Weblezannu 15 - Kazambale lé Sebe Sauunu 1979

Samsɔn Filisitinu gyɛ

¹ ’Bɛ zuo namɔn sɛ, ’sagyɛbléyi va, Samsɔn go we lɛ é na va, yé é go boligɔnéné do nya a lɛ. É léé: Maa a a va léé, an go an na va élé kɔnmi zi. Naa, a ti ’ka a nyi si lɛ léé, é wɔra ana lo.

² É léé: É dɔ an gi léé, a za a i gi, yé maa a nɔ i bɔluzan lɛ. A zuané nɔnɔmi ’ka mini lɛ a ta loo? ’I ’bɛ si a pa gi.

³ Samsɔn lé wo lɛ léé: Sin, dé an wenyané kɛlɛ Filisitinu lɛ, an nwiinwe kaan lo.

⁴ Samsɔn go. É kwané wuru do yɔ soru kun yé é sonanu si; a zuo é wo woli yere ékema fié fié yé é sona do do pa wo wolinu méléna.

⁵ É sonanu bi yé é daan kwanénu ma Filisitinu lé ’sa féinu ta yé wo ’sa zunnu kyɛ ble, yé ’sa lé ke é dɔle wa kyɛ ble fɔɔ yé é bɔ ɔliviféinu va.

⁶ Filisitinu léé: De ɛ ’bɛ kɛlɛɛ? Wa zi pa léé: Timinazan lu zana Samsɔn lé. É a na si a lee yé é a nɔ a bɔluzan lɛ, azama. Yé Filisitinu nwa yé wa lezan kyɛ ble, yee valé é ti nya.

⁷ Samsɔn lé wo lɛ léé: ’Bɛ zo lé ka kɛlaa? Maa ’ka dan dɔ lɛ lo fɔɔ ’té maa anzé lɛgi pa ka ma.

⁸ É wo bla é baba wo lala valé wo bli la, ’bɛ zuo é zun yé é go Étam gɔlɛkoro gi.

⁹ Yé Filisitinu go yé wo sɔkɔnnu dɔ Juda tɛrɛ la yé wo zanale sia fɔɔ yé é bɔ Lési.

¹⁰ Juda munu léé: Mɛmalé ka nwa ko maa? Wa zi pa léé: Ko da Samsɔn yere lɛ, yé ko kɛlɛ a lɛ fɛan zo lé é a kɛlɛ ko lɛ, a zo.

¹¹ ’Bɛ dére ta, Juda munu baa do wuru soru go tɛrɛ zia Étam gɔlɛkoro va yé wo lé Samsɔn lɛ léé: I ’ka a gi dɔɔa léé, Filisitinu a é plale ko nwiin loo? Mɛ lé bé kɛlɛ ko lɛ bɛɛ? É a zi pa léé: Maa kɛlɛ wo lɛ fɛan zo lé wa kɛlɛ an lɛ, a zo.

¹² Wo lé a lɛ léé: Ko dan i yere lɛ yé ko i nɔ Filisitinu lɛ. Samsɔn lé wo lɛ léé: Dé ka ’ka dan an gyɛ lɛ lo, ’ka bale ’nyɔɔn an lɛ.

¹³ Wa zi pa a lɛ léé: Iin, ko ’ka dan i gyɛ lɛ lo. Ko a a va léé, ko i yere é pla yé ko i nɔ wo lɛ. Yé wa yere bawɔrɔ dɛrɛ fié nya, yé wa bɔra gɔlɛ gi.

¹⁴ Wo bɔ Lési aan wo, Filisitinu da a si lɛ zia siaale nya. Yé Gakelebale Léli a kun. Balenu lé ke a bɛ ma, wo kɛlɛ bélé wa kyɛ ble, a zo, yé wo si a bɛ ma yé wo dia.

¹⁵ É sokofale puowɔlɛ dɛrɛ ye, é bɛ soi yé é a sia yé é mi wuru soru gyɛ a nya.

¹⁶ Yé Samsɔn léé: Sokofale puowɔlɛ do nya, mi zun do, mi zun fié, Sokofale puowɔlɛ do nya lé ma mi wuru soru gyɛ.

¹⁷ É nyaa wefele nya aan wo é sokofale puowɔlɛ vuli. Yé wo fɛkona tɔ pa Ramat‐Lési.

¹⁸ ’Yiminilɔrɔ a gyɛ é baba yé é Gakelebale laa, yé é léé: Bii ɛ sile we gi ’ko kɛlɛ i wuozan bɛ nya; sin, maa é gan ’yiminilɔrɔ lee, yé ganedɔlozannu an kun?

¹⁹ Gɔlɛkoro lé ke Lési, Bale a fén gyɛ yé ’yi bɔra a gi. Samsɔn ’yi mini, yé a fuu dɔ a ta, yé é plɛplɛ ye. Bɛwemalé wo ’yibɔna ’ko laa An‐Akoré; é ana tan kyɔ Lési.

²⁰ Samsɔn kɛlɛ Izraɛl ta weblezan nya Filisitinu bléyi va, lɛɛ yɔ do wuo.