RUT (Ruth) 1 - Kazambale lé Sebe Sauunu 1979

Élimélɛk go Moab tɛrɛ la

¹ Weblezannu bléyi va, lɔrɔ dɔ Izraɛl tɛrɛ la. Mi do si Bɛtléɛm, Juda tɛrɛ la, é na valé é be fiénu nya é va, nyanale sɛ we gi Moab tɛrɛ la.

² Wo gɔné ’ko tɔ laama Élimélɛk, a na tɔ lé Naomi, a be fiénu tɔ lé Maklɔn valé Kilijɔn; wa Éfrat munu nya yé wo si Bɛtléɛm, Juda tɛrɛ la. Wo bɔ Moab tɛrɛ la yé wo nyanana kɛlɛ ana.

³ Naomi zana Élimélɛk ga yé é vo é be fiénu lee.

⁴ Wo le si Moab lomu va, wa do na tɔ laama Ɔɔpa, yé wa koɛ na tɔ laama Rut, yé wo nyana ana, dé lɛɛ vu léé? a nya.

⁵ Maklɔn valé Kilijɔn ga é ziin yé Naomi vo é be fiénu valé é zana pa gi.

Naomi valé Rut da wo pai

⁶ ’Bɛ zuo Naomi a ’ma Moab tɛrɛ la léé, Gakelebale da élé munu va yé é fɛblele nɔ wo lɛ, amalé é nwa, yee valé é benu nanu nya, sile Moab tɛrɛ la we gi.

⁷ Fɛana lé é nyana, é si ’bɛna é benu nanu fiénu nya é va, yé é zi sia nɔlale Juda tɛrɛ la we gi.

⁸ Yé Naomi lé é benu nanu fiénu lɛ léé: ’Ka go ka pai ka bunu va. Gakelebale ’é we zin kɛlɛ ka lɛ ma, fɛan zo lé ka kɛlɛ munu lé wo ga bɛ, ’wo valé maa lɛ, a zo ma.

⁹ Gakelebale ’é flinle nɔ ka lɛ do do gɔnénu lé ka dan wo si lɛ, wolé kɔn ’léé ma. Yé é pwɛpwɛ vɔ wo ma. Wo dére bié yé wo wuvɔ,

¹⁰ yé wo lé a lɛ léé: Gba, kaa dan go lɛ ilé munu va.

¹¹ Naomi léé: An lunu, ’ka diéra. Mɛmalé ka dan da lɛ an zuoo? Gɔné bɛ a an bɔn gi yé wo bɔa kɛlɛle lɛ ka zananu nyaa?

¹² An lunu, ’ka diéra, ’ka go. Maa a segele bosile ma. Yé dé maa fe léé, an bli a néyaale lɛ, dé maa a an zana va kyɔ, dé maa négɔnénu yaa,

¹³ ka dan wo lɛbɛn lɛ fɔɔ yé wo tiin? Ka dan sɔn vɔ lɛ bosile ma wolé we maa? An lunu, gba! Kalé we ma lé an bli kyɛ dɔ léé, Gakelebale ’ka dɔ lɛ an zi lo.

¹⁴ Wo dére bié wuvɔle nya é ziin. Ɔɔpa pwɛpwɛ vɔ é zana bu ma, naa, Rut é buvɔ a ma.

¹⁵ Naomi lé Rut lɛ léé: Bé ye, i vla go é pai élé munu valé élé balenu va; ’i diéra bélé i vla zé zo.

¹⁶ Rut lé a lɛ léé: Té i an si i ma gla nya lo, té an si i ma baa lo. Fɛana lé i dan go lɛ, ana lé maa dan go lɛ; fɛana lé i dan nyana lɛ, ana lé an dan nyana lɛ; ilé munu é dan kɛlɛ lɛ anlé munu nya, izé Bale é dan kɛlɛ lɛ anzé Bale nya;

¹⁷ dé i ga fɛana, ana lé an dan ga lɛ, ana lé wo dan an pa lɛ. Dé é ’ka ga do kpen nya lo, dé fɛ bɛ maa valé bii kini ékema, Gakelebale ’é lɛdɔ an gi élé plɛplɛ faa nya ma!

¹⁸ Naomi a ye aan wo léé, é dɔ a gi léé, ’é go ’é va, é daan a ma kyɛdɔle ma.

¹⁹ Wo go ékeva fɔɔ yé wo bɔ Bɛtléɛm. Wo bɔ Bɛtléɛm aan wo fla bɔ gyɛ wolé we ma yé lomu léé: Naomi léé?

²⁰ É lé wo lɛ léé: Té ka an laa Naomi lo; ’ka an laa Mara. Plɛplɛfaazan an ’léé kɛlɛ é nyanale, azama.

²¹ An go bléyian va, ’té maa a é fanle, yé Gakelebale da an nya é ziin an lee koro nya. Gakelebale si an zuo, yé ’bɛ zuo Plɛplɛfaazan nyané pa an ta, mɛmalé ka an laan Naomi?

²² ’Bɛ zo lé Naomi valé é be na Moab le Rut si Moab tɛrɛ la. Yé wo da Bɛtléɛm ’sa gyɛle pélisia bléyi va.