Rom munu 9 - Kazambale lé Sebe Sauunu 1979

Kazambale Izraɛl si a va

^1-2 An gi kyɛ éé dɔa é baba, ’té an gi bɔrɔan yifaama. Maa a Krist gi, amalé maa webozen fé, yé Léli Sauun anlé wevasibli gi kini léé, maa ’ka vié wona lo.

³ É vo sɛ yé é sɔ an lɛ léé, an kɛlɛ balepamazan nya yé an si Krist gi an bwenu lé we ma. Dé é a tɛrɛlawe nya, wa an lelenu nya.

⁴ Wa Izraɛl munu nya; wo ɛ ke Kazambale lé né bozennu nya; wo ɛ Kazambale lé fuasan ye; Kazambale é gi pa do wo ɛ va; Kazambale bélidɔwe nɔ wo ɛ lɛ; wo ɛ Kazambale bɔ é bangikɔn gi; Kazambale blivolɛdére fe wo ɛ lɛ;

⁵ Abraamnu a wo ɛ tranu nya, yé dé é a Krist lé tɛrɛlakɔlɛ lé we nya, wo ɛ kululazan lé, Krist lé ke fɛnu faa nwiin, ’té é ke Bale lé a drɔɔ ke é vole lɛɛfaama, a nya, wo ɛ kululazan lé. Amɛɛn.

⁶ É ’ka kɛlɛ lɛ léé, Kazambale dére ’lɛ ka lo lo; naa, munu lé wo ke Izraɛl kulu nya, wo faa ’ka Izraɛl bozen nya lo,

⁷ yé wo faa ’ka Abraam lé nénu nya wo kɛlɛle a kulu nya we ma lo; naa, é a sɛbɛ gi léé: Wo dan Izak lé nénu laa lɛ, i kulu.

⁸ ’Bɛ gi léé, é ’ka kɛlɛ lɛ léé, nénu lé woo wo yaan tɛrɛlamunu yaabɛ gi, wo ɛ ke Kazambale lé nénu nya lo; naa, nénu lé woo wo yaan blivolɛdére yɛrama, woo wo ɛ yé Abraam kulu nya.

⁹ Ka ye, blivolɛdére lé ke ’ko: Maa dan da lɛ lɛɛ bɛ gi bléyi ’ko duo nya yé Sara é dan négɔné yaa lɛ.

¹⁰ Yé ’bɛ saa kaan lo. Rébéka be fiénu ti a do. Yee lé ke ko tra Izak nya.

^11-12 Kazambale lé mi va?-?vobɛ lé ke ’ko: é ’ka mi sié a va wo kɛlɛwenu ma lo, éé wo laan é wo. ’Bɛ lé we ma lé, dé Rébéka ’ka tan nénu ’ko yaa lɛ lo, ’té nénu ’ka tan wenyané valé wezin kɛlɛ lɛ lo, Kazambale lé Rébéka lɛ léé, a vininzan é dan pla lɛ é zuané wuo. ’Bɛ a gɔɔn léé, Kazambale dɔ ézé ta tegele.

¹³ É a é gyɛle Bale lé sɛbɛ gi a zo, léé: Jakɔb sɔ an lɛ Yé Ézau za a an gi. We ’ko kɛlɛ, we lé Kazambale a kɛlɛ é kyɛn, a dɔle gligli we gi; yee lé ke léé, dé Bale a munu vabona, é ’ka munu sié a va wo kɛlɛwenu ma lo, Bale lé éé mi laan, éé munu sié a va ébozen lé blibɔmale nya.

¹⁴ Bɛwemalé ko dan mɛ we fe lɛɛ? Kazambale éé weple kɛlaa? Gba!

¹⁵ Naa, é lé Moizi lɛ léé: Mian an nyanai éé zén‐é a ta, a ta lé an nyanai é dan zén lɛ. Yé mian an bli ke a ma é zin, a ma lé an bli é dan kɛlɛ lɛ é zin.

¹⁶ Bɛwemalé we ’ko ’ka sié mi lé a we sɔ a lɛ, azan va lo, yé é ’ka sié mi lé é a ma kwa kulian, azan va lo, naa, Kazambale lé, a nyanai éé zén‐é, a va lé éé sié.

¹⁷ Naa, Kazambale lé sɛbɛ lé Faraɔn lɛ léé: Maa i kɛlɛ blɛn, léé, maa anlé plɛplɛ nagɔɔn ilé we gi, yé an tɔ ’é kɛlɛ gyéiin tɛrɛ faa la.

¹⁸ Bɛwemalé, dé é sɔ Bale lɛ léé, ’é nyanai zén mian ta, ’bɛzan ta lé éé a zén‐é, yé dé é sɔ a lɛ léé, ’é mian tɔné gi kɛlɛ plɛplɛ, ’bɛzan lé é a tɔné gi kɛla plɛplɛ.

¹⁹ I dan a fe lɛ an lɛ léé: Mɛmalé éé we dɔa mi nwiin é ziin? Mi kyɛn ɛ sɔn vɔa alé blibɔmawe maa?

²⁰ Gba, bii blami, de ɛ ke bii nya za vɔna Kazambale vaa? Bɔ a fé é dɔzan lɛ léé: Mɛwemalé i an dɔ ’ko zoo?

²¹ Bɔdɔzan ’ka bɔtɛrɛzan nya loo? Dé é sɔ a lɛ léé, é bɔtɛrɛyɔɔ si yé é bɔ tɔbɔle dɔ a ke nya yé é bɔ pla dɔ a ke nya, a leewe kaan loo?

²² Yé dé é sɔ Kazambale lɛ léé, élé bliflile valé élé plɛplɛ nagɔɔn, yé bliflimabɔnu lé é wo dɔ wo sɛrɛle we gi bɛ, dé é ’wuo dɔ wo wuo bli tiéé baba nya, a leewe kaan loo?

²³ Yé dé é sɔ a lɛ léé, élé fuasan tɔbɔle nagɔɔn nyanaizénlabɔnu lé é wo dɔ é kyɛn fuasan ’ko lé we ma, wo lɛ, a leewe kaan loo?

²⁴ ’Bɛ gi léé, kaanu. É sɔ a lɛ léé, élé fuasan nagɔɔn kaa ɛ lɛ. É ko laa Juifinu méléna; ’bɛ saa kaan lo, é ka laa bɛn bɛnu méléna é ziin,

²⁵ bélé fɛan zo lé é a fe Ozé lé sɛbɛ gi, a zo, léé: Munu lé wo ’ka anlé munu nya é kyɛn lo, maa dan wo laa lɛ anlé munu, Yé wo lé wo ’ka an blibɔmamunu nya é kyɛn lo, maa dan wo laa lɛ an blibɔmamunu;

²⁶ Yé fɛana lé wa fe munu lɛ léé: Wo ’ka anlé munu nya lo, Ana lé wo dan wo laa lɛ Bale yuɛmale benu.

²⁷ Ézai é ziin, é siaa Izraɛl lé we ma, léé: Dé Izraɛl benu ’léé kɛlɛ wɛyi ma nyéné zo, A ’léé kiéné ɛ dan si lɛ we gi.

²⁸ Naa, wean Mizambale ke a va léé, ’é a kɛla tɛrɛ la, É dan a kɛlɛlɛ lɛ sɔɔ lɛ ’té, ’té é nyaa.

²⁹ Yé fɛan zo lé Ézai a fe é kyɛn, é kɛlɛ a zo. É léé: Dé Sunyanuzan ’Ka ko kulu sɛné vo lɛ ana lo, ’Té ko kɛlɛ bélé Sɔdɔm zo, ’Té ko valé Gɔmɔɔ munu a é bɔle ékema.

Izraɛl valé Wenéné

³⁰ Bɛwemalé, mɛ we lé ko féé? Bɛn bɛnu lé, wo ’ka kɛlɛle tegele naginina é vinin lo, wo kɛlɛ tegele; kɛlɛle tegele lé éé sié blipale va, yee lé wa ye;

³¹ yé Izraɛl a kwa kulina léé, ’wo bélidɔwe do ye yé ’wo kɛlɛ ’bɛ nya tegele, yé wo ’ka a ye lɛ lo.

³² Mɛwemaléé? Wo ’ka a nagini lɛ bélé éé sié blipale va lo, wa nagini bélé éé sié wo kɛlɛwenu va, azama. Misaangɔlɛ wo saan,

³³ we lé é ke é gyɛle Bale lé sɛbɛ gi, a yɛrama; wo léé: Ka ye, maa misaangɔlɛ plaan Siɔn gɔ nwiin; Yee lé ke midiéragɔlɛ nya; Naa, mian é bli vo a lɛ, yara ’ka dan a gyɛ lɛ lo.