Weblezannu 10 - Kazambale lé Sebe Sauunu 1979

Tola valé Jaii lé we

¹ Abimélɛk é zuo, Dodo be Pua é be Tola, Isakaa mi nya, é nwa Izraɛl vole wobo ma we ma; éé nyanaan Samii, Éfraim gɔ ma.

² É kɛlɛ Izraɛl ta weblezan nya lɛɛ yɔ do wɔlɛ yaa wuo; ’bɛ zuo é ga, yé wa pa Samii.

³ ’Bɛ é zuo Galaadzan Jaii nwa yé é kɛlɛ Izraɛl ta weblezan nya lɛɛ yɔ do wɔlɛ fié.

⁴ A benu a yɔ do wɔlɛ vu yé woo vɔa sokofalené yɔ do wɔlɛ vu ta, yé wolé flanu a yɔ do wɔlɛ vu; woo wo laama Jaii lé flanu fɔɔ kyɔ yi nya, yé wa Galaad tɛrɛ la.

⁵ Jaii ga, yé wa pa Kamɔn.

Jɛfeté lé we

⁶ Izraɛl lé nénu wo Gakelebale ’namawe kɛlɛ é ziin; Baalnu koo, Asataténu koo, Siri lé balenu koo, Sidɔn lé balenu koo, Moab lé balenu koo, Amɔn benu lé balenu koo, Filisitinu lé balenu koo, wo wo bɔ, yé wo Gakelebale vo, ’té wo ’ka a bɔa é dɛrɛ lo.

⁷ Gakelebale bli fli Izraɛl ma yé é wo dan Filisitinu valé Amɔn benu lee.

⁸ Wo nyané pa Izraɛl lé nénu ta yé wo wo pun bo ’bɛ lɛɛ ’ko gi, yé wa kɛlɛ Izraɛl lé nénu faa lé ke Juudɛn zi, Amorénu lé Galaad tɛrɛ la, wo lɛ, lɛɛ vu ta sɔraa wuo.

⁹ Amɔn benu Juudɛn kini guli danle we gi é ziin Judanu koo, Bɛnjamɛnnu koo, Éfraim munu koo, wo va. Yé Izraɛl kɛlɛ we tɔntɔn blɛn gi.

¹⁰ Izraɛl lé nénu siaa Gakelebale lɛ, yé wo léé: Ko wenyané kɛlɛ i ma; ko kozé Bale vo yé ko Baalnu bɔ.

¹¹ Gakelebale lé Izraɛl lé nénu lɛ léé: Maa ’ka ka si lɛ Éjipitinu koo, Amorénu koo, Amɔn benu koo, Filisitinu koo, wo lee loo?

¹² Bléyian va lé Sidɔn munu Amalɛk valé Maɔn kle pa ka ta yé ka siaa an lɛ, an ’ka ka si lɛ wo lee loo?

¹³ Naa, ’kaa, ka an vo yé ka bale bɛnu bɔ. Bɛwemalé maa ’ka dan ka vo lɛ kabo ma é dɛrɛ lo.

¹⁴ ’Ka go, balenu lé ka wo si, ’ka wo laa; ’wo ka vo kabo ma kalé nyanéble bléyi va ma!

¹⁵ Izraɛl lé nénu lé Gakelebale lɛ léé: Ko wenyané kɛlɛ. Fɛan zo lé é sɔ i lɛ, bé kɛlɛ ko lɛ a zo ma. Naa, ilé zanté, ’i ko vo kobo ma kyɔ é pla.

¹⁶ Yé wo bale bɛnu si wo méléna yé wo Gakelebale bɔ, ’té ’bɛ bli kyɛ dɔ wolé nyanéblele ma.

¹⁷ Amɔn benu zén ékeva yé wo sɔkɔn dɔ Galaad tɛrɛ la yé Izraɛl lé nénu zén ékeva yé wo sɔkɔn dɔ Misipa.

¹⁸ Galaad munu valé wo nwiinzannu lé ’wo ke lɛ léé: Mi kyɛn é dan guli sia lɛ Amɔn lé nénu vaa? É dan kɛlɛ lɛ Galaad munu faa nwiinzan nya.