Rom munu 8 - Kazambale lé Sebe Sauunu 1979

Kazambale Léli éé goo mi nya fɛan zo

¹ Amalé sin, we do kpen ’ka é dɔle Jézu Krist gimunu nwiin lo.

² Naa, Kazambale Léli lé bélidɔwe lé éé mi bélié Jézu Krist gi, é an si wenyané lé bélidɔwe valé ga wuo.

³ Kaa dɔbɛ kyɛn bélidɔwe tua, amalé we lé bélidɔwe ’ka bɔa a kɛlɛle lɛ lo, Kazambale a kɛlɛ. É a kɛlɛ fɛan zo, yee lé ke ’ko: ébozen Be pa zia wenyané ma ban nya kɔlɛ lé é ke bélé kaalé wenyanékɔlɛ zo, a gi; ’bɛ kɛlɛlɛ nya lé é wenyané lɛgama mi dɔbɛ kyɛn gi.

⁴ É we ’ko kɛlɛ bélidɔwe lé we tegele lɛ sɔɔle kaa gi we ma; kaa lé kaa ’ka tawoo kaa dɔbɛ kyɛn yɛrama lo, ’té kaa tawoo Kazambale Léli yɛrama bɛ, kaa gi.

⁵ Naa, munu lé woo tawoo ’wo dɔbɛ kyɛn yɛrama, woo gi bɔrɔan ’wo dɔbɛ kyɛn lé we ɛ ta, yé munu lé woo tawoo Kazambale Léli yɛrama woo gi bɔrɔan Kazambale Léli lé we ɛ ta.

⁶ Gibɔrɔle mi dɔbɛ kyɛn lé we nya, a ’wuo éé plaan ga nya, yé gibɔrɔle Kazambale Léli lé we nya ’wuo éé plaan bélile valé vole drɔɔ nya.

⁷ Naa, mi dɔbɛ kyɛn lé gibɔrɔle éé mi kɛla Kazambale nyanézan nya; mi dɔbɛ kyɛn ’ka dɔa Kazambale lé bélidɔwe la lo yé é ’ka bɔalɛ pelo, azama.

⁸ Amalé munu lé woo tawoo ’wo dɔbɛ kyɛn lé tawobɛ nya wo ’ka bɔa sɔle lɛ Kazambale lɛ lo.

⁹ Yé ’kaa, ka ’ka ka dɔbɛ kyɛn gi lo, ka a Kazambale Léli dɔbɛ gi, ’té dé Kazambale Léli a ka gi. Dé Krist Léli ’ka mian gi lo, ’té ’bɛzan ’ka azé nya lo.

¹⁰ Dé Krist a ka gi ’té ka kɔlɛ a é gale wenyané lé we ma, naa, ’té ka léli a é bélile Kazambale lé ka kɛlɛle tegele lé we ma.

¹¹ Mi lé é Jézu nwa gamunu va, dé ’bɛzan Léli a é nyanale ka gi, ’té mi lé é Krist nwa gamunu va é dan kalé gakɔlɛ béli lɛ é ziin, a Léli lé é ke é nyanale ka gi bɛ, a nya.

¹² Amalé, an bwenu, vɛɛn a kaa maa, naa, kaa dɔbɛ kyɛn lé vɛɛn kaan lo, yé kaa tawo alé blibɔmawe nya lo.

¹³ Dé ka tawo dɔbɛ kyɛn lé blibɔmawe yɛrama, ka dan ga lɛ; naa, ka kɛlɛwe naanénu lé wo ka kun, dé ka wo yi ga kabo lee Kazambale Léli lé plɛplɛ nya, ka dan béli lɛ,

¹⁴ naa, munu faa lé Kazambale Léli éé goo wo nya, wo ɛ ke Kazambale benu nya.

¹⁵ Yé ka ’ka luu bli ye lɛ yé ka kanaan é ziin lo, naa, mi né bozen bli lé ka a ye, a nya lé kaa siaan: Aba, ’bɛ gi léé, an ti.

¹⁶ Kazambale Léli bozen valé kaa léli dére a do léé, kaa a Kazambale lé nénu nya.

¹⁷ Dé kaa a alé nénu nya, ’té kaa a é ziin tɔnɔblezannu nya, Kazambale lé tɔnɔblezannu nya, tɔnɔblezannu nya Krist va, ’té dé kaa nyané ble a va, lagifua blele a va we gi.

¹⁸ É a an gi léé, wo ’ka bɔa lao klenu ’ko danle lɛ fua lé kaa dan a ble lɛ tɛlɛ tɛlama bɛ, a ma lo.

¹⁹ Kazambale kɛlɛfɛnu faa é ziin, wa Kazambale benu nagɔɔnle lɛbɛnna bli pɛpɛ nya.

²⁰ Gun a Kazambale kɛlɛfɛnu faa ma, wobozen pai kaan lo, Kazambale lé blibɔmawe lé.

²¹ Naa, duowo, wo bli a we do lɛ, yee lé ke léé, yi do nya sɛrɛwe é dan si lɛ wo ma yé wo dan vo lɛ woboma duaa, bélé fɛan zo lé Kazambale benu a woboma weboen nya fɛan zo, a zo.

²² Kaa gi dɔɔ léé, Kazambale kɛlɛfɛnu faa éé dunnuan, ’té woo nyané blé bélé né yaale lé kleblelenu zo, fɔɔ kyɔ yi nya.

²³ Yé wo saa kaan lo, naa, kaa lé kaa Kazambale Léli ’léé ye, kaa é ziin, kaa dunnuan kaa gi, ’té kaa kɛlɛle né bozen nya lɛbɛn‐é, ’bɛ gi léé, kaa kaa kɔlɛ tabole lɛbɛn‐é.

²⁴ Kaa bli kɛlɛle we lɛ nya lé kaa si we gi. Naa, blikɛlɛlɛfɛ lé wa yé, é ’ka blikɛlɛlɛfɛ nya é dɛrɛ lo; fɛ lé wa ye, mi é bɔalɛ léé, é bli kɛlɛ ’bɛ lɛɛ?

²⁵ Naa, kaa bli a fɛan kaa ’ka a yé lo, a lɛ, amalé kaa a a lɛbɛnna bli tiéé nya.

²⁶ A zo duo lé, fɛ lé é a lé kaa a laa bazorole nya, kaa ’ka a dɔɔa lo, amalé Kazambale Léli éé bɔa kaa va kaa tuale gi. Naa, Kazambale Léli bozen éé goo kaalé muun nya, dunnu?-?lenu lé wo gifedére ’ka lo, wo nya;

²⁷ naa, Bale lé éé kaa blinu naginian, we lé a Léli ke a fena, éé a gi maan; Léli Sauun éé goo Kazambale lé munu lé muun nya Kazambale va, Kazambale lé blibɔmawe yɛrama, azama.

Guliwuo vo ko lɛ gɔnɔ fié

²⁸ Yé kaa gi dɔɔ léé, munu lé Kazambale éé sɔa wo lɛ, ’té Bale wo laa ’é bɔn‐in danle yɛrama bɛ, we faa lé éé bɔa wo ma, Kazambale a nɔlaan wo ma wezin nya.

²⁹ Munu lé é wo dɔɔ ézé nya é vinin, é wo dɔ é kyɛn é Be bɔmazannu nya é ziin, a Be kɛlɛle né vininzan nya bwe kiɛre worona we gi.

³⁰ Yé munu lé é wo dɔ é kyɛn, é wo laa é ziin; yé munu lé é wo laa bɛ, é wo kɛlɛ tegele é ziin; yé munu lé é wo kɛlɛ tegele bɛ, é wo tɔ kɛlɛ blɛn é ziin.

³¹ Kaa fé we ’konu ma nɔɔ? Dé Kazambale a kaa va, de ɛ kɛla kaa maa?

³² Mi lé é ’ka ébozen Be tadɔ lɛ lo yé é a nɔ kaa faa lé we gi ’naan, é kɛla kaa yé é ’ka dan fɛnu faa nɔ lɛ zin nya kaa lɛ Jézu va é ta lé kɔn‐an loo?

³³ Munu lé Kazambale wo si a va ézé nya, de ɛ dan we dɔ lɛ wo nwiin? Kazambale ɛ mi kɛla tegele.

³⁴ De ɛ dan wo gyɛ lɛ we nyaa? Jézu Krist ga, ’bɛ ta loru yé é nwa é ziin; é a Kazambale bɛyila, ’té éé goo kaalé muun nya Kazambale va.

³⁵ Mɛ ɛ dan kaa si lɛ Krist lé sɔlɛle gii? Gibɔrɔpale lé laa, kleblele lé laa, nyané pale kaa ta lé laa, lɔrɔ lé laa, porole lé laa, gale lé laa, gwɔun lé laa, mɛ fɛ léé?

³⁶ Fɛan zo lé é a é gyɛle Kazambale lé sɛbɛ gi, a zo; wo léé: Ilé we ma lé woo ko gya bladi nyanadi, Yé woo ko yé bélé ’blanu lé wo dan go lɛ wo nya wi gyɛna, wo zo.

³⁷ Naa, we ’konu faa gi kaa a a ’wuo?-?volɛmunu nya gɔnɔ fié, mi lé kaa sɔ a lɛ, alé we ma.

³⁸ Maa gi dɔɔ é zima léé, ga koo, bélile koo, lanjenu koo, minwiinzannu valé plɛplɛnu koo, laofɛnu koo, fɛnu lé wo dan da lɛ koo,

³⁹ lagi plɛplɛ valé tɛrɛ va plɛplɛnu koo, kɛlɛfɛ bɛ koo, wo va fɛ do kpen ’ka bɔa kaa valé Kazambale lé sɔlɛle lé é ke é gɔɔnle Kaazan Jézu Krist gi, a kinile lɛ ékema lo.