Weblezannu 19 - Kazambale lé Sebe Sauunu 1979

Wo zɔwɛ gyɛ Lévimi do na ta

¹ ’Bɛ bléyi va ’té minwiinzan ’ka Izraɛl tɛrɛ la lo, Lévi mi do lé éé nyanaan Éfraim gɔ glɛ mun ma, é bwɛ ble le do va Bɛtléɛm, Juda tɛrɛ la.

² A bwɛ gɔné gini yé é si a va yé é go é ti lé kɔn ’léé Bɛtléɛm, Juda tɛrɛ la; ana lé é vo moné ziɛn.

³ A zana nwa yé é go a zuo, a tɔrɔpaale valé dale a nya é ziin we gi. A wuozan valé sokofale fié a a va. Lezan a wɔra é ti lé kɔn gi; le boroné ti a ye aan wo, é a si gi nanale nya.

⁴ A voli, a na ti, a bɛn si yi yaa élé kɔn gi. Wo fɛ ble yé wo fɛ mini yé wo yii ’bɛna.

⁵ A yi ziɛnzan nya wo nwa é bladi tutu yé é dɔ Lévi mi gi léé, ’é go. Naa, le boroné ti lé é lu zana lɛ léé: ’I nyana, ’i buru kuru sɛné ble i wɔlɛi dɔle i ma we gi, yé i go.

⁶ Yé wo nyana yé wo fiénu fɛ ble yé wo fɛ mini ékeva. A zuo le boroné ti lé a zana lɛ léé: ’I yii é ziin, yé i gi ’é nana.

⁷ A lu zana nwa gole we gi, naa, a na ti a tunu, amalé é yii é ziin.

⁸ A yi soruzan nya, é nwa bladi tutu gole we gi. Yé le boroné ti léé: Ilé zanté, ’i wɔlɛi dɔ i ma, ’i vo yé ’i go é nyanadi. Yé wo fiénu fɛ ble.

⁹ A lu zana nwa gole we gi é na valé é wuozan nya; naa, a na ti, le boroné ti lé a lɛ léé: Bé ye, nyanadi pa, yiri bɔ baa, amalé ’i yii; bé ye, yiri bɔ pɔrɔ la, ’i yii ’ko yé i gi ’é nana; tɛlɛ, ’ka nwa bladi tutu yé ’ka zi sia yé i go ilé sɔkɔn ’léé.

¹⁰ A lu zana ’ka a va léé, é yii lo, é nwa yé é go. Wo bɔ Jébusi lé ke Jérusalɛm nya, a yara, sokofale fié lé nyanalafɛ ke wo punu, ’té yee valé é na a wo ta.

¹¹ Wo bɔ Jébusi sɔnɔ bléyian va, ’té nyanadi pa fɔfɔ. A wuozan lé ézan lɛ léé: Kaa go Jébusinu lé fla ’ko la yé kaa yii ana.

¹² Azan a zi pa a lɛ léé: Ko ’ka dan go lɛ bɛnnu lé fla lé Izraɛl lé nénu ’ka a ta lo, ana lo. Ko dan go lɛ fɔɔ Gibéa.

¹³ É lé é ziin é wuozan lɛ léé: Kaa go, kaa bié fɛna fié ’ko va fɛdona, dé Gibéa léé, taa, dé Rama léé, yé kaa yii ana.

¹⁴ Wo vo tawona, yé bléyian va lé wo bɔ Gibéa lé ke Bɛnjamɛn zé nya, a sɔnɔ, ’té yiri vɔ.

¹⁵ Yé wo go Gibéa zia, yiile ana we gi. Lévi mi wɔra fla yé é dɔ flɛ gi. Yé mi do kpen ’ka ana yé ’bɛ é wo wɔra élé kɔn gi yiile we gi lo.

¹⁶ Yé bé ye, gɔné kwa do si nyanama pana féi, nyanadi bléyi va; gɔné ’ko si Éfraim gɔ ma yé éé nyanaan Gibéa yé fɛkona munu a Bɛnjamɛn munu nya.

¹⁷ É yara nwa yé é tawozan ye flɛ gi. Yé gɔné kwa lé a lɛ léé: I si kyɛɛn? I go kyɛɛn?

¹⁸ É a zi pa léé: Ko si Bɛtléɛm, Juda tɛrɛ la, yé ko a gona Éfraim gɔ glɛ mun ta; ana lé an si. An go Bɛtléɛm, Juda tɛrɛ la é vinin, yé sin maa a gona Gakelebale lé kɔn ’léé. Naa, mi do kpen ’ka an bɛn si lɛ lo.

¹⁹ Naa, kolé sokofalenu lé lɔɔ valé wolé fɛblele ana duowo; é ziin, maa koo, i wuole koo, gɔnézan lé ke i wuozannu va koo, kolé buru valé kolé dɔrɔ ana. Ko ’ka é vurule fɛ do kpen ma lo.

²⁰ Gɔné kwa léé: I vo drɔɔ ma. I kɔné a an nwiin ma. I ’ka dan yii lɛ flɛ gi lo.

²¹ É wo wɔra élé kɔn gi yé é fɛblele nɔ sokofalenu lɛ. Tawozannu wo gane ma foli; a zuo wo fɛ ble yé wo fɛ mini.

²² Wo gi a é nanale bléyian va, bé ye, flamunu, mi vɔnlenu, wo kɔn zi lɛ sɔɔ yé wo duoli gyɛ, yé wo lé kɔnzan, gɔné kwa, lɛ léé: Gɔnézan lé é da i va, bé bɔra ’ko, kolé a dɔɔle gɔné nya we gi.

²³ Kɔnzan bɔra wo va yé é lé wo lɛ léé: An bwenu, gba, kalé zanté, té ka wenyané kɛlɛ lo; gɔné ’ko wɔra anlé kɔn gi, amalé té ka pɛnpɛnné ’ko zoɛ gyɛ lo.

²⁴ Ka ye, an lu ana yé é ’ka tan gɔné dɔɔ lɛ lo, yé mi ’ko na ana; maa dan da lɛ wo nya ka va béera; ’ka wo sɛrɛ, dé wean sɔ ka lɛ, ’ka kɛlɛ wo lɛ. Naa, té ka pɛnpɛnné ’ko zoɛ gyɛ gɔné ’ko va lo.

²⁵ Munu ’konu ’ka a va léé, wo tɔné dɔ a lɛ lo. Yé gɔnézan é na si yé é go a nya wo lɛ béera. Yé wa dɔɔ le nya yé wo tu kini zɔwɛ gyɛle a ta nya; ’bɛ zuo wo da a nya é ziin manegɔné wele nya.

²⁶ Tu kini gunu va, le ’ko go dia lɛ gɔnézan lé a zana ke a va, alé kɔn ’léé, yé é vo ana fɔɔ tu kini.

²⁷ Bladi a zana nwa, yé é kɔn lɛ so yé é bɔra zi siale we gi. Naa, bé ye, lezan, a na, a é soile kɔn ’léé, é bɛnu nya kɔnpa la.

²⁸ É lé a lɛ léé: ’I nwa, kaa go. É ’ka a zi pa lɛ lo. Yé a zana a pla élé sokofale punu yé élé fla zi sia.

²⁹ É bɔ élé kɔn ’léé aan wo, é sɛnné si, yé é na si yé é a wi bɔi vu ta fié, yé é wo pa zia Izraɛl lé tɛrɛ faa la.

³⁰ Munu faa lé wa ye, wo léé: ’Bɛ zoɛ we ’ka tan kɛlɛ lɛ lo, yé wo ’ka tan a ye lɛ lo, é sia bléyian va lé Izraɛlnu si Éjipiti tɛrɛ la, fɔɔ kyɔ yi nya. ’Ka gi bɔrɔ we ’ko ma, ’ka we gi kuli, ’ka we fe.