Weblezannu 18 - Kazambale lé Sebe Sauunu 1979

Mika valé Dannu lé we

¹ ’Bɛ bléyi va, ’té minwiinzan ’ka Izraɛl tɛrɛ la lo; Dan bɛn a wozé tɛrɛ naginina, wo nyanale ana we gi, naa fɔɔ yi ’ko nya wo ’ka wozé tɛrɛ ye lɛ Izraɛl bɛnnu méléna lo.

² Dan kulunu wo gɔnɔla nyanazannu soru si, yé wo wo pa zia, ’wo si Soréa valé Esitaol, giéle tɛrɛ la valé a naginile we gi. Wo lé wo lɛ léé: ’Ka go, ’ka tɛrɛ nagini. Wo bɔ Éfraim gɔ ma Mika lé kɔn ’léé yé wo yi gyɛ ’bɛna.

³ Wo bɔ Mika lé kɔn sɔnɔ aan wo, wo Lévi mi boroné dére dɔɔ yé wo bié yé wo lé a lɛ léé: De ɛ da i nya ’koo? I a mɛ kɛlɛna fɛ ’konaa? Mɛ fɛ ɛ ke i lee ’koo?

⁴ É a zi pa wo lɛ léé: Mika éé we ’ko valé we ’ko kɛla an lɛ, éé an gooli paan yé maa kɛlɛ alé balebanzan nya.

⁵ Wo lé a lɛ léé: ’I we laa Bale lee, léé, dé kolé tawo giwe lɛ é dan sɔɔ lɛɛ? yé ko a gi dɔɔ.

⁶ Yé balebanzan a zi pa léé: ’Ka go drɔɔ ma; ta lé ka ke a wona, Gakelebale yuɛ a ka ta.

⁷ Gɔné soru go yé wo bɔ Lais. Wo ana munu ye, ’té wa é nyanale duaa é pla, Sidɔn munu nyanabɛ gi, ’té wa drɔɔ, ’té wo gi a é sanle wobo ma; yé mi do kpen ’ka wolé tɛrɛ la yé ’bɛ é wenyané kiiéné kɛla wo lɛ yé ’bɛ é pla wo nwiin lo; wa Sidɔn munu ma baa, yé wo ’ka goo mi bɛnu va lo, yé mi bɛnu ’ka dan wo va lo.

⁸ Wo nɔla wo bwenu va Soréa valé Esitaol yé wo bwenu lé wo lɛ léé: Ka sina nii?

⁹ Yé wa zi pa léé: Kaa go, kaa nwa wo ma; naa, ko yee tɛrɛ ye, yé bé ye, é a é zima é baba. Mɛmalé ka ’ka wé loo? ’Ka zi sia é kele, kaa go tɛrɛ si kaazé nya.

¹⁰ Dé ka wɔra ana, ka dan bɔ lɛ munu lé wo gi ke é sanle wobo ma, wo ma. Tɛrɛ a blɛɛn yé Bale a pa ko lee; é a tɛrɛ lé, tɛrɛlafɛ do kpen ’ka vuruan a ma lo, a nya.

¹¹ Dan kululazannu wuru yaa si Soréa valé Esitaol gulidanfɛnu nya wo lee.

¹² Wo go yé wo sɔkɔnnu dɔ Kiijat‐Jéarim, Juda tɛrɛ la; bɛwemalé fɛkona lé é ke Kiijat‐Jéarim zuo, wa laama Masané‐Dan fɔɔ yi ’ko nya.

¹³ Wo si bɛ yé wo go Éfraim gɔ ma, yé wo bɔ Mika lé kɔn ’léé.

¹⁴ Yé gɔné soru lé wo go Lais tɛrɛ nagini lɛ é vinin bɛ, wo lé ’wo bwenu lɛ léé: Ka gi dɔɔ léé, éfɔdi koo, térafim koo, miyili nyaale koo, miyili folile koo, wa kɔnnu ’ko gii? We lé é a lé ka kɛlɛ, ka ye sin.

¹⁵ Wo bié ana yé wo wɔra Lévi mi boroné lé kɔn gi, Mika lé kɔn gi, yé wo we a va.

¹⁶ Dan kulunu va mi wuru yaa dɔ kɔn ’léé, wolé gulidanfɛnu nya wo lee.

¹⁷ Bléyian va lé balebanzan a kɔn ’léé munu wuru yaa lé gulidanfɛnu ke wo lee, wo va, gɔné soru lé wo go tɛrɛ nagini lɛ é vinin bɛ, wo go yé wo wɔra kɔn gi; miyili nyaale koo, éfɔdi koo, térafim koo, miyili folile koo, wo wo si.

¹⁸ Wo wɔra Mika lé kɔn gi yé miyili nyaale koo, éfɔdi koo, térafim koo, miyili folile koo, wo wo si aan wo, balebanzan lé wo lɛ léé: Mɛ lé ka kɛla bɛɛ?

¹⁹ Wo lé a lɛ léé: ’I tadɔ, ’i bɛ pa i lɔlu ta, ’i da ko zuo; ’i kɛlɛ ko ti valé kolé balebanzan nya. Dé i kɛlɛ mi do lé balebanzan nya ’bɛ fila vɔ laa, taa, dé i kɛlɛ bɛn do valé Izraɛl kulu do lé balebanzan nya, ’bɛ ɛ ke é zimaa?

²⁰ Balebanzan gi nana; éfɔdi koo, térafimnu koo, miyili nyaale koo, é wo si yé é go wo zuo.

²¹ Wo zi sia é ziin, yé wolé nénu koo, wolé winu koo, wolé kɔnénu koo, wo wo dɔ zi ’lɛ.

²² Wo si Mika lé kɔn ma baa é kwakwa yé munu lé woo nyanaan Mika lé kɔn sɔnɔ wo zén ékeva yé wo Dan kulunu zuo bin.

²³ Wo Dan kulunu laa, yé ’bɛnu nɔla yé ’bɛnu lé Mika lɛ léé: Mɛ léé? Ka zénle ékeva ’ko, ’bɛ gi lé nɔɔ?

²⁴ É a zi pa léé: Anlé balenu lé maa a kɛlɛ, ka wo valé wo banzan sia yé ka go ’naan, yé ka a laa an lee léé, mɛ léé? Mɛ fɛ ɛ vo an lee?

²⁵ Dan kulunu lé a lɛ léé: Té ’wo i dére ’ma ko sɔnɔ ’ko lo; dé bliflimunu é da baa ka ta, yé bii lé we ma lé, bii valé ilé kɔngimunu kulu é ga.

²⁶ Yé Dannu zén é ziin. Mika a ye léé, wa plɛplɛ é mini é ta, yé é nɔla yé é da élé kɔn ’léé é ziin.

²⁷ ’Bɛ zo lé, fɛ lé Mika a kɛlɛ, é valé balebanzan lé ke alé kɔn gi, wo wo si, yé wo baa Lais munu ta, munu drɔɔ lé wo gi ke é sanle wobo ma, wo baa wo ta; wo wo gyɛ gwɔun nya, yé wo fla kyɛ ble.

²⁸ Mi do kpen ’ka a si lɛ wo lee lo, é a Sidɔn ma baa, yé mi bɛnu ’ka dan wo va lo, yé wo ’ka goo mi bɛnu va lo, azama; é a gɔ worona lé é soi Bɛt‐Réɔb vazia, ana. Dan kulunu fla pa a ’bin la, yé wo nyana ana;

²⁹ wa tɔ laama Dan, wo tra Dan lé wa yaa Izraɛl lɛ, a tɔ nya; naa, é vinin wo fla ’ko tɔ laama Lais.

³⁰ Wo miyili nyaale dɔ wozé nya, yé Manasé be Gɛɛsom, ’bɛ be Jonatan, yee valé é benu kɛlɛ balebanzannu nya Dan bɛn lɛ, fɔɔ yé é bɔ wo gole luu gi ma.

³¹ Miyili nyaale lé Mika a kɛlɛ, wa dɔ wozé nya, bléyi faa lé Bale lé kɔn a Silo, a bléyi faa va.