Weblezannu 2 - Kazambale lé Sebe Sauunu 1979

Gakelebale lé lanje do bɔra Bokim

¹ Gakelebale lé lanje do si Gilgal yé é go loru zia Bokim yé é léma: Maa ka si Éjipiti tɛrɛ la yé maa da ka nya, tɛrɛ lé anbo ’nyɔɔn ka tranu lɛ léé, maa dan a nɔ lɛ wo lɛ, a ta. Maa léé, maa ’ka dan anlé gipawe sɛrɛ lɛ ka va monomono lo;

² yé ’kaa, té ka gi pa do tɛrɛ ’ko la munu va lo, ka dan wolé yobannu zana lɛ. Naa, ka ’ka an dére lɛdɔ lɛ a ma lo. Mɛmalé ka kɛlɛ ’bɛ zoo?

³ Amalé maa lé é ziin léé, maa ’ka dan wo bin lɛ ka ’lɛ lo. Naa, wo dan vo lɛ ka punma yé wolé balenu é dan kɛlɛ lɛ ka kunsan nya.

⁴ Dé Gakelebale lé lanje dére ’konu fe Izraɛl lé munu faa lɛ, munu wo dére nwa yé wo wuvɔ.

⁵ Wo fɛna ’ko tɔ pa Bokim, ’bɛ gi léé, wuvɔzannu, yé wo Gakelebale ban ana.

Jozué gale

⁶ Jozué munu pa zia é ziin yé Izraɛl lé nénu go do do wolé zaratɛrɛ va, wolé tɛrɛ sile we ma.

⁷ Munu Gakelebale bɔ Jozué zé bléyi va, yé mi segelenu lé wo mɔnle mini Jozué ta yé we blɛnnu faa lé Gakelebale a kɛlɛ Izraɛl lé we ma, wa ye, munu Gakelebale bɔ ’bɛnu zé bléyi va é ziin.

⁸ Gakelebale wuozan, Nɛn be Jozué ga, ’té a lɛɛ a yɔ soru wɔlɛ vu.

⁹ Wa pa Timinat‐Érɛs, Éfraim gɔ lé ke Gaas gɔ yirinwana bɛbolazia, a ma, tɛrɛ lé wa nɔ a lɛ azé nya, ana.

Weblemunu

¹⁰ Mi kulu ’ko faa go wo tinu va, yé mi kulu bɛ nwa a zuo; ’bɛnu ’ka Gakelebale dɔɔ lɛ lo, yé we lé é a kɛlɛ Izraɛl lé we ma, wo ’ka ’bɛ gi dɔɔa lo.

¹¹ We lé é ’ka sɔ lɛ Gakelebale lɛ lo, Izraɛl lé nénu a kɛlɛ, yé wo Baalnu bɔ.

¹² Wo si Gakelebale, wo tinu zé Bale lé é wo si Éjipiti tɛrɛ la, a zuo, yé wo go bale bɛnu zuo, munu lé wo ke é nyanale wo zi, wozé balenu zuo; wo ’wuo tua ’bɛnu lɛ, yé wo Gakelebale bli nwa.

¹³ Wo si Gakelebale zuo, yé wo Baal valé Asataténu bɔ.

¹⁴ Gakelebale bli fli Izraɛl ma. É wo pa gulizarafɛ sizannu lee, yé ’bɛnu gulizarafɛnu si wo lee. É wo dan wo nyanézannu lé wo ke wo zi, wo lee, yé wo ’ka bɔa lɛ yé wo dɔ wo nyanézannu ’lɛ é dɛrɛ lo.

¹⁵ Fɛ faa lé wo go ana, Gakelebale bɛ a wo ma, wenyané kɛlɛle wo lɛ we ma, fɛan zo lé Gakelebale a fe, fɛan zo lé Gakelebale ébo ’nyɔɔn wo lɛ, a zo, ’té woo nyané blɛn blé.

¹⁶ Naa, Gakelebale weblemunu nwa wo sile ’wiiwotazannu lee we ma.

¹⁷ Yé wo ’ka tɔné dɔ lɛ wolé weblezannu lɛ lo, naa, wobo nɔ bale bɛnu bɔle lɛ bélé gɔnégini le zo, yé wo ’wuo tua wo lɛ. Zi lé wo tinu tawo a ta, wo si a ta é kele, yé wo ’ka Gakelebale lé bélidɔwenu lɛdɔ lɛ a ma, fɛan zo lé ’bɛnu a kɛlɛ, a zo lo.

¹⁸ Dé Gakelebale weblezannu nwa, ’té Gakelebale a ’bɛ weblezan va yé é wo si wo nyanézannu lee weblezan yuɛma bléyi faa va; naa, Gakelebale nyanai é zén wo ta wolé dunnu lé wa wo klepawotazannu valé nyanépawotazannu lee, alé we ma.

¹⁹ Naa, dé weblezan ga, ’té wolé we sɛrɛ é ziin é mini wo tinu zé la, ’té woo tawoo bale bɛnu zuo, ’té woo wo bɔa, ’té woo wo ’wuo tuaan wo lɛ, yé wo yara pa ’wo kɛlɛwenu valé ’wo tɔnéiyuyu kɛlɛle ta tegele.

²⁰ Yé Gakelebale bli fli Izraɛl ma, yé é léma: Bɛn ’ko, gipawe lé maa a kɛlɛ wo tranu va, wa sɛrɛ yé wo ’ka an dére lɛdɔ lɛ a ma lo, bɛwemalé bɛn bɛnu lé Jozué wo vo yé é ga,

²¹ an ’ka dan wo do kpen bin lɛ wo ’lɛ é ziin lo.

²² ’Ko zo lé maa dan Izraɛl gi dan lɛ wo nya, dé wo dan yuɛ pa lɛ wobozen ta tawole Gakelebale lé zi ta we ma, fɛan zo lé wo tranu a kɛlɛ, a zo, taa, dé wo ’ka dan a kɛlɛ lɛ loo? yé maa ye.

²³ Bɛn ’konu lé Gakelebale ’ka wo pa lɛ Jozué lee lo, é wo vo, yé é ’ka wo bin lɛ é kele lo.