RUT (Ruth) 4 - Kazambale lé Sebe Sauunu 1979

Boaz Rut si é na nya

¹ Boaz go flagɔrɔ ’léé yé é nyana. Yé bé ye, mi lé mi tabose ke a lɛ, ’té Boaz alé we fe bɛ, é a giéna. Boaz lé a lɛ léé: ’I da, ’i nyana.

² Yé é da yé é nyana. Boaz flami segelenu va mi vu laa, yé é léé: ’Ka nyana ’ko. Yé wo nyana.

³ ’Bɛ zuo é lé gɔné lé mi tabose ke a lɛ, a lɛ léé: Naomi si Moab tɛrɛ la yé tɛrɛ kunu lé ke ko bwe Élimélɛk zé nya, é a danna.

⁴ É a an gi léé, maa a zuo fe i lɛ yé maa lé i lɛ léé: Bé lɔ, flamunu ’ko valé anlé mi segelenu yuɛ va. Dé é sɔ i lɛ bé tabo, bé kɛlɛ; naa, dé é ’ka sɔ lɛ i lɛ lo, bé fe an lɛ yé maa a gi dɔɔ. Naa, mi do ’ka i ’lɛ a tabona lo, yé maa a i é zuo. Yé é a zi pa léé: Maa dan a tabo lɛ.

⁵ Boaz léé: Yian nya lé i féi ’ko si Naomi lee, a yi duo nya lé i dan gazan na Moab le Rut si lɛ, gazan tɔ vole élé zaratɛrɛ ta we gi.

⁶ Mi lé mi tabose ke a lɛ, é a zi pa léé: An ’ka bɔa a tabole lɛ anzé nya lo, dé an da anbozen zara sɛrɛ; an ’ka bɔa a tabole lɛ lo, amalé a tabose a i lɛ ibo zé nya.

⁷ É vinin, Izraɛl munu va, dé mi tabowe léé, dé fɛ tavɔɔwe léé, mi do élé sawala sié yé é a nɔ mi koɛ lɛ we ’wuo plale tɔmase nya; ’bɛ ɛ ke wenayefɛ nya Izraɛl va.

⁸ Mi lé mi tabose ke a lɛ, é lé Boaz lɛ léé: Bé si ibo zé nya. Yé élé sawala si é gane ma, yé é a nɔ Boaz lɛ.

⁹ Yé Boaz lé mi segelenu valé mi faa lɛ léé: Ka a wenayezannu nya kyɔ léé, fɛ faa lé ke Élimélɛk koo, Kilijɔn koo, Maklɔn koo, wozé nya, maa a si Naomi lee,

¹⁰ yé é ziin maa Maklɔn na Moab le si an na nya, gazan tɔ vole élé fɛnu ma we gi, té gazan tɔ é fwi é bwenu méléna lo; té a tɔ é fwi alé flagɔrɔ ’léé lo. Ka a anayezannu nya kyɔ.

¹¹ Munu faa lé wo ke flagɔrɔ ’léé valé mi segelenu léé: Ko a anayemunu nya. Lezan lé é wɔra ilé kɔn gi, Gakelebale ’é a kɛlɛ Rasɛl valé Léa lé wo Izraɛl fan, wo zo. ’Ilé plɛplɛ nagɔɔn Éfrat ma, yé i tɔ ’é kɛlɛ blɛn Bɛtléɛm ma.

¹² I kulu lé Gakelebale é dan a nɔ lɛ i lɛ le ’ko ma, ’wo ilé kɔn kɛlɛ bélé Pérɛs lé Juda a yaa Tamaa ma, alé kɔn zo.

Boaz kulunu

¹³ Boaz Rut si é na nya yé é go a va. Gakelebale zin kɛlɛ a lɛ yé é bɔn si yé é négɔné yaa.

¹⁴ Lomu lé Naomi lɛ léé: Gakelebale lé é ’ka a nyi si lɛ léé, i vuru mi tabozan ma lo, ’wa drɔɔ vo ma. A tɔ ’é kɛlɛ blɛn Izraɛl gi ma.

¹⁵ Né ’ko é dan i léli fuu dɔ lɛ ’é ta, yé é dan kɛlɛ lɛ i pazan nya ilé kwa ta gi; naa, i be na lé i sɔ a lɛ yé a fila vɔ i lɛ é mini négɔné sɔrafié ta, yee ɛ a yaa, azama.

¹⁶ Naomi né si yé é a pa é blinii yé é kɛlɛ a pazan nya.

¹⁷ A bɔlunu tɔ pa a ma a fele nya léé: Wo négɔné yaa Naomi lɛ. Yé wa laama Obɛd. É a Izai ti nya yé Izai a David ti nya.

¹⁸ Pérɛs kulu lo:

¹⁹ Pérɛs Esrɔn yaa; Esrɔn Raam yaa; Raam Aminadab yaa; Aminadab Nasɔn yaa;

²⁰ Nasɔn Salmɔn yaa;

²¹ Salmɔn Boaz yaa; Boaz Obɛd yaa;

²² Obɛd Izai yaa; yé Izai David yaa.