RUT (Ruth) 2 - Kazambale lé Sebe Sauunu 1979

Rut go Boaz lé féi

¹ Naomi zana lé mi do ana. É a gɔné plɛplɛ valé fuablezan nya; Élimélɛk gɔnɔlazan lé, wa laama Boaz.

² Moab le Rut lé Naomi lɛ léé: Ilé zanté, ’i zi nɔ an lɛ an go ’sagɔi sia, mian a nyanai é zén an ta, alé féi. É a zi pa a lɛ léé: An lu, ’i go.

³ É go ’sagɔi sia lɛ féi do la ’sagyɛmunu zuo, dɔlé ’té tɛrɛ fén ’ko a Boaz lé é ke Élimélɛk gɔnɔlazan nya, azé nya.

⁴ Yé bé ye, Boaz si Bɛtléɛm yé é lé ’sagyɛmunu lɛ léé: Gakelebale ’é kɛlɛ ka va ma. Wa zi pa a lɛ léé: Gakelebale ’é i drɔɔ vo ma.

⁵ Yé Boaz lé é wuozan lé ke ’sagyɛmunu nwiinzan nya, a lɛ léé: Lezan ’ko, de lu léé?

⁶ A wuozan lé ke ’sagyɛmunu nwiinzan nya, é a zi pa léé: Moab le boroné do lé wo si Naomi nya Moab tɛrɛ la, yee lé.

⁷ É lé ko lɛ léé, ’wo zi nɔ ’é lɛ ’é ’sagɔi sia yé ’é ’sanéné sia ’sa’pɛɛnu méléna ’sagyɛmunu zuo. É sia a dabléyi va bladi fɔɔ bléyi ’ko va é a é dɔle é gane la. Dé é ’ka bléyi sɛné nya lo, é ’ka tan flin lɛ lo.

⁸ Boaz lé Rut lɛ léé: An lu, ’i tɔné dɔ an lɛ. Té i go ’sagɔi sia féi bɛ ta lo. Té i si ko ma baa lo, ’i vo an wuolomu va ma.

⁹ Dé wo go ’sagɔi sia lɛ fɛana ’i go wo va. Maa i ta béli dɔ an wuogɔnénu lee. Dé ’yiminilɔrɔ i gyɛ, bɔgi ’yi lé an wuomunu a tɔ, ’i go a mini.

¹⁰ É dia é bli la yé é ’wuo wɔra a gane wuo yé é lé a lɛ léé: Mɛmalé i nyanai zén an ta, yé maa lé an ke bɛn le nya, i an pa é zima ’bɛ zoo?

¹¹ Boaz a zi pa a lɛ léé: We faa lé bé kɛlɛ i zana bu lɛ i zana gale zuo, wa zuo fe an lɛ. Fɛan zo lé i si i ti koo, i bu koo, i yaatɛrɛ koo, wo zi, dale we gi munu lé i ’ka wo dɔɔ lɛ é kyɛn lo, wo va, wa fe an lɛ.

¹² Gakelebale ’é a lɛi kɛlɛ i lɛ ma; Gakelebale Izraɛl lé Bale lé, i da i ta yɔɔ lɛ a bɛ wuo, ’é i banwo tegele ma.

¹³ Yé é léé: Oo, anzan, ’an kɛlɛ le zin nya i yuɛ gi ma. I an tɔrɔ paa, yé i an bli ta dɔ plɛplɛ, dɔlé ’té an ’ka i wuolomu va le do nya lo.

¹⁴ Fɛblebléyi va, Boaz lé Rut lɛ léé: ’I bié, ’i buru ble, ilé buru kuru zua dɔrɔ tɔndɔle va. É nyana ’sagyɛmunu bɛ do la. Wo sɔnmlén sélile nɔ a lɛ; é fɛ ble yé é kan yé é a pɔné tadɔ.

¹⁵ ’Bɛ zuo é nwa ’sagɔi siale we gi. Boaz lé é wuomunu lɛ léé: ’É ’sagɔi sia ’sa’pɛɛnu méléna ma, té ka a gyɛ yara nya lo,

¹⁶ yé ’ka ’sanɛnɛ ke si ’sa’pɛɛnu va yé ’ka a dia kabo yuɛ va alé a siale we ma. Té ka a sɔnɔ lo.

¹⁷ É ’sagɔi sia féi fɔɔ nyanadi pa, yé ’sagɔi lé é a sia é a zɔn. Éé ’sa vlekyɛɛ nya do bɔa.

¹⁸ É a sia yé é go fla yé ’sagɔi lé é a sia bɛ, a zana bu a ye. Alé fɛblele pɔné lé é a tadɔ bɛ, é ’bɛ bɔra yé é ’bɛ nɔ ’bɛ lɛ.

¹⁹ A zana bu lé a lɛ léé: I ’sagɔi sia fɛ kyɛnna kyɔɔ? I nyanama pa fɛ kyɛnnaa? Mi lé é we zin kɛlɛ i lɛ, ’wa drɔɔ vo ma. Yé Rut é zana bu bɔn‐in kini mi lé é nyanama pa a va, alé we ma. Yé é léé: Mi lé maa nyanama pa alé fɛna kyɔ, wa laama Boaz.

²⁰ Naomi lé é be na lɛ léé: Gakelebale lé a nyanai éé zén‐é mi yuɛmalenu ta bélé fɛan zo lé é a zén mi galenu ta, a zo bɛ, ’é a drɔɔ vo ma. Naomi lé a lɛ é ziin léé: Mi ’ko a ko gɔnɔlazan nya. Munu lé ko tabose ke wo lɛ, é a wo va mi do nya.

²¹ Moab le Rut we taa fe yé é léé: É lé an lɛ é ziin léé, ’an vo ’é wuomunu va fɔɔ yé wo alé fɛgyɛle faa nyaa ma.

²² Naomi lé é be na Rut lɛ léé: An lu, é a é zima léé, i go a wuolomu va, yé té wo i ye féi bɛ ta lo.

²³ Amalé é vo Boaz wuolomu va ’sagɔi siale we gi, fɔɔ yé ’sagyɛle valé buruwɔlɛ gyɛle nyaa. ’Té é a é nyanale é zana bu va.