Weblezannu 16 - Kazambale lé Sebe Sauunu 1979

Délila lé we

¹ Samsɔn go Gaza; é bɔrɔdɛ le do ye ana, yé é wɔra a va.

² Wo lé Gaza munu lɛ léé: Samsɔn da ’ko. Yé wa zi lɛ sɔɔ yé wo tu kini zi dɔle nya a lee flagɔrɔ ’léé. Wo vo drɔɔ é béli yé wo léé: Dé tu kini tɔɔn ko dan a gyɛ lɛ.

³ Samsɔn yia fɔɔ tu la. Dé tu la pa é nwa; yé é flagɔrɔ ’léé duoli valé é yili kun yé é wo soowɔla wo lɛtanyili nya, yé é wo pa é bɛapa ta yé é go wo nya gɔ lé ke Ébrɔn yara, a nwiin.

⁴ ’Bɛ zuo a bli bɔ lezan do ma Sorɛk gɔ worona. Wa tɔ laama Délila.

⁵ Filisiti mi segelenu go lezan va yé wo léé: ’I blaané pa a ma, yé ko a ma kunna ye, dé alé plɛplɛ blɛn éé sié kyɛɛn? yé ko a gi dɔɔ yé ko kele. Ko dan a yere lɛ a kelele we gi; yé ko faa do do é dan gɔɔlifu sikla wuru soru yɔ soru nɔ lɛ i lɛ.

⁶ Délila lé Samsɔn lɛ léé: Ilé zanté, ilé plɛplɛ blɛn éé sié kyɛn yé mɛ fɛ nya lé woo i yerean i kelele we gi, bé fe an lɛ.

⁷ Samsɔn lé a lɛ léé: Dé wo an yere bale drɔɔdrɔɔ sɔrafié lé wo ’ka tan ga lɛ lo, wo nya, maa kɛla tɔɔtɔɔ ’té maa a mi pla nya.

⁸ Filisiti mi segelenu da bale drɔɔdrɔɔ sɔrafié lé wo ’ka tan ga lɛ lo, wo nya Délila lɛ. É a yere bale ’konu nya.

⁹ ’Té munu a é yɔɔle lezan va, kɔnmi zi. Délila lé a lɛ léé: Samsɔn! Filisitinu baa i ta. Yé é balenu kini bélé dé balenɛnɛle fi do bié kyɛ ma éé kinié fɛan zo, a zo. Yé wo ’ka a plɛplɛ sina dɔɔ lɛ lo.

¹⁰ Délila lé Samsɔn lɛ léé: I gi kɛlɛ an lɛ, ’té i vié woo an lɛ. Dé wo i yerean fɛan nya, bé fe an lɛ.

¹¹ É lé a lɛ léé: Dé wo an yere bale dɛrɛnu lé wo ’ka tan we do kɛlɛ lɛ wo nya lo, wo nya, maa kɛla tɔɔtɔɔ ’té maa a mi pla nya.

¹² Délila bale dɛrɛnu si yé é Samsɔn yere wo nya. ’Bɛ zuo é lé a lɛ léé: Samsɔn, Filisitinu baa i ta! ’Té munu a é yɔɔle ana bɛ kɔnmi zi. É balenu kini é bɛnu nya bélé kununu bawɔrɔ nɛnɛle do zo.

¹³ Délila lé Samsɔn lɛ léé: I namɔn gi kɛlɛna an lɛ, ’té i vié woo an lɛ. Mɛ fɛ nya lé wo i yerean? bé fe an lɛ. É lé a lɛ léé: ’I an nwin pɔlɔ sɔrafié tan bélé sɔ zo.

¹⁴ É wo wɔra sɔ nyana gi, yé é a polu dɔ. A zuo é lé a lɛ léé: Samsɔn, Filisitinu baa i ta! Yé é vuo yé é sɔtan?-?kɔrɛ soowɔla yé é go.

¹⁵ É lé a lɛ léé: I bli ’ka an lɛ lo ’naan, yé i léé, an sɔ ’é lɛɛ? A gɔnɔ yaa lo i gi kɛlɛ an lɛ yé i ’ka ilé plɛplɛ blɛn sina fe lɛ an lɛ lo.

¹⁶ Yi faa do do ma éé kle paan a ta, ’té éé a wɔlɛgi nyaan a ma, amalé é bli si é gale lɛ,

¹⁷ yé é giwe faa fe a lɛ yé é léé: Wo an pa é yɛrama Bale zé nya an yaabléyi va, amalé wo ’ka tan sɛnné vinin dɔ lɛ an nwin ma lo. Dé wo an nwin puiɛ, anlé plɛplɛ éé sié an va, yé maa kɛlɛ tɔɔtɔɔ yé maa kɛlɛ bélé mi pɔnénu zo.

¹⁸ Délila a ye aan wo léé, é giwe fe ’é lɛ, é mi pa zia Filisitinu mi segelenu laana, a fele we gi wo lɛ léé: ’Ka da sin, é bli giwe faa fe an lɛ. Yé Filisitinu da a va, yé wo da gɔɔli nya wo lee.

¹⁹ É a yia é boro la. É mi do laa yé ’bɛ Samsɔn nwin pɔlɔ sɔrafié puiɛ yé ’bɛ zo lé wa kelele péli sia. Alé plɛplɛ si a ta.

²⁰ Yé é léé: Samsɔn, Filisitinu baa i ta! Yé é vuo yé é léé: Maa dan bɔra lɛ bélé é vinin zo, yé maa dan so lɛ wo lee. É ’ka a gi dɔɔ lɛ léé, Gakelebale si é va lo.

²¹ Filisitinu a kun yé wa yuɛwɔlɛ si a gi; wo go a nya Gaza yé wa yere zénégɔgɔbale nya. Éé fɛ zɔn‐o bokɔn gi.

Samsɔn gale

²² Naa, a nwin yɛ bɔle sia wolé a nwin puiɛle zuo.

²³ Yé Filisiti mi segelenu zén ékeva wolé bale Dagɔn banle blɛn we gi, é valé zana gyɛle we gi. ’Té wa fé léé: Kolé bale é ko nyanézan Samsɔn pa ko lee.

²⁴ Munu Samsɔn ye aan wo, wo ’wolé bale bɔ a fele nya léé: Ko nyanézan lé é kolé tɛrɛ sɛrɛ yé é kolé mi kiɛre gyɛ, kolé bale a pa ko lee.

²⁵ Wo gi nanale zi wo léé, ’wo Samsɔn laa léé, ’é zana gyɛ ’wo lɛ. Wo Samsɔn si bokɔn gi yé é zana gyɛ wo lɛ. Wa dɔ kɔnwɛyili méléna.

²⁶ Samsɔn lé pɛniɛ lé ’bɛ kun a bɛ ma, a lɛ léé: ’I daan an ma léé, an mane kɔnwɛyilinu lé kɔn ke wo ta, wo ma, yé maa tɛn wo ma.

²⁷ Gɔnénu valé lomu fan kɔn nya; Filisiti mi segelenu faa ana bɛ, yé gɔnénu valé lomu lé ke kɔn nwiin, ’té woo Samsɔn lé zanagyɛna ginian, wo mi baa do mi wuru soru bɔa.

²⁸ Yé Samsɔn Gakelebale laa yé é léé: Miza, Gakelebale! Ilé zanté, an sele ’é dɔ i gi ma! Oo Bale, ’i plɛplɛ nɔ an lɛ gɔnɔ do kpen ’ko nya, yé an yuɛ fiénu lɛgi pa Filisitinu ma bléyi do nya.

²⁹ Yé kɔnwɛyili fié lé é ke kɔn méléna, ’té kɔn ke wo ta bɛ, é bɛ vɔ wo zi yé é tɛn wo gi; a do a a bɛyila yé a do a a bɛbola.

³⁰ Samsɔn léé: Ko gaan Filisitinu nya ékeva! É a gana plɛplɛ yé kɔn dia mi segelenu valé munu faa lé ke ana, wo ta. Munu lé Samsɔn wo gyɛ é gayi nya wo kiɛre mini wonu lé é wo gyɛ é yuɛma bléyi va, wo ta.

³¹ A bwenu valé a ti lé kɔngimunu faa go tɛrɛ zia yé wa si yé wo goan. Wo go loru é ziin aan wo, wa pa Soréa valé Esitaol méléna, a ti Manoas lé mipana. É kɛlɛ Izraɛl ta weblezan nya lɛɛ yɔ do wuo.