Rom munu 5 - Kazambale lé Sebe Sauunu 1979

Kɛlɛle tegele ma tɔnɔnu

¹ Ko kɛlɛ tegele blipale ma, amalé ko nana sin Kazambale va, Kozan Jézu Krist lé we ma.

² Kolé blipale ma lé Jézu ko wɔra Bale lé zin ’ko lé, ko ke é dɔle a gi gligli ’ko, a gi, yé ko gi a nanana léé, ko bli a Kazambale lé fuasan yele lɛ.

³ Yé ’bɛ ta loru, ko gi a nanana kolé kleblelenu gi, naa, ko gi dɔɔ léé, kleblele éé dan yara pale we la nya,

⁴ yé yara pale we la éé guli ’wuo voo mi lɛ é gi danle gi, yé guli ’wuo vole ko lɛ ’ko, éé dan bli kɛlɛle fɛ lɛ nya,

⁵ yé bli kɛlɛle fɛ lɛ ’ka ko gya yara nya lo; Léli Sauun lé Bale a nɔ ko lɛ, é Kazambale lé sɔlɛle wɔra ko bli nya bélé nyɔnɔbɔ zo, azama.

⁶ Bléyian va lé zi do kpen ’ka kaa lɛ lo, Krist ga Kazambale lé zi ma wenyané femunu lé we ma, bléyi lé Bale a dɔ, a nya.

⁷ Mi éé gaan mi tegele lé we maa? Un, dé mi éé bli sié ébo lɛ yé é ga mi zin lé we gii?

⁸ Naa, Jézu zé ’ka ’bɛ zo lo. Bléyian va lé ko ke tan wenyanékɛlɛmunu nya, Krist ko gi ga wo; ’bɛ nya lé Kazambale a nagɔɔn léé, ko sɔ ’é lɛ webozen nya.

⁹ Ko kɛlɛ tegele sin a nyɛ nya ’naan, é ’ka dan ko si lɛ bliflile wuo é ziin loo?

¹⁰ Dé ko nana Kazambale va a Be gale lé we ma, bléyian va lé ko ke a nyanézannu nya, ’bɛ bléyi va ’naan, ko nanale a va zuo ’té a Be bélile ’ka dan ko si lɛ we gi loo?

¹¹ Yé ’bɛ saa kaan lo, naa, é ziin, Kozan Jézu Krist lé, Bale valé konu nana a ta, ko gi a é nanale Kazambale va alé we ma.

Adam valé Krist lé we

¹² We lé é bɔ, yee lé ke ’ko: mi do kpen ɛ da wenyané nya tɛrɛ la yé wenyané da ga nya, amalé munu faa éé gaan; munu faa éé wenyané kɛla, azama.

¹³ Bléyian va lé bélidɔwe ’ka tan lo, ’té wenyané a tɛrɛ la é kwakwa, naa, dé bélidɔwe ’ka lo, wo ’ka a sɛrɛwe dɔa mi nwiin lo.

¹⁴ É sia Adam bléyi va fɔɔ yé é bɔ Moizi bléyi va, ’té ga a mi nwiin duowo; dé munu ’ka wenyané kɛlɛ lɛ bélé Adam zé zo looo, ’té ga a mi nwiin duowo; yé Adam a mi lé é dan da lɛ bɛ, azan tɔmase nya.

¹⁵ Adam lé we sɛrɛle valé Kazambale lé blɛ pla ’ka bɔ lɛ ékema lo. Mi do lé we sɛrɛle ma lé mi kiɛre ga, naa, Kazambale lé zin valé blɛ lé mi do a kɛlɛ munu lɛ élé zin lé we ma, ’bɛ gi léé, Jézu Krist, ’bɛ kɛlɛ mi kiɛre kiɛre zé nya é minini.

¹⁶ É ziin, mi do lé wenyané kɛlɛle zuowe valé blɛ kɛlɛle zuowe ’ka bɔ lɛ ékema lo. Wenyané kɛlɛle zuowe ɛ ke weblele nya yé ’bɛ ’wuo pla welɛdɔle mi gi nya, naa, wenyané kiɛre kɛlɛle zuo Kazambale élé blɛ kɛlɛ yé ’bɛ ’wuo pla mi kɛlɛle tegele nya.

¹⁷ Mi do kpen lé we sɛrɛle ma lé ga a é dɔle munu faa nwiin yee mi do lé we ma, naa, munu lé Bale zin kɛlɛ wo lɛ kiɛre, yé é wo kɛlɛ tegele blɛ nya, wo dan vo lɛ é yuɛma yé wo dan pla lɛ munu nwiin Jézu Krist do kpen lé we ma. ’Bɛ néné ’ka mini lɛ loo?

¹⁸ Bɛwemalé, fɛan zo lé we dɔ munu faa nwiin wesɛrɛle do kpen lé we ma, a zo duo lé we tegele do kpen lé we ma, kɛlɛle tegele lé éé mi bélié, é da mi faa zé nya.

¹⁹ Naa, fɛan zo lé mi kiɛre kɛlɛ wenyanékɛlɛmunu nya mi do kpen lé milɛgamale we ma, a zo duo lé mi kiɛre é dan kɛlɛ lɛ tegele mi do kpen lé milɛdɔmale we ma.

²⁰ Naa, bélidɔwe da, léé, wesɛrɛle ’é kɛlɛ di, yé fɛana lé wenyané kɛlɛ di, ana lé zin kɛlɛ di é minini,

²¹ léé, fɛan zo lé wenyané pla munu nwiin gale nya, a zo duo lé zin éé plaan munu nwiin kɛlɛle tegele nya, yé a ’wuo éé plaan vole é yuɛma lé a glɛ ’ka lo, a nya, Kozan Jézu Krist lé we ma.