Sofoni 2 - Kazambale lé Sebe Sauunu 1979

¹ Yaragyɛlo bɛn, ’ka gi bɔrɔ. ’Ka ka bli gi gini,

² ka mawe lé Bale a fe, a lɛsɔɔle ’lɛ, yé yi ’ko é gié bélé ’sapɛɛ zo, Gakelebale lé bliflile ka ma ’lɛ, Gakelebale lé blifliyi bɔle ka ma ’lɛ.

³ Ka faa lé ka ke bokiénézannu nya tɛrɛ ’ko la, ’ka Gakelebale nagini; ka lé, ka a déretawenu kɛla, ka lé! ’Ka we tegele nagini; ’ka kɛlɛ bokiénézannu nya! Dé ka dan so lɛ we lee Gakelebale lé blifliyi nyaa?

Izraɛl punma bɛnnu guru zana a gi

⁴ Naa, wo dan fwi lɛ Gaza. Azkalɔn é dan vo lɛ bwi nya. Wo dan Azdɔd munu bin lɛ é yiéyi; wo dan Ékrɔn soowɔla lɛ.

⁵ Munu lé wo ke wɛyi gɔ ’wuo la, Kéréti munu nya, we tɔntɔn ’é bɔ wo ma ma. Bii Kanaan, Filisiti munu lé tɛrɛ, Gakelebale we fe ka ma. É léma: Maa dan i sɛrɛ lɛ. Mi ’ka dan kɛlɛ lɛ ina é dɛrɛ lo.

⁶ Wɛyi gɔ la tɛrɛnu é dan kɛlɛ lɛ winu lé fɛblena koo, ’blatabinmunu yiina koo, trubɛ palunu lé lublena koo, wo nya.

⁷ Wɛyi gɔ ’konu é dan kɛlɛ lɛ Juda munu pɔnénu zé nya; ana lé wo dan wolé trubɛnu pa lɛ. Wo dan flin lɛ nyanadi Azkalɔn munu lé kɔnnu gi. Naa, Gakelebale, wolé Bale gi ’ka dan san lɛ wo ma lo. É dan wo si lɛ luu gi yé é da wo nya é ziin.

⁸ Bléyian va lé Moab valé Amɔn munu anlé munu sɔnɔ, yé wo nwa wolé tɛrɛ glɛnu ma boblɛn nya, maa Moab munu lé sɔnɔdérenu ’ma, yé maa Amɔn munu lé wo ma we sɛrɛ dérenu ’ma.

⁹ Lai sunyanu lé Gakelebale, Izraɛl lé Bale léma: Maa a é yuɛma. Moab é dan kɛlɛ lɛ bélé Sɔdɔm zo, yé Amɔn é dan kɛlɛ lɛ bélé Gɔmɔɔ zo. Lélinu é dan tuu lɛ wona, yé wo dan vo lɛ wɛtɛrɛ valé nyéné saa nya yifaama. Anlé munu pɔnénu é dan ’wii lɛ wo ta, yé anlé bɛngɔnɔ pɔnénu é dan wo si lɛ ’wozé nya.

¹⁰ Wolé boblɛn ma lé we ’ko é dan bɔ lɛ wo ma; wo lai sunyanu lé Gakelebale lé munu sɔnɔ, yé wo wo nagini wo yuɛ zuo glan‐un, azama.

¹¹ Gakelebale é dan kɛlɛ lɛ wo ma bawurumazan nya, naa é dan viébalenu faa kulu ga lɛ tɛrɛ la. Yé munu faa do do é dan si lɛ ’wolé tɛrɛ la, yé wo dan dia lɛ a ’lɛ. Wo dan si lɛ wɛyi worona tɛrɛnu faa ta é ziin.

¹² ’Kaa Étiopi munu, ka é ziin, anlé gwɔun é dan ka gyɛ lɛ.

¹³ An dan an bɛ soi lɛ yirinwana bɛbolazia, an dan Asiri tɛrɛ sɛrɛ lɛ, yé an dan Ninive kɛlɛ lɛ fɛna tété nya, wɛtɛrɛ valé bwi nya.

¹⁴ Trubɛ palunu é dan yia lɛ ana, wi gɔnɔ do donu lé. Valusanbla valé ’téli é dan yii lɛ alé kɔnwɛyili nwiin; siaa dérenu é dan we lɛ alé fɛnɛtinu ta. Fɛ sɛrɛlenu é dan kɛlɛ lɛ alé kɔnpa la, yé wo dan alé sɛdrɛyili feenu so lɛ.

¹⁵ Ginanafla lé ke bɛ; éé nyanaan éboma duaa, ’té éé a fé é bli gi léé: Maa, maa do kpen! Ka yua, é vo é ’bin nya, bwiiwinu yɔɔna lé. Munu faa lé wo dan gié lɛ a sɔnɔ, wo dan ’furu fɛn lɛ yé wo bɛ gɔɔn a ma.