru soru, gwɔun dunzannu nya, nyanazannu nya.

⁴⁷ Mi wuru yaa lé wo nwun zi dɔ guli ta yé wo vɔ bwi gi Rimɔn gɔlɛ ma, wo nyana ana moné ziɛn wuo.

⁴⁸ Izraɛl munu da Bɛnjamɛn va yé wo wo gyɛ gwɔun nya, flamunu valé winu nya, é valé fɛ faa lé wa ye, a nya. Fla faa lé ke ana wo wo kyɛ ble.