RUT (Ruth) 3 - Kazambale lé Sebe Sauunu 1979

Rut ézé gɔné ye

¹ Rut zana bu Naomi lé a lɛ léé: An lu, maa a a va léé, maa i nyanana gini, i gi nanale we ma.

² Naa sin, Boaz lé i ke a wuolomu va bɛ, ko gɔnɔlazan kaan loo? Bé ye, é dan ’sa fɛɛ lɛ é béli ’ko ’sa sunwona.

³ ’I zuru, ’i nyɔnɔ gié i ma, ’bɛ zuo ’i sɔ nɔnɔmi zén i ta yé ’i go ’sa sunwona. Té ibo nagɔɔn a lɛ lo fɔɔ ’té é fɛblele valé fɛ minile nyaa.

⁴ Yé dé é go yia lɛ, bé yiana gini. ’Bɛ zuo ’i go, ’i sɔ wuo vɔ a gane ma yé ’i yia ana. We lé é a lé bé kɛlɛ, yeebozen é dan a fe lɛ i lɛ.

⁵ É a zi pa a lɛ léé: We lé bé fe an lɛ, maa dan a faa kɛlɛ lɛ.

⁶ É go ’sa sunwona yé we lé a zana bu a fe a lɛ é a faa kɛlɛ.

⁷ Boaz fɛ ble yé é fɛ mini yé a gi nana. É go yia lɛ ’sazun zi zia. Rut da wɔɔɔ, é sɔ wuo vɔ a gane ma yé é yia.

⁸ Tu la, gɔné ’ko gi nyɛ blɛn kini. É nwa yé é a nagini, ’té le do a é yiale a gane ma.

⁹ É léé: Bii de léé? É a zi pa léé: Maa a i wuozan Rut nya; an tabose a i lɛ amalé ’i bɛ vɔ an zi.

¹⁰ É léé: An lu, Gakelebale ’é i drɔɔ vo ma. I ’ka go lɛ pɛniɛnu zuo lo, dé nyané wo gyɛoo, dé wo fua bleoo, i ’ka wo nagini lɛ lo, bɛwemalé we voéla ’ko, ’bɛ i ma we zin fé é mini a vininzan ta.

¹¹ Sin, an lu, té i kana lo ma; we lé bé fe, maa dan a faa kɛlɛ lɛ, naa, anlé flagɔrɔ ’léé munu faa a gi dɔɔ léé, i a le zin nya.

¹² Wezen lé, i tabose a an lɛ, naa, mi do a an ’lɛ.

¹³ ’I tu kini ’ko. Tɛlɛ, dé é sɔ ’bɛ lɛ léé, é i tabo, ’bɛ a é zima, ’é a kɛlɛ ma. Dé é ’ka sɔ lɛ a lɛ léé, é i tabo lo, maa dan a kɛlɛ lɛ. Gakelebale a é yuɛma. ’I vo é yiale fɔɔ yé bladi é pa.

¹⁴ É vo é yiale a gane ma fɔɔ tu kini, yé a nwabléyi va mi ’ka bɔa é bɔluzan dɔɔle lɛ lo. Boaz léé: Té wa gi dɔɔ léé, le do da ’sa sunwona lo.

¹⁵ Yé é lé lezan lɛ léé: ’I sɔ si i ta, bé fwila. É kun a ma yé é suo nya suiɛdo ’sa zén a gi. É a dɔ, yé é go fla.

¹⁶ Rut da é zana bu va yé Naomi léé: An lu, bii léé? Yé we faa lé gɔné ’ko a kɛlɛ ’bɛ lɛ, ’bɛ a zuo fe a lɛ.

¹⁷ É léé: É ’sa suo suiɛdo nɔ an lɛ a fele nya léé, i ’ka go i zana bu va i lee koro nya lo.

¹⁸ Yé Naomi léé: An lu, ’i nyana flee, fɔɔ yé we ’ko é dan nyaa lɛ fɛan zo yé bé gi dɔɔ. Gɔné ’ko ’ka dan flin lɛ kyɔ lo, ’té dé é ’ka we ’ko nyaa lɛ lo.