Weblezannu 17 - Kazambale lé Sebe Sauunu 1979

Mika lé miyilinu

¹ Mi do ana Éfraim gɔ ma, wa laama Mika.

² É lé é bu lɛ léé: Gɔɔlifu sikla wuru soru yɔ soru lé wa si i lee kyeen nya bɛ, ’té i yo yɔɔ a we ma an yuɛ va yé maa a ’ma bɛ, bé ye, gɔɔlifu ’ko a maa lee, maa ɛ si. Yé a bu léé: Gakelebale ’é an be drɔɔ vo ma.

³ É gɔɔlifu sikla wuru soru yɔ soru nɔ é bu lɛ; yé a bu léé: Maa gɔɔlifu ’ko pa é yɛrama Gakelebale zé nya, miyili nyaale valé miyili folile an be zé nya we gi; ’bɛ zo lé maa dan a nɔ lɛ i lɛ é ziin.

⁴ É gɔɔli nɔ é bu lɛ. A bu gɔɔlifu si sikla wuru do. É gɔɔlifu nɔ gɔɔlifufolizan lɛ, yé ’bɛ miyili do nyaa yé é miyili do foli. Yé wo wo dɔ Mika lé kɔn gi.

⁵ Bale lé kɔn do a Mika ’ko lee. É éfɔdi valé térafimnu kɛlɛ yé é be do pa é yɛrama yé ’bɛ kɛlɛ a lɛ balebanzan nya.

⁶ ’Bɛ bléyi va ’té minwiinzan ’ka Izraɛl tɛrɛ la lo. Dé wean dɔ mi do do gi wezin nya, yee lé éé a kɛla.

⁷ Juda kululazan pɛniɛ do ana Bɛtléɛm, Juda tɛrɛ la; é a Lévi mi nya yé éé nyanaan ana.

⁸ Gɔné ’ko si Bɛtléɛm, Juda tɛrɛ la, nyanana lé é sɔ a lɛ, a ginile we gi. É a gona aan wo, é bɔ Éfraim gɔ ma, Mika lé kɔn ’léé.

⁹ Mika lé a lɛ léé: I si kyɛɛn? É a zi pa a lɛ léé: Maa a Lévi mi nya, an si Bɛtléɛm, Juda tɛrɛ la, yé maa a gona fɛ lé ana sɔ an lɛ, a nagini lɛ, yé an nyana ana.

¹⁰ Mika lé a lɛ léma: ’I vo an va; ’i kɛlɛ an ti valé anlé balebanzan nya yé maa gɔɔlifu sikla vu nɔ i lɛ lɛɛ do do gi, é valé sɔ lé i mawe ke a gi koo, fɛblele koo, wo nya. Yé Lévi mi wɔra a va.

¹¹ ’Bɛ zo lé é a nyi si léé, ’é nyana mi ’ko lé ’bɛ a si bélé é be do zo, a va.

¹² Mika Lévi mi pa é yɛrama, yé pɛniɛ ’ko kɛlɛ alé balebanzan nya yé é nyana alé kɔn gi.

¹³ Yé Mika léé: Lévi mi ’ko kɛlɛ anlé balebanzan nya, amalé sin maa gi dɔɔ léé, Gakelebale é dan we zin kɛlɛ lɛ an lɛ.