Weblezannu 13 - Kazambale lé Sebe Sauunu 1979

Samsɔn yaale

¹ Izraɛl lé nénu Gakelebale ’namawe kɛlɛ é ziin; yé Gakelebale wo pa Filisitinu lee, lɛɛ yɔ fié wuo.

² Soréa mi do ana, Dan kululazan nya, wa laama Manoas. A na a sɔnzan nya yé é ’ka né yaa lɛ lo.

³ Gakelebale lé lanje do bɔra lezan va yé é lé a lɛ léé: Bé ye, bii a sɔnzan nya yé ilé né ’ka lo; i dan bɔn si lɛ yé i dan né yaa lɛ gɔné nya.

⁴ Sin, ’i yuɛ pa ibo va é zima, té i nwɛ valé dɔrɔ mini lo, té i fɛ tiridɔle do kpen ble lo.

⁵ I dan bɔn si lɛ yé i dan né yaa lɛ gɔné nya, azama. Bléyian va lé wo dan né ’ko yaa lɛ é dan kɛlɛ lɛ Bale zé nya, amalé té i sɛnné dɔ a nwin ma lo; yee ɛ dan Izraɛl sile Filisitinu lee péli sia lɛ.

⁶ Lezan go a fe lɛ é zana lɛ léé: Bale lé mi do da an va yé a yara a bélé Bale lé lanje do yara zo, é kana zén mi gi. Maa ’ka a sina laa lɛ lo, yé é ’ka é tɔ fe lɛ an lɛ lo.

⁷ Naa, é lé an lɛ léé: I dan bɔn si lɛ yé i dan négɔné do yaa lɛ; sin, té i nwɛ valé dɔrɔ mini lo; té i fɛ tiridɔle ble lo, naa, é sia a yaayi ma fɔɔ yé é bɔ a gale ma, né ’ko é dan kɛlɛ lɛ Bale zé nya.

⁸ Manoas bazoro Gakelebale lɛ léé: Aa, Mizan, Bale lé mi lé bé pa zia bɛ, ’é da é ziin ko va ma, yé we lé é a lé ko kɛlɛ né lé ko dan a yaa lɛ, a lɛ, ’é a paa ko gi ma!

⁹ Bale Manoas lé bazoro dére ’ma yé Bale lé lanje da é ziin lezan va. É a é nyanale féi, ’té a zana Manoas ’ka a va lo.

¹⁰ É vlan buru é nya do yé é we ’ko zuo fe ’é zana lɛ, yé é lé a lɛ léé: Bé ye, mi lé é da an va kyɛni bɛ, é da é ziin.

¹¹ Manoas nwa yé é go é na zuo yé é go gɔnézan va yé é lé a lɛ léé: Bii ɛ we fe le ’ko lɛɛ? É a zi pa léé: Maa lé.

¹² Manoas léé: Sin, dé i dére lɛ sɔɔ, é a lé ko kɛlɛ kaa né vazia, bé fe ko lɛ.

¹³ Gakelebale lé lanje lé Manoas lɛ léé: Fɛ faa lé maa a fe lezan lɛ, ’é a faa sɔn.

¹⁴ Té é dɔrɔyili mafɛ do kpen ble lo, té é nwɛ valé dɔrɔ mini lo, té é fɛ tiridɔle do kpen ble lo; we faa lé maa a fe a lɛ, ’é a ta tawo.

¹⁵ Manoas lé Gakelebale lé lanje lɛ léé: Ilé zanté, ’i vo sɛ yé maa boligɔnéné dɔne i lɛ.

¹⁶ Gakelebale lé lanje a zi pa Manoas lɛ léé: Dé i an mɔn‐oo, an ’ka dan ilé fɛ ble lɛ lo; naa, dé é sɔ i lɛ léé, i balebanwi kyɛ ble, bé kyɛ ble Gakelebale ɛ lɛ. Manoas ’ka a gi dɔɔ lɛ léé, é a Gakelebale lé lanje do nya lo.

¹⁷ Yé Manoas lé Gakelebale lé lanje lɛ léé: I tɔ lé nɔɔ? yé dé i dére lɛ sɔɔ yé maa i bɔ.

¹⁸ Gakelebale lé lanje a zi pa léé: Mɛmalé i an tɔ ma laa? É a tɔ tɔbɔle nya.

¹⁹ Manoas boligɔnéné valé blanfɛ si yé é Gakelebale ban a nya gɔlɛ ta. Bléyian va lé Manoas valé é na a naginina we blɛn do kɛlɛ.

²⁰ Kyɛnɛnɛ nwa balebanna ta la gi zia aan wo, Gakelebale lé lanje nwa yé é go loru balebanna lé kyɛnɛnɛ méléna. Wo we ’ko ye tɔɔn, Manoas valé é na dia wo bli la tɛrɛ va.

²¹ Gakelebale lé lanje ’ka bɔra lɛ Manoas valé é na va é dɛrɛ lo. Yé Manoas a ye léé, Gakelebale lé lanje lé,

²² yé é lé é na lɛ léé: Ko Bale ye, amalé ko dan ga lɛ.

²³ A na lé a lɛ léé: Dé ko gyɛwe a kɔɔn Gakelebale ma, ’té é ’ka é ban‐ɛn blé lo, ’té é ’ka we ’ko kɛla ko yuɛ va kɔɔn lo, ’té é ’ka we ’ko zoɛnu fé ko lɛ lo.

²⁴ Lezan né yaa gɔné nya yé é a tɔ pa Samsɔn. Né tin yé Gakelebale a drɔɔ vo.

²⁵ Yé Gakelebale Léli kun we kɛlɛle ma a nya Masané‐Dan, Soréa valé Esitaol méléna.