Wegɔné Ma Lɛrɛ 5 - Kazambale lé Sebe Sauunu 1979

¹ An buru, an bwɛ, an wɔra anlé féi, An mirélia valé bla ginzannu so, Maa anlé zɔrɔnyɔnɔ valé a yoduo ble, Maa anlé dɔrɔ valé nɔnɔ mini. — An béénu, ’ka ble, ’ka mini, sɔlɛle ’é ka gyɛ bélé nwɛ zo.

Lɛrɛ ziɛnzan

² Maa a yibla, naa, an bli a é vuole; Maa an sɔlɛzan dére ’ma kɔkɔ gyɛna: — É léé: An buru, an bwɛ, Anlé plala, anlé gun‐amalozan, ’i kɔn lɛ so an lɛ; Naa, fli vɔ an ’wuo ma, An nwin a é fanle lolu nya. —

³ Maa anlé varɔ si an ta; maa zén an ta kaa? Maa gane ma foli; maa wo tiri dɔa kaa?

⁴ An sɔlɛzan é bɛ wɔra fɛnɛti la, Yé a lɔrɔ zén an ta.

⁵ An nwa, kɔn lɛ sole an sɔlɛzan lɛ we ma; Yé an bɛ ma miré too, An bɛ ma miré zén Duoli lɛsofɛ ma.

⁶ An kɔn lɛ so an sɔlɛzan lɛ; ’Té an sɔlɛzan go é kwakwa, a ta san. É we fe an lɛ, naa, an dɔ dan‐uun é pla. Maa a gini, maa ’ka a ye lɛ lo; Maa a laa, yé é ’ka we lɛ an lɛ lo.

⁷ Flataginimunu lé woo giéan fla é béli, ko kee wo nya; Wo an bla, wo an tuo; Gɔrɔtabinzannu an ’wuo ma sɔ si.

⁸ Jérusalɛm lomu, an bɛ gi vɔ ka lɛ, Dé ka an sɔlɛzan ye, Ka dan a fe lɛ a lɛ nɔɔ? ’Ka fe a lɛ léé, a lɔrɔ vɔ an ma gyɛ nya. —

⁹ Le lé a nɔnɔmi mini lomu faa la, i sɔlɛzan mini gɔné bɛnu lɛ kaa? I sɔlɛzan mini gɔné kyɛn ɛ ta Yé i bɛ gi vɔa ko lɛ a zoo?

¹⁰ An sɔlɛzan a fu, anlé gbamblɛgɔné; É mini gɔné baa soru ta.

¹¹ A ’wuo a kyan tegele bozen nya; A nwin a grɔgrɔ É ti bélé vwiɛ kyɛɛ zo.

¹² A yuɛnu a bélé plawuonu lé wo ke é dɔle ’yiyorole gɔ la, ’Té wo wo zuru dirinyɔyi nya Yé wo yuɛwɔlɛnu a é fanle wo kɔlɛ nya bélé gɔlɛwezan zo.

¹³ A blinnu a bélé flɛri ginzan féi zo, Blaginzannu yiina lé; A lɔlu a bélé bolu lé goo zo, ’Té miré ’yi éé sié a va.

¹⁴ A bɛnu a bélé bɛmakyan zo, ’Té wo krisolitegɔlɛ vɔ a ma; A kɔlɛ a bélé vwii suiɛ lé wa ma gɔrɔla, a zo, ’Té wo safiigɔlɛ vɔ a ma.

¹⁵ A ganenu a bélé gɔlɛwezan fu wɛyili zo, ’Té wa é dɔrale kyan tegele bozen ta. É a é zima bélé Liban tɛrɛ lé A tɔ ke é bɔle sɛdrɛyilinu va, a zo.

¹⁶ A lagolo ma a néné saawo, É a mi faa ginanamazan nya. Jérusalɛm lomu, An sɔlɛzan, an bwɛ a yee ɛ zo. —