Rom munu 6 - Kazambale lé Sebe Sauunu 1979

Ko a é gale wenyané vazia, naa, ko a é bélile Krist gi

¹ Bɛwemalé kaa fé nɔɔ? Kaa vo wenyané kɛlɛna Bale lé zin kɛlɛle kiɛre we maa?

² Gba. Kaa lé, kaa ga wenyané vazia, é kɛlɛ kaa yé kaa vo wenyané kɛlɛna é ziin?

³ Ka ’ka a gi dɔɔa léé, kaa faa lé wo kaa batizéwo Jézu Krist gi, a gale gi lé wo kaa batizéwo loo?

⁴ Kaa ga wo nya yé Bale kaa pa wo nya, kaa batizéwole nya, léé, fɛan zo lé Ti lé plɛplɛ Krist nwa gamunu va, a zo duo lé kaa é ziin, kaa tawo tawobɛ dɛrɛ nya.

⁵ Dé kaa a Jézu nya do a gale gi, ’té kaa a wo nya do, a nwale gi gamunu va;

⁶ kaa gi dɔɔ léé, kaalé blami dɔbɛ a é gyɛle yili la Krist va, kɔlɛ lé wenyané ke nyanama pana a nya, a gale kaa ma we gi, léé, té kaa kɛlɛ wenyané lé luu nya é dɛrɛ lo;

⁷ naa, mian é ga, é a éboma wenyané vazia.

⁸ Dé kaa ga Krist va kaa bli vo a lɛ léé, kaa dan béli lɛ é ziin a va;

⁹ naa, kaa gi dɔɔ léé, Krist nwa gamunu va yé é ’ka gaan é dɛrɛ lo; yé ga ’ka é plale a nwiin é dɛrɛ lo, azama.

¹⁰ Naa, é ga yé wenyané ma lé é ga gɔnɔ do kpen bléyi faa zé nya; yé é béli é ziin, yé Kazambale zé nya lé é ke é yuɛma.

¹¹ A zo duo lé, kabozen, ’ka kabo ye é gale wenyané vazia yé ’ka kabo ye é yuɛma Jézu Krist gi Kazambale zé nya.

¹² Amalé té wenyané é pla kalé gakɔlɛ nwiin lo ma, yé té ka dɔ a blibɔmawenu nyi wuo lo ma.

¹³ Té ka ka kɔlɛvafɛnu nɔ wenyané lɛ weple kɛlɛfɛnu nya lo; naa, ’ka kabozen nɔ Kazambale lɛ, munu lé wo ke é gale é vinin yé wo béli, wo nya, yé ’ka ka kɔlɛvafɛnu nɔ Kazambale lɛ we tegele kɛlɛfɛnu nya ma.

¹⁴ Ka ’ka bélidɔwe la lo, ka a zin la, amalé wenyané ’ka dan pla lɛ ka nwiin monomono lo.

We tegele lé luunu

¹⁵ É dɔ ka gi kaa? Kaa ’ka bélidɔwe la lo, kaa a zin la, bɛwemalé kaa dan wenyané kɛlɛ lɛɛ? Gba.

¹⁶ Ka ’ka a gi dɔɔa léé, dé ka kabo nɔ mi do lɛ luu nya a lɛdɔmale we gi, mi lé ka a lɛdɔama, ka a ’bɛlé luu nya loo? Wenyané lé a ’wuo éé plaan ga nya, dé kabo nɔ ’bɛ lɛ, ka a ’bɛlé luu nya; yé Bale lɛdɔmale lé a ’wuo éé plaan kɛlɛle tegele nya, dé kabo nɔ ’bɛ lɛ, ka a ’bɛlé luu nya. Ka ’ka ’bɛ gi dɔɔa loo?

¹⁷ ’Wo Kazambale bɔ vɔ léé, Bale lé we lé wa paa ka gi, ka alé bélidɔwe lɛdɔma ka bli faa nya, dɔlé té ka a wenyané lé luu nya é vinin.

¹⁸ Ka si wenyané lee yé ka kɛlɛ we tegele lé luu nya.

¹⁹ Maa a wefena munu lé wefebɛ gi ka dɔbɛ kyɛn tɔɔtɔɔ lé we ma. Fɛan zo lé ka ka kɔlɛvafɛnu nɔ luu nya we tiridɔle valé weple lɛ, weple kɛlɛle we gi, a zo duo lé sin ’ka ka kɔlɛvafɛnu nɔ luu nya we tegele lɛ, kɛlɛle sauun we gi.

²⁰ Naa, bléyian va lé ka ke wenyané lé luu nya, ’té ka a kaboma we tegele vazia.

²¹ ’Bɛ bléyi va mɛ tɔnɔ ɛ ke ka maa? Tɔnɔ lé é ka gya yara nya sin, yee lé. Naa, we ’konu ’wuo éé plaan ga nya.

²² Naa, sin ka si wenyané lee yé ka kɛlɛ Kazambale lé luu nya, ’té ka ma tɔnɔ lé ke kɛlɛle sauun nya yé a ’wuoplana lé é ke vole é yuɛma lé a glɛ ’ka lo, a nya.

²³ Yé wenyané ma ban lé ke ga nya, naa, Kazambale lé blɛ pla lé ke vole é yuɛma lé a glɛ ’ka lo, a nya, Kaazan Jézu Krist gi.