Wegɔné Ma Lɛrɛ 8 - Kazambale lé Sebe Sauunu 1979

¹ Oo, dé i vo an bwe nya kɔɔn, ’Té i an bu nyɔ mini, ’Té ko kee i nya béera, ’té maa pwɛpwɛ vɔ i ma. Yé wo ’ka dan wo nyé yéli lɛ an ma lo.

² É sɔ an lɛ léé, an go i nya an bu lé kɔn ’léé; Yé i dan we paa lɛ an gi, Yé maa dan dɔrɔ gin nénézan nɔ lɛ i lɛ, Anlé grénadéyili ’yi dɛrɛ lé.

³ ’Té a bɛbo a é plale an ’wuo wuo, ’Té a bɛyi a é vɔle an zi. —

⁴ Jérusalɛm lomu, an bɛgi vɔ ka lɛ, Té ka an sɔlɛzan vuo looo lo, Té ka a vuo é vuobléyi ’lɛ lo.

Lɛrɛ suiɛdozan

⁵ De ɛ ke sina bwi gi bɛ, ’Té é a é tɛnle é sɔlɛzan maa? — Maa i vuo pɔmeyili wuo, ’Bɛna lé i bu i yaa, ’Bɛna lé é i yaa, yé i yi vinin ye. —

⁶ An we ’é kɛlɛ i bli gi blɛn, ’I an gyɛ pɔɔ nya i bɛ la; Naa, sɔlɛle a plɛplɛ bélé gale zo, Maawole mi va a yuyu bélé migale nyanana zo; A fuu a a ta, bélé kyɛ lé, Bélé Gakelebale lé kyɛnɛnɛ zo.

⁷ ’Yi blɛnnu ’ka bɔa sɔlɛle kinile lɛ lo, Yuunu ’ka a ta yɔɔan lo; Dé mi élé kɔngifɛnu faa nɔ, sɔlɛle yele we ma, Wo dan nyé yéli lɛ a ma é pla.

⁸ Ko zuané le do ana, A nyɔ ’ka tan lo; Dé wo da ko zuané ma laa lɛ yian nya, Ko dan alé we kɛlɛ lɛ kaa?

⁹ Dé é kɛlɛ gɔrɔ nya Ko dan gɔɔlifu dɔ lɛ a ta loru, Dé é kɛlɛ kɔn ’léé nya, Ko dan a lɛ tan lɛ sɛdrɛyili nya. —

¹⁰ Maa a gɔrɔ nya, Yé an nyɔ a a ta kɔn torole nya; Maa a a yuɛ gi mi lé é vole drɔɔ ye, a nya.

¹¹ Salomɔn lé dɔrɔféi do a Baal‐Aamɔn; É a bɛ pa é leezannu lee. Wo faa do do sikla gɔɔli nɔ a lɛ wuru soru alé féi mafɛ nya.

¹² Naa, anlé dɔrɔféi lé ke anzé nya, maa yuɛ pa a va anboan. Salomɔn, ilé sikla wuru soru ’é vo i lee, Yé féitabinzannu zé ’é kɛlɛ sikla wuru do. —

¹³ Nyanaféitazan, An béénu woo tɔné dɔa i dére lɛ, Bé kɛlɛ, yé ’maa i dére ’ma ma.

¹⁴ An sɔlɛzan, ’i fwi, ’I kɛlɛ bélé plɛn‐an zo, ’i kɛlɛ bélé vɔlɛ boroné zo, Gɔnu lé zianbla ginzan éé tin‐é a nwiin, ’bɛnu nwiin.