Tite 3 - Kazambale lé Sebe Sauunu 1979

É a lé munu ’é wezin kɛlɛ

¹ ’Bé sele dɔ munu gi léé, ’wo pla minwiinmunu faa wuo; ’wo wo lɛdɔma; nyanama zin gɔnɔ faa pale ’é sɔ wo lɛ;

² té wo mi do tɔ sɛrɛ lo; ’wo kɛlɛ mi drɔɔnu nya; ’wo kɛlɛ mi bli dɔralazannu nya; ’wo kɛlɛ bli drɔɔzannu nya munu faa va.

³ Naa, é vinin, ko é ziin, ko a tavozannu koo, mi lɛgamazannu koo, mi sanlenu koo, wo nya; ko bli éé bɔa fɛ faa ma; wenaané gɔnɔ faa lɔrɔ a ko ma; ko wenyané kɛla ’té ko maawoo; ’té munu lé ko za pa yara lé, ’té ko ko ke za paan.

⁴ Naa, dé ko Siéwegizan Bale élé wezin valé élé mi va sɔlɛle gɔɔn munu lɛ bléyian va, é ko si we gi.

⁵ É ’ka ko si lɛ we gi we tegelenu lé ko a kɛlɛ, wo ma lo; naa, a nyanai zén ko ta, amalé é ko si we gi; é ko yaa é dɛrɛ, yé ’bɛ a bélé ko zurule zo, yé é ko kɛlɛ mi dɛrɛ nya Léli Sauun lé plɛplɛ nya, amalé ko si we gi.

⁶ É Léli Sauun lé plɛplɛ nɔ ko lɛ kiɛre ko Siéwegizan Jézu Krist lé we ma, léé,

⁷ dé é ko kɛlɛ tegele élé zin ma faa yé ko bli ’é kɛlɛ vole é yuɛma lé a glɛ ’ka lo, a yele lɛ.

⁸ We ’ko a wegɔné nya. É sɔ an lɛ léé, i dɔ a ta tegele, té i daan a fele ma lo, léé, munu lé wo bli vo Kazambale lɛ, ’wo wezinnu kɛlɛ wo bli faa nya. We lé é ke é zima ’té munu éé tɔnɔ yé a ma, yee lé ke bɛ.

⁹ Naa, boa zavɔlenu koo, mi tranu dɔgɔnɔ gɔɔnle koo, wesialenu koo, bélidɔwe ta zavɔle koo, ’i paa wo ma. Wo tɔnɔ ’ka lo; wa we planu nya.

¹⁰ Mi lé éé munu kinié ékema, dé i we pla a lɛ gɔnɔ do valé gɔnɔ fié, ’i kan kini a ma.

¹¹ Bé gi dɔɔ léé, mi ’ko a é sanle; é a wenyané kɛlɛna, ’té éé we dɔa ébozen nwiin.

Pɔl we pla Tite bozen lɛ

¹² Dé Aatémas léé, dé Tisik léé, dé maa a nwunvɔ i va bléyian va, ’i da an va é kele Nikopoli. Ana lé é dɔ an gi léé, an dan dunubléyi kɛlɛ lɛ.

¹³ Bélidɔwedɔɔzan Zénas valé Apolɔs lé ta lé wo dan go lɛ a wo lɛ bɛ, ana fɛ faa lé wo mawe ke a gi bɛ, ’bé nɔ wo lɛ. Té fɛ do kpen é vuru wo ma lo.

¹⁴ Yé é a lé ko we paa kolé munu gi léé, ’wo wezin kɛlɛ, fɛnu lé munu mawe ke wo gi é kele bɛ, a nɔle wo lɛ we ma, té wo kɛlɛ munu lé wo ’ka tɔnɔ yé lo, wo nya lo.

A drɔɔ vole

¹⁵ Munu faa lé wo ke an va ’ko, wo we i va. Munu lé ko sɔ wo lɛ Bale lé we gi, an we wo va ma. Zin ’é vo ka faa ta ma.