Rom munu 7 - Kazambale lé Sebe Sauunu 1979

Lesile ma gɔnévɔle

¹ An bwenu, ’kaa lé ka bélidɔwe dɔɔ, maa a wefena ka ɛ lɛ. Ka ’ka a gi dɔɔa léé, bélidɔwe éé plaan mi nwiin mi yuɛma bléyi faa va loo?

² ’Ko zo lé, boflale a é yerele é zana ma bélidɔwe nya é yuɛma bléyi va; naa, dé a zana ga, ’té bélidɔwe lé ’bɛ a yere é zana ma bɛ, ’té ’bɛ a é sile a ma.

³ Amalé dé é kɛlɛ gɔné bɛ na nya é zana yuɛma bléyi va, wo dan a laa lɛ gɔnégini le; naa, dé a zana ga, ’té bélidɔwe a é sile a ma, yé dé é kɛlɛ gɔné bɛ na nya ’té é ’ka gɔnégini le nya lo.

⁴ A zo duo lé, an bwenu, ka é ziin, ka kɛlɛle Krist kɔlɛ va lé we ma lé ka ga bélidɔwe vazia, ka kɛlɛlɛ mi bɛ zé nya we ma, mian é nwa gamunu va, ka kɛlɛlɛ ’bɛzan zé nya we ma, Kazambale lé tɔnɔ yele kaa ma we gi.

⁵ Bléyian va lé kaa ke kaa dɔbɛ kyɛn nya, bélidɔwe éé wenyané kɔɔlenu ’léé wɛɛ?-?an kaa bli gi, yé woo nyanama paan kaa kɔlɛvafɛnu gi yé a tɔnɔ kɛlɛ kaa ma gale nya.

⁶ Sin, kaa ga bélidɔwe ’ko lé, é kaa kun luu nya, a vazia, yé kaa si a la, Kazambale bɔle é bɔbɛ dɛrɛ nya we gi, léli yɛrama, té kaa a bɔ sɛbɛ kwa yɛrama é ziin lo.

Wenyané nyanale mi gi lé we

⁷ Amalé kaa fé nɔɔ? Bélidɔwe a wenyané nyaa? Gba! Naa, dé é ’ka bélidɔwe nya lo, ’té an ’ka wenyané va sina dɔɔa lo. Dé bélidɔwe ’ka a fe lɛ léé, té i bli é bɔ fɛnu ma lo lo, ’té maa ’ka blibɔle fɛnu ma lé we gi dɔɔa lo.

⁸ Wenyané zi ye aan wo, yé é da blibɔle fɛ ma gɔnɔ faa nya an bli gi bélidɔwe lé we ma; naa, dé bélidɔwe ’ka lo, ’té wenyané a bélé fɛ gale zo.

⁹ É vinin, dé maa ’ka bélidɔwe la lo, ’té maa a é yuɛma; naa, bélidɔwe da aan wo, é a bélé fɛan zo lé wenyané vuo, yé an ga, a zo.

¹⁰ Yé bélidɔwe lé é a kɔɔn léé, ’é mi béli, é an gyɛ.

¹¹ Naa, wenyané zi ye aan wo, é dabli kɛlɛ an lɛ bélidɔwe nya yé é an gyɛ a nya.

¹² Bélidɔwe a plɛplɛ yé a sɔnnénu a plɛplɛ, wa tegele, wa é zima.

¹³ We zima éé kɛla an gyɛfɛ nyaa? Gba! Naa, we lé ke é zima, wenyané an gyɛ a nya, yé ’bɛna lé ébo nagɔɔn wenyané nya. ’Bɛ zo lé, wenyané a wenaané boen nya fɛan zo, bélidɔwe a nagɔɔn.

¹⁴ Kaa gi dɔɔ léé, bélidɔwe a léliwe nya; naa, maa a mi dɔbɛ kyɛn gi, é danle wenyané lee.

¹⁵ Wenu lé maa a kɛla, maa ’ka a gi maan lo; we lé é sɔ an lɛ léé, maa a kɛlɛ, maa ’ka a kɛla lo, yé we lé é ’ka sɔ lɛ an lɛ léé, maa a kɛlɛ lo, yee lé maa a kɛla.

¹⁶ Naa, we lé é ’ka sɔ lɛ an lɛ léé, maa a kɛlɛ lo, dé maa ’bɛ kɛla, ’bɛ gi léé, maa a nyi sié léé, bélidɔwe a é zima.

¹⁷ Dé é a ’bɛ zo, ’té ’bɛ gi léé, wenyané lé é ke an gi, yee ɛ ke we kɛlɛna, maa kaan lo.

¹⁸ Maa a gi dɔɔ léé, wezin do kpen ’ka an gi lo, ’bɛ gi léé, an dɔbɛ kyɛn gi lo; an bli bɔ wezin kɛlɛle ma, naa, a kɛlɛ plɛplɛ ’ka an lee lo.

¹⁹ Naa, wezin lé é sɔ an lɛ léé, maa a kɛlɛ, maa ’ka a kɛla lo, yé wenyané lé é ’ka sɔ lɛ an lɛ léé, maa a kɛlɛ lo, yee lé maa a kɛla.

²⁰ We lé é ’ka sɔa an lɛ léé, maa a kɛlɛ lo, dé maa ’bɛ kɛla, a kɛlɛzan ’ka maa nya é dɛrɛ lo, wenyané lé é ke an gi, ’té yee ɛ kɛla.

²¹ Amalé maa we do yé an gi bélé bélidɔwe zo. Yee lé ke léé, dé é sɔ an lɛ léé, maa wɛzin kɛlɛ tɔɔn, ’té wenyané bié an sɔnɔ.

²² Kazambale lé bélidɔwe sɔ an gi bli lɛ;

²³ naa, é a bélé fɛan zo lé bélidɔwe do a é ziin an kɔlɛvafɛnu gi; ’té ’bɛ bélidɔwe ’ko éé guli daan bélidɔwe lé é sɔ an bli lɛ, a va, yé é an kɛlɛ wenyané lé ke an kɔlɛvafɛnu gi bélé bélidɔwe do zo bɛ, alé luu nya.

²⁴ Nyanaizénlazan nya lé an ke! De ɛ dan an si lɛ gakɔlɛ ’ko lee?

²⁵ Kaazan Jézu Krist lé! ’Wo Kazambale bɔ vɔ ma. ’Ko zo lé maabozen, maa a Kazambale lé bélidɔwe lé luu nya anlé bɔn‐in bɔrɔle gi, naa, an dɔbɛ kyɛn gi maa a wenyané lé luu nya.