Weblezannu 14 - Kazambale lé Sebe Sauunu 1979

Samsɔn Filisiti le si

¹ Samsɔn go tɛrɛ zia Timina, yé é le do ye ana mi Filisiti blɛnnu va.

² É go loru zia é ziin aan wo, é a fe é ti valé é bu lɛ yé é léé: Maa le do ye Timina, Filisiti blɛnnu va; ’ka a bo an lɛ.

³ A ti valé a bu lé a lɛ léé: Le do kpen ’ka i bwenu lunu valé kolé munu faa méléna lo yé i go le si lɛ Filisitinu lé, wo gane ’ka é dɔle lo, wo vaa? Yé Samsɔn lé é ti lɛ léé: Bé bo an lɛ, naa, é sɔ an lɛ é baba.

⁴ A ti valé a bu ’ka a gi dɔɔ lɛ léé, a we si Gakelebale va lo; naa, é a we ginina Filisitinu va. ’Bɛ bléyi va ’té Filisitinu a é plale Izraɛl nwiin.

⁵ Samsɔn go tɛrɛ zia Timina, ’té a ti valé a bu a a va. Wo bɔ Timina lé dɔrɔféinu ta aan wo, wo kee golizra boroné do nya, ’té ’bɛ éé wé.

⁶ Gakelebale Léli Samsɔn kun; yé Samsɔn golizra wi kini ékema bélé fɛan zo lé woo boliné wi kinié ékema, a zo, ’té fɛ do kpen ’ka a lee lo. We lé é a kɛlɛ, é ’ka a fe lɛ é ti valé é bu lɛ lo.

⁷ É go tɛrɛ zia yé é glewo lezan va yé ’bɛ sɔ a lɛ.

⁸ ’Bɛ zuo namɔn sɛ, é go Timina é ziin a sile we ma yé é nɔla golizra gale naginile we gi. Yé bé ye, zɔrɔ é nyɔnɔ dɔ yee golizra gale koro gi.

⁹ É zɔrɔnyɔnɔ si yé é go a blele nya zia; é bɔ é bu valé é ti va aan wo, é a ke nɔ wo lɛ yé wa ble. Naa, é ’ka a fe lɛ wo lɛ léé, é zɔrɔnyɔnɔ si golizra gale gi lo.

¹⁰ Samsɔn ti go lezan va. Yé Samsɔn fɛti kɛlɛ ana mi, pɛniɛnu kɛlɛwe yɛrama.

¹¹ Wa ye aan wo, wo pɛniɛnu yɔ do wɔlɛ vu laa a bɔlunu nya.

¹² Samsɔn lé wo lɛ léé: An dan tɔraléé do gyɛ lɛ ka lɛ. Dé ka a gi fe an lɛ fɛti yi sɔrafié wuo, yé dé ka a gi bɔra, an dan varɔ yɔ do wɔlɛ vu valé sɔ yɔ do wɔlɛ vu nɔ lɛ ka lɛ.

¹³ Naa, dé ka ’ka bɔ lɛ a gi fele lɛ an lɛ lo, ka ɛ dan varɔ yɔ do wɔlɛ vu valé sɔ yɔ do wɔlɛ vu nɔ lɛ an lɛ. Yé é lé sin léé: Anlé tɔraléé. Wo léé: A ma tɔraléé.

¹⁴ É lé wo lɛ léé: Fɛblele si fɛblezan gi, yé fɛ néné si fɛ plɛplɛ gi. Yi yaa wuo wo ’ka bɔ lɛ a gi fele lɛ lo.

¹⁵ A yi sɔrafiézan nya wo lé Samsɔn na lɛ léé: ’I zana tunu léé, ’é tɔraléé gi fe ko lɛ; dé ’bɛ kaan lo, ko dan i kyɛ ble lɛ, bii valé i ti lé kɔngimunu nya. I ko laa ko porole we ma, yee kaan loo?

¹⁶ Samsɔn na wuvɔ a ma yé é léé: An za saa ɛ ke i gi, an ’ka sɔ lɛ i lɛ lo. I tɔraléé gyɛ anlé munu lɛ yé i ’ka a gi fe lɛ an lɛ lo. É a zi pa a lɛ léé: Maa ’ka a gi fe lɛ an ti valé an bu lɛ lo ’naan, bii ɛ lɛ lé maa a gi féé?

¹⁷ Fɛti yi sɔrafié ’ko wuo, é vo wuvɔna a ma yé a yi sɔrafiézan nya é a gi fe a lɛ, é kle pa a ta, azama. Yé lezan tɔraléé gi fe élé munu lɛ.

¹⁸ Flamunu we fe Samsɔn lɛ a yi sɔrafiézan nya, ’té yiri ’ka tan vɔ lɛ lo, yé wo léé: Mɛ fɛ ɛ ke néné é mini zɔrɔnyɔnɔ taa? Yé mɛ fɛ ɛ ke plɛplɛ é mini golizra taa? Yé é lé wo lɛ léé: Dé ka ’ka nyanama pa lɛ anlé dirida nya lo, ’té ka ’kanɔ anlé tɔraléé gi fé lo.

¹⁹ Gakelebale Léli a kun yé é go tɛrɛ zia Azkalɔn. É mi yɔ do wɔlɛ vu gyɛ ana yé é wo poro yé é wolé sɔnu nɔ munu lé wo alé tɔraléé gi fe, wo lɛ. A bli fli, yé é go loru é ti lé kɔn ’léé.

²⁰ Yé wo a na nɔ a bɔlu do lé ke a béé nya, a lɛ.