Wegɔné Ma Lɛrɛ 3 - Kazambale lé Sebe Sauunu 1979

¹ É béli, anlé yialafɛ ta, mi lé an bli bɔ a ma, maa a gini. Maa a nagini, yé maa ’ka a ye lɛ lo.

² Maa dan nwa lɛ, yé maa gié flaworo dii, Zinu valé fla vuun ta, Mi lé an bli bɔ a ma, maa dan a gini lɛ, Maa gini, yé maa ’ka a ye lɛ lo.

³ Fla taginimunu lé woo fla zi lɛ sɔɔan, ko kee wo nya; Maa laa wo lee léé: Mi lé an bli bɔ ma, ka a yee?

⁴ Ko gié é ke la tɔɔn, yé maa an sɔlɛzan ye; Maa a kun yé an ’ka daan lɛ a ma lo, Fɔɔ yé maa go a nya an bu lé kɔn gi, Mi lé é an bɔn si, a yiikɔn gi. —

⁵ Jérusalɛm lomu, an bɛgi vɔ ka lɛ Zoro valé bwi gi vɔlɛ tɔ nya, Té ka an sɔlɛzan vuo looo lo; Té ka an sɔlɛzan vuo é vuobléyi ’lɛ lo. —

Lɛrɛ yaazan

⁶ Mi lé ke sina bwi gi bɛ, de léé? É a bélé kyɛgoi pɔrɔlɔ zo, Miré valé lasikɔrɔpo koo, Yaawomunu lé fɛginzannu koo, wo goi méléna.

⁷ Salomɔn kɔné siégiblin lé, ’Té a zi lɛ a é sɔɔle nyanazannu yɔ yaa nya, ’Té wo mini Izraɛl nyanazannu faa la.

⁸ Gulidan gwɔun a wo faa lee, ’Té wo gulidanle dɔɔ é baba; Wo faa do do lé gwɔun a wo bin la, Dé we é da bɔ é béli.

⁹ Minwiinzan Salomɔn ’é kɔné siégiblin kɛlɛ Liban tɛrɛ la yilinu nya.

¹⁰ É a sangiyilinu kɛlɛ gɔɔlifu nya, É ’é koli tɛngifɛ kɛlɛ kyan nya. A nyanatafɛ a galunaa sɔ nya; Salomɔn sɔ Jérusalɛm lomu lɛ, Amalé wo alé blingisɔ nyɔɔ gyɛ.

¹¹ ’Kaa Siɔn lomu, ’ka bɔra, ’Ka nwiinzan Salomɔn nagini, Alé tɔkoro lé a bu a wo a ’wuo ma Alé lesiyi la, A ginanayi nya, ’ka nagini. —