Weblezannu 1 - Kazambale lé Sebe Sauunu 1979

Izraɛl bɛnnu tɛrɛnu si

¹ Jozué gale zuo, Izraɛl lé nénu we laa Gakelebale lee léé: Ko va mi kyɛɛn ɛ dan nwa lɛ é vinin gulidanle Kanaannu va we maa?

² Gakelebale a zi pa wo lɛ léé: Juda é dan nwa lɛ; ka ye, maa tɛrɛ pa a lee.

³ Yé Judanu lé ’wo bwe Siméɔnnu lɛ léé: ’Ka da ko va tɛrɛ lé wa nɔ ko lɛ ’munnu zunle nya, a ta, yé kaa guli dan Kanaannu va. Ko dan go lɛ é ziin ka va, kazé lé wa nɔ ka lɛ, a ta. Yé wo go Siméɔnnu nya.

⁴ Judanu nwa, yé Gakelebale Kanaannu valé Férézinu pa wo lee; yé wo mi baa soru gyɛ Bézɛk.

⁵ Wo Adoni‐Bézɛk ye Bézɛk yé wo guli dan a va, yé wo Kanaannu valé Férézinu gyɛ.

⁶ Adoni‐Bézɛk vlan buru, naa, wa zuo bin yé wa kun yé wa bɛnwɔlɛ gɔnénu valé a ganewɔlɛ gɔnénu bɔi.

⁷ Adoni‐Bézɛk léma: Minwiinzan yɔ yaa wɔlɛ vu lé wo bɛnwɔlɛ gɔnénu valé wo ganewɔlɛ gɔnénu ke é bɔile, fɛblelenu lé wo dian anlé tablé wuo, yee lé wa blé. We lé maa a kɛlɛ, yee lé Bale a kɛlɛ an lɛ. Yé wo go a nya Jérusalɛm, yé é ga ’bɛna.

⁸ Judanu guli dan Jérusalɛm va yé wa si; wana munu gyɛ gwɔun ’léé sorosoro nya, yé wo fla kyɛ ble.

⁹ ’Bɛ zuo Judanu zun, Kanaannu lé wo ke é nyanale gɔ koo, yirinwana bɛyilazia koo, fɛna pɛblɛɛ koo, wona, guli danle wo va we gi.

¹⁰ Juda go guli dan lɛ Kanaannu lé wo ke é nyanale Ébrɔn, ’té wa tɔ laama é vinin Kiijat‐Aaba bɛ, wo va; Sésai koo, Aiman koo, Talmai koo, é anamunu gyɛ.

¹¹ Wo si ’bɛna yé wo yara dɔ Débii munu va. Wo Débii tɔ laama é vinin Kiijat‐Séfɛɛ.

¹² Kalɛb léma: Mi lé é dan guli dan lɛ Kiijat‐Séfɛɛ va yé é a si, maa dan an lu Akasa nɔ lɛ a lɛ a na nya.

¹³ Kalɛb zuané Kénaz be Otiniɛl a si; yé Kalɛb é lu Akasa nɔ a lɛ a na nya.

¹⁴ Bléyian va lé é go Otiniɛl lé kɔn ’léé, é lé Otiniɛl lɛ léé, ’é féi do laa é ti lee. É si élé sokofale punu yé é zun, yé Kalɛb lé a lɛ léé: Mɛ léé?

¹⁵ É lé a lɛ léé: ’I blɛ taa kɛlɛ an lɛ, naa, i tɛrɛ nɔ an lɛ yirinwana bɛyilazia; ’i ’yibɔnanu nɔ an lɛ é ziin. Yé Kalɛb loruzia ’yibɔna valé tɛrɛ zia ’yibɔna nɔ a lɛ.

¹⁶ Moizi na ti Kéni mi benu si yɔwuofla la, wo valé Juda benu nya, yé wo go Juda lé fɛna bwi la, Arad yirinwana bɛyilazia, yé wo nyana anamunu va.

¹⁷ Judanu valé ’wo bwe Siméɔnnu zi sia yé Kanaannu lé wo ke é nyanale Séfat, wo wo gyɛ tata, yé wana tɔ pa Ooma.

¹⁸ Gaza valé é zi tɛrɛ koo, Azkalɔn valé é zi tɛrɛ koo, Ékrɔn valé é zi tɛrɛ koo, Judanu wo si.

¹⁹ Gakelebale a Judanu va; yé wo gɔ si, naa, wo ’ka bɔ lɛ fɛna pɛblɛɛna munu binle lɛ lo, ’bɛnu lé foliɛwɔlɛ goronu a, ’bɛzama.

²⁰ Wo Ébrɔn nɔ Kalɛb lɛ, fɛan zo lé Moizi a fe, a zo; yé é Anak be yaa bin ana.

Munu Gakelebale lɛgama

²¹ Jébusinu lé wo ke é nyanale Jérusalɛm, Bɛnjamɛnnu ’ka wo bin lɛ lo; yé Jébusinu vo Bɛnjamɛnnu va fɔɔ kyɔ.

²² Jozɛfu lé munu nwa é ziin Bétɛl ma, ’té Gakelebale a wo va.

²³ Jozɛfu lé munu Bétɛl ma vɔɔ, ’té wa tɔ laan é vinin Luz.

²⁴ Mimavɔɔzannu mi do ye sina fla, yé wo lé a lɛ léé: Fɛana lé ko bɔaléé ko wɔra fla, bé gɔɔn ko lɛ yé ko nyanai zén i ta.

²⁵ Fɛana lé woo wɔraan fla é a zi nagɔɔn wo lɛ. Yé wo flamunu gyɛ gwɔun nya; naa, mi ’ko valé élé munu faa, wo wo vo yé wo go.

²⁶ Mi ’ko go Étinu lé tɛrɛ la; é fla do pa, yé é a tɔ pa Luz; tɔ ’ko a a ma fɔɔ kyɔ.

²⁷ Bɛt‐Séan valé é zi flanu koo, Taanak valé é zi flanu koo, Dɔɔ valé é zi flanu koo, Jibléam valé é zi flanu koo, Mégido valé é zi flanu koo, Manasénu ’ka wona munu bin lɛ lo; yé é sɔ Kanaannu lɛ léé, ’wo vo tɛrɛ ’ko la.

²⁸ Dé Izraɛl plɛplɛ taa ye, wo Kanaannu kɛlɛ lɛnpo banwomunu nya ’wo lɛ, naa, wo ’ka wo bin lɛ lo.

²⁹ Kanaannu lé wo ke é nyanale Gézɛɛ, Éfraimnu ’ka wo bin lɛ lo, yé Kanaannu vo Gézɛɛ, Éfraimnu va.

³⁰ Kitrɔn munu valé Naalɔl munu é ziin, Zabulɔnnu ’ka wo bin lɛ lo; yé Kanaannu vo Zabulɔnnu va, naa, wo wo kɛlɛ lɛnpo banwomunu nya ’wo lɛ.

³¹ Azɛɛnu ’ka Ako munu bin lɛ lo; Sidɔn munu koo, Akla munu koo, Azib munu koo, Elba munu koo, Afik munu koo, Réob munu koo, é ’ka wo do kpen bin lɛ lo;

³² yé Azɛɛnu nyana Kanaan munu va; wo ɛ ke ana tɛrɛlamunu nya, yé wo ’ka wo bin lɛ lo, ’bɛzama.

³³ Néfitalinu ’ka Bɛt‐Sémɛs munu bin lɛ lo, Bɛt‐Anat munu koo, é ziin, yé wo nyana Kanaannu va, naa, wo ɛ ke ana tɛrɛlamunu nya, naa, wo Bɛt‐Sémɛs munu valé Bɛt‐Anat munu kɛlɛ lɛnpo banwomunu nya ’wo lɛ.

³⁴ Amorénu Dan lé munu nyunu é ziin gɔ gi, yé wo ’ka wo vo lɛ wo zun fɛna pɛblɛɛna lo.

³⁵ É sɔ Amorénu lɛ léé, wo vo Aa‐Érɛs koo, Ajalɔn koo, Saalbim koo, wona; naa, Jozɛfu lé munu bɛ mini wo lɛ yé wo wo kɛlɛ lɛnpo banwomunu nya ’wo lɛ.

³⁶ Amorénu lé tɛrɛ péli sia Akrabim lé gɔ ma, é sia Séla, yé é gié ’bɛ la.