Weblezannu 11 - Kazambale lé Sebe Sauunu 1979

¹ Galaadzan Jɛfeté a blitaplɛplɛ nyanazan nya. É a bɔrɔdɛ le be nya yé Galaad ɛ Jɛfeté yaa.

² Galaad na negɔnénu yaa é lɛ yé wo kɛlɛ segele aan wo, wo Jɛfeté bin yé wo léé: I ’ka dan ko ti zara ble lɛ lo, i a le bɛ be nya, azama.

³ Yé Jɛfeté vlan buru baa é bwenu lee yé é nyana Tob tɛrɛ la. Boazannu zén Jɛfeté va, ’té woo tawoo wo nya.

⁴ Ana mɔn ’bɛ zuo sɛ faa, yé Amɔn benu guli dan Izraɛl va.

⁵ Amɔn benu guli dan Izraɛl va aan wo, Galaad mi segelenu go Jɛfeté gini lɛ Tob tɛrɛ la.

⁶ Wo lé Jɛfeté lɛ léé: ’I da, i dan kɛlɛ lɛ ko nwiinzan nya yé ko dan guli dan lɛ Amɔn benu va.

⁷ Jɛfeté a zi pa Galaad mi segelenu lɛ léé: An za a ka gi yé ka an bin an ti lé kɔn gi, yee kaan loo? Yé sin, we tɔntɔn bɔ ka ma yé ka da an vaa?

⁸ Galaad mi segelenu lé Jɛfeté lɛ léé: Ko nɔla i va sin léé, ’i tawo ko va, yé ’i guli dan Amɔn benu va, yé ’i kɛlɛ ko nwiinzan nya, ko valé Galaad munu faa nwiinzan nya.

⁹ Jɛfeté a zi pa Galaad mi segelenu lɛ léé: Dé kaa go guli dan lɛ Amɔn benu va, yé Gakelebale wo pa an lee, maa dan kɛlɛ lɛ ka nwiinzan nya.

¹⁰ Galaad mi segelenu lé Jɛfeté lɛ léé: Gakelebale ’é ko dére ’ma ma, yé ’é a we ble ma, ’té dé ko ’ka i dére tawe kɛlɛ lɛ lo.

¹¹ Yé Jɛfeté valé Galaad mi segelenu go. Munu a dɔ ’wo nwiinzan nya yé wa dɔ ’wo zilɛzan nya yé dére faa lé Jɛfeté a fe kɔɔn, é a fe é ziin Gakelebale lɛ, Misipa.

¹² Jɛfeté munu nwunvɔ Amɔn benu nwiinzan va a fele we gi a lɛ léé: Mɛ we ɛ ke maa valé bii méléna yé i da an va, guli danle anlé tɛrɛlamunu va we gii?

¹³ Amɔn benu nwiinzan a zi pa Jɛfeté lé nwunvɔzannu lɛ léé: Izraɛl si Éjipiti tɛrɛ la aan wo, é anlé tɛrɛ si, é sia Aanɔn yuu ma fɔɔ yé é bɔ Jabɔk yuu valé Juudɛn yuu ma, yee lé. Bé nɔ sin an lɛ, bli drɔɔ nya.

¹⁴ Jɛfeté munu nwunvɔ é ziin Amɔn benu nwiinzan va a fele we gi a lɛ léé:

¹⁵ Jɛfeté léma: Izraɛl ’ka Moab lé tɛrɛ si lɛ lo, yé é ’ka Amɔn benu lé tɛrɛ si lɛ lo.

¹⁶ Naa, Izraɛl si Éjipiti tɛrɛ la bléyian va, é tawo nyéné saa lé fɛna fɔɔ Wɛyi Sɔɔn ma, yé é bɔ Kadɛs.

¹⁷ Yé Izraɛl munu nwunvɔ Édom nwiinzan va a fele we gi ’bɛ lɛ léé: ’I zi nɔ an lɛ ’an gié ilé tɛrɛ la. Naa, Édom nwiinzan ’ka a nyi si lɛ lo. É munu nwunvɔ é ziin Moab nwiinzan va, yé ’bɛ gba vɔ. Yé Izraɛl vo Kadɛs.

¹⁸ ’Bɛ zuo é tawo nyéné saa lé fɛna yé é tawo Édom valé Moab tɛrɛ soro gi, yé é da Moab tɛrɛ la yirinwanazia; wo sɔkɔn dɔ Aanɔn yuu zi, yé wo ’ka wɔra lɛ Moab tɛrɛ la lo, naa Aanɔn yuu a Moab glɛ nya.

¹⁹ Izraɛlnu munu nwunvɔ Amorénu valé Esibɔn nwiinzan Sioni va yé Izraɛl lé a lɛ léé: ’I zi nɔ an lɛ léé, ’an gié ilé tɛrɛ la fɔɔ yé an bɔ fɛ lé maa ke gona ana, ana.

²⁰ Naa, Sioni ’ka pa lɛ Izraɛl ta léé, é gié élé tɛrɛ la lo; élé munu faa zén ékeva yé é sɔkɔnnu dɔ Jaas yé é guli dan Izraɛl va.

²¹ Gakelebale, Izraɛl lé Bale, é Sioni valé élé munu faa pa Izraɛl lee, yé wo wo gyɛ. Amorénu lé ke é nyanale tɛrɛ ’ko la, Izraɛl wolé tɛrɛ faa si.

²² Wo Amorénu lé tɛrɛ faa si, é sia Aanɔn yuu ma yé é bɔ Jabɔk yuu ma, é si nyéné saa lé fɛna yé é bɔ Juudɛn yuu ma.

²³ Yé sin, Gakelebale, Izraɛl lé Bale, é Amorénu bin élé munu Izraɛl ’lɛ, bii ɛ dan wolé tɛrɛ kɛlɛ lɛ izé nyaa?

²⁴ Fɛ lé izé bale Kémɔs a nɔ i lɛ izé nya, é ’ka dan kɛlɛ lɛ izé nya loo? Yé fɛ faa lé Gakelebale, kozé Bale a nɔ ko lɛ, é ’ka dan kɛlɛ lɛ kozé nya loo?

²⁵ Bii mini Moab nwiinzan Sipɔɔ be Balak lɛɛ? É za kɛlɛ Izraɛl vaa? taa, é guli dan a vaa?

²⁶ Lɛɛ wuru do yɔ soru lo, Izraɛl éé nyanaan Esibɔn valé é zi flanu koo, Aroɛɛ valé é zi flanu koo, Aanɔn glɛ la flanu faa koo, wo ta; mɛmalé ka ’ka wo si lɛ a lee lɛɛ ’konu wuo loo?

²⁷ Maa ’ka i ’namawe kɛlɛ lɛ lo, yé bé kɛlɛ naané an va zia, guli danle an va nya. Weblezan, Gakelebale, ’é kɛlɛ weblezan nya kyɔ Izraɛl lé nénu valé Amɔn lé nénu méléna ma!

²⁸ Amɔn munu nwiinzan ’ka tɔné dɔ lɛ Jɛfeté dérenu lɛ lo.

²⁹ Gakelebale Léli a Jɛfeté ta. É gié Galaad tɛrɛ valé Manasé tɛrɛ ta; é go Misipé, Galaad tɛrɛ la; é si Misipé, Galaad tɛrɛ la yé é zén zia Amɔn munu ma.

³⁰ Jɛfeté Gakelebale kun, yé é léé: Dé i Amɔn munu pa an lee,

³¹ dé an nɔla an pai guliwuo nya an lee, dé miomian si anlé kɔn ’léé yé é da an si lɛ zia, maa dan a pa lɛ é yɛrama Gakelebale zé nya, yé maa dan a nɔ lɛ balebanwi lé wa kyɛ blé, a nya.

³² Jɛfeté zén zia yé é go guli dan lɛ Amɔn munu va, yé Gakelebale wo pa a lee.

³³ É wo kele tata, é sia Aroɛɛ fɔɔ yé é bɔ Minit vazia, é fla yɔ do si, fɔɔ yé é bɔ Abɛl‐Kéramim. Yé Izraɛlnu Amɔnnu tua.

³⁴ Jɛfeté nɔla élé kɔn ’léé Misipa. Yé bé ye, a lu da a si lɛ zia poo nya é lee, ’té éé néné boo. Alé né wɔlɛ do kpen lé; a be ’ka lo yé a lu bɛ ’ka lo.

³⁵ É a ye tɔɔn, élé sɔnu fia yé é léé: Aa! an lu! i an gyɛ, yé i a an blikyɛdɔzannu va mi do nya! An Gakelebale kun yé an ’ka bɔa an dére nɔlale lɛ lo.

³⁶ É lé a lɛ léé: An ti, dé i Gakelebale kun, yé sin Gakelebale i lɛgi pa i nyanézannu Amɔn benu ma, bé kɛlɛ an lɛ fɛan zo lé é si i ’léé, a zo.

³⁷ Yé é lé é ti lɛ léé: ’I we do nyi si an lɛ, léé, an vo anbo ma moné fié. An dan go lɛ yé an dan gié lɛ gɔnu nwiin yé an dan an vole é pla wuvɔ lɛ an bɔlunu va.

³⁸ É a zi pa léé: ’I go. Yé é a vo éboma moné fié. Wo go é bɔlunu nya yé wo a vole é pla wuvɔ gɔnu nwiin.

³⁹ Moné fié nyaale zuo é nɔla é ti va, yé ’bɛ élé bale kunle lɛ sɔɔ a vazia. É ’ka gɔné dɔɔ lɛ gɔné nya lo.

⁴⁰ É sia ’bɛ bléyi ’ko va é kɛlɛ Izraɛl gɔnɔlawe nya léé, lɛɛ faa do do gi yi ziɛn Izraɛl blɛnnu woo goo Galaadzan Jɛfeté lu lé fɛti kɛlɛ lɛ.