Sofoni 1 - Kazambale lé Sebe Sauunu 1979

Bale lé webleyi

¹ Gakelebale dére ’ko fe Juda munu nwiinzan blɛn Amon be Jozias bléyi va. Gakelebale we fe Ézékia be Amaria be Gédalia be Kus be Sofoni lɛ léma:

² Gakelebale léma: Maa dan fɛ faa sɛrɛ lɛ tɛrɛ la.

³ Blaminu koo, winu koo, lagi mianénu valé wɛyi va pɔnu koo, mi saanfɛnu valé mi nyanénu koo, maa dan wo sɛrɛ lɛ tɛrɛ la. Maa dan blaminu kulu ga lɛ tɛrɛ la. A zo lé Gakelebale a fe.

⁴ Maa dan an bɛ mane lɛ Juda valé Jérusalɛm munu faa ma; maa dan Baal lé mi pɔnénu kulu ga lɛ fɛkona. Alé minisinu tɔ koo, a banmunu tɔ koo, an dan wo faa yi ga lɛ fɛkona.

⁵ Munu lé woo diaan ’wo bli ta kɔnnu nwiin lagifɛnu ’lɛ, munu lé woo diaan ’wo bli ta Gakelebale ’nyɔɔnle nya, ’té wo nwiinzan blɛn tɔ ’nyɔɔn‐an,

⁶ wo lé wo yara si Gakelebale la koo, wo lé wo ’ka maa Gakelebale naginian lo, ’té wo ’ka we laan an lee lo bɛ, maa dan wo faa kulu ga lɛ.

⁷ ’Ka tadɔ Mizan Gakelebale ’lɛ; naa, Gakelebale lé yi bɔ é pu, naa, Gakelebale élé saraka ma’lɛrɛ, élé sarakabofɛ blezannu si a va é kyɛn.

⁸ Gakelebale lé saraka boyi nya, maa dan we lɛdɔ lɛ minwiinzannu valé minwiinzan blɛnnu benu gi, é valé munu faa lé woo bɛn bɛ lé tɛrɛla sɔ zén‐é ’wo ta bɛ, wo nya.

⁹ ’Bɛ yi la, munu faa lé woo kɔnpa taboo fɔrɔle nya, maa dan we lɛdɔ lɛ wo gi, munu lé woo ’wozan lé kɔn faan dabliwe valé glawe nya bɛ, woo lé.

¹⁰ Gakelebale léma: ’Bɛ yi la, munu é dan siaa lɛ flagɔrɔ ’léé lé wa laama pɔgɔrɔ ’léé, ana; wo dan wuvɔ lɛ fla bɛ do la, yé di kiniémigiwe blɛn é dan kɛlɛ lɛ gɔpanénu nwiin.

¹¹ Makatɛs munu, ’ka dunnu ma. Naa, munu faa lé woo yaawoo turu, wo wo gyɛ; munu faa lé woo gɔɔli ma we kɛla, wo wo kulu ga.

¹² ’Bɛ yi la, maa dan Jérusalɛm gi fwi lɛ kyɛbɔnu nya an lee, yé munu lé wo ke é yiale wolé yialafɛnu ta flee, ’té wa fé wo bli gi léé, Gakelebale ’ka we zin kɛla lo, yé é ’ka a naané kɛla lo, maa dan we lɛdɔ lɛ wo gi.

¹³ Munu é dan ’wii lɛ wolé fɛ zinnu ta, yé wo dan wolé kɔnnu sɛrɛ lɛ. Wo dan kɔnnu dɔ lɛ, naa, wo ’ka dan nyana lɛ wo gi monomono lo. Wo dan dɔrɔféinu pa lɛ, yé wo ’ka dan ana dɔrɔ mini lɛ é dɛrɛ lo.

¹⁴ Gakelebale lé yi blɛn bɔ é pu. É bɔ é pu, é a biéna kelekele. Gakelebale lé yi a é dére wena, yé nyanazannu éé siaan klebledére nya.

¹⁵ Yi ’ko a Bale wɛwɛ dɔyi nya; é a we tɔntɔn bɔ mi ma yi valé gibɔrɔ pa mi ma yi nya; é a ’wiié fɛ ta yi valé fɛsɛrɛyi nya; é a gunu dɔra yi valé fɛna tié yi nya; é a lafu valé loluvɔyi nya.

¹⁶ É a yi lé woo béli fɛɛn, ’té woo siaan guli ma, fla plɛplɛnu valé flataginifɛna nwalenu ma, a yi nya.

¹⁷ Maa dan we tɔntɔn bɔ lɛ munu ma, yé wo dan tawo lɛ bélé yuɛwiizannu zo, wo wenyané kɛlɛ Gakelebale ma, azama. Maa dan wo nyɛ nwɛɛn lɛ bélé vungoi zo; maa dan wo wi nwɛɛn lɛ bélé bli zo.

¹⁸ Dé é a wolé gɔɔli nyaoo, dé é a wolé kyan nyaoo, ’bɛ ’ka dan wo si lɛ we gi Gakelebale wɛwɛ dɔyi nya lo. Alé maawole lé ke bélé kyɛ zo, é dan tɛrɛ ’ko faa kyɛ ble lɛ a nya; naa, é dan munu faa gyɛ lɛ fiaa, azama.