Weblezannu 12 - Kazambale lé Sebe Sauunu 1979

¹ Éfraim munu zén ékeva, wo go yirinwana bɛbolazia, yé wo lé Jɛfeté lɛ léé: Mɛmalé i go guli dan lɛ Amɔn benu va yé i ’ka ko laa lɛ léé, ko go i va loo? Ko dan bii valé ilé kɔn kyɛ ble lɛ ékeva.

² Jɛfeté a zi pa wo lɛ léé: Maa valé anlé munu, ko we kiɛre sia Amɔn benu va; yé dé maa ka laa, ka ’ka an si lɛ wo lee lo.

³ Maa ye léé, ka ’ka dana bɔna an va lo, an bli si an gale lɛ yé an go guli dan lɛ Amɔn benu va. Gakelebale wo pa an lee. Mɛwemalé kyɔ ka nwa an ma guli danle an va we maa?

⁴ Jɛfeté Galaad munu faa zén ékeva yé é guli dan Éfraim munu va; Éfraim munu a fena léé: Ka a fwina ko lee. Galaad a Éfraim méléna, é a Manasé méléna! bɛwemalé Galaad munu guli dan Éfraim munu va yé wo wo kele.

⁵ Galaad Juudɛn kinina si Éfraim munu dale ’lɛ. Yé dé é kɛlɛ léé, Éfraim mi do a vlan sina, dé ’bɛ da, dé ’bɛ a fe léé: ’I zi nɔ an lɛ, ’an gié, Galaad munu a laan a lee léé: Bii a Éfraim mi nyaa?

⁶ Dé é a zi pa léé: Gba, ’té wa fe a lɛ léé, bé fe, Sibolɛt, yé é a fé Sipolɛt, é ’ka bɔa a fele lɛ lo, azama. ’Bɛ ta léé, Galaad munu a kunwo yé wa bɔrɔ boo Juudɛn kinina sɔnɔ. ’Bɛ bléyi va Éfraim munu zamaga wo mi baa yɔ do wɔlɛ do.

Ibisan — Élɔn — Abudɔn

⁷ Jɛfeté kɛlɛ Izraɛl ta weblezan nya lɛɛ suiɛdo; ’bɛ zuo Galaad mi Jɛfeté ga yé wa pa Galaad fla do ta.

⁸ ’Bɛ é zuo, Bɛtléɛm mi Ibisan kɛlɛ Izraɛl ta weblezan nya.

⁹ A benu a yɔ do wɔlɛ vu yé é lunu yɔ do wɔlɛ vu nɔ bo lɛ, yé é blɛnnu yɔ do wɔlɛ vu pa é benu lee, wo nanu nya. É kɛlɛ Izraɛl ta weblezan nya lɛɛ sɔrafié.

¹⁰ ’Bɛ zuo Ibisan ga yé wa pa Bɛtléɛm.

¹¹ ’Bɛ é zuo, Zabulɔn mi Élɔn kɛlɛ Izraɛl ta weblezan nya. É kɛlɛ Izraɛl ta weblezan nya lɛɛ vu;

¹² ’bɛ zuo Zabulɔn mi Élɔn ga yé wa pa Ajalɔn, Zabulɔn tɛrɛ la.

¹³ ’Bɛ é zuo, Piratɔn mi Ilɛl be Abudɔn kɛlɛ Izraɛl ta weblezan nya.

¹⁴ A benu a yɔ fié yé a nénénu a yɔ do wɔlɛ vu, yé woo vɔa sokofalené yɔ yaa wɔlɛ vu ta. É kɛlɛ Izraɛl ta weblezan nya lɛɛ sɔraa;

¹⁵ ’bɛ zuo, Piratɔn mi Ilɛl be Abudɔn ga, yé wa pa Piratɔn, Éfraim tɛrɛ la, Amalɛknu lé gɔ ma.