Rom munu 4 - Kazambale lé Sebe Sauunu 1979

Pɔl we ’ko gɔɔn Abraam lé we ma

¹ Amalé mɛ we lé ko dan a fe lɛ ko tra Abraam lé we maa?

² Dé é kɛlɛ léé, Abraam kɛlɛ tegele é kɛlɛwenu ma, ’té abo tɔbɔwe a kɔɔn, naa, a tɔbɔwe ’ka ana Kazambale yuɛ gi lo.

³ Naa, Kazambale lé sɛbɛ lé nɔɔ? É léma: Abraam bli vo Kazambale lɛ yé ’bɛ kɛlɛ a ma we tegele nya.

⁴ Yé mian éé nyanama paan wo ’ka a banwoo zin kɛlɛle nya lo, naa, wa yé léé, a banwo yara lé;

⁵ yé mian é ’ka dɔa a gi léé, ’é bélié élé nyanama ma lo, yé é bli voo mi lé éé Kazambale lé zi ma wenyané fezan kɛla tegele, ’bɛzan lɛ, a blipale éé kɛla a ma we tegele nya.

⁶ A zo duo lé, mian Kazambale a kɛlɛ tegele, ’té azan kɛlɛwenu ’ka a va lo, ’bɛzan zé a néné fɛan zo, David a nagɔɔn a fele nya léé:

⁷ Munu lé, Kazambale wo ma we vo wolé weplenu ma, Té wolé wenyanénu saan a gi, wozé a néné.

⁸ Mi lé Mizambale ’ka alé wenyané dɔa a nwiin lo, azé a néné.

⁹ Miginanawe ’ko, é a ganedɔmunu saa zé nya laa, taa, é a ganedɔlomunu zé nya é ziin? Naa, ko léma: Abraam lé blipale nɔla é ma we tegele nya.

¹⁰ É nɔla a ma we tegele nya bléyian va, ’té é a kaa? ’Té a gane a é dɔle laa, ’té a gane ’ka tan é dɔle loo? ’Té a gane ’ka tan é dɔle lo, ’té é a é pla.

¹¹ É ganedɔle ye tɔmase nya, kɛlɛ lé é a wo tegele élé blipale ma, ’té a gane ’ka tan é dɔle lo, a tɔmase nya. ’Bɛ zo lé, munu lé wo gane ’ka é dɔle lo, ’té wo bli a é pale, Abraam kɛlɛ wo faa ti nya, wo faa kɛlɛle tegele we ma.

¹² Yé é a ganedɔmunu ti nya é ziin. Ganedɔmunu lé wo ’ka a nya é pla lo, ’té wo bli ke é pale bélé fɛan zo lé Abraam bli ke é pale bléyian va lé a gane ’ka é dɔle lo, a zo, Abraam a wo ti nya é ziin.

Blivolɛdére lɛ éé sɔɔan blipale ma

¹³ Bale ’ka blivolɛdére fe lɛ Abraam valé é kulunu lɛ léé, wo dan tɛrɛ ye lɛ ’wozé nya bélidɔwe ma lo, naa, blipale lé éé mi kɛla tegele, ’bɛ ma lé wo dan a ye lɛ.

¹⁴ Dé é vo léé, bélidɔwe kɛlɛmunu ɛ tɛrɛ yé ’wozé nya, ’té blipale gi fena ’ka lo, ’té blivolɛdére vo é pla.

¹⁵ Naa, bélidɔwe éé dan bliflile nya yé dé bélidɔwe ’ka lo, a sɛrɛwe ’ka lo é ziin.

¹⁶ Amalé munu é dan kɛlɛ lɛ tɔnɔblezannu nya ’wozé blipale ma, léé, wa yé zin ma, yé blivolɛdére ’é kɛlɛ sɔbɛlawe nya Abraam kulunu faa lɛ, bélidɔwe kɛlɛmunu saa kaan lo, naa, munu lé wo bli ke é pale bélé Abraam zé zo, ’é kɛlɛ sɔbɛlawe nya wonu lɛ é ziin. Abraam a kaa faa ti nya, fɛan zo lé Kazambale lé sɛbɛ a fe, a zo;

¹⁷ é léé: Maa i kɛlɛ bɛn kiɛre ti nya. É a kaa ti nya Bale lé é bli vo ’bɛ lɛ, ’bɛ yuɛ gi, Bale lé éé migalenu bélié, yé fɛnu lé wo ’ka tan lo, éé wo laan bélé fɛan zo lé wo ana, a zo, ’bɛ Bale yuɛ gi.

¹⁸ We lé mi bli ’ka kɛla a yele lɛ lo, é bli kɛlɛ ’bɛ lɛ, yé é bli vo a lɛ yé é kinin bɛn kiɛre ti nya, wean Bale a fe a lɛ léé: I kulu é dan kɛlɛ lɛ a zo, a yɛrama.

¹⁹ A lɛɛ bɔ yɔ soru sɔnɔ amalé é ka é dɛrɛ gɔné nya lo, yé Sara lé né yaa bléyi gié, é ’bɛ gi dɔɔoo, alé blipale ta ’ka zana lɛ lo.

²⁰ Blivolɛdére lé Kazambale a fe a lɛ, é ’ka a fe lɛ léé, dé é kɛlaa? ɛɛ, dé é ’ka kɛla loo? é ’ka ’bɛ fe lɛ lo; naa, é dɔ plɛplɛ blipale nya, yé é Kazambale tɔ bɔ,

²¹ yé é a gi dɔɔ é zima léé, we lé Kazambale a fe, a lɛ sɔɔ plɛplɛ a a lee.

²² Amalé ’bɛ nɔla a ma we tegele nya.

²³ Naa, yee do kpen lé we ma‐an wa gyɛ sɛbɛ gi léé, ’bɛ nɔla a ma we tegele nya lo;

²⁴ é a sɛbɛ gi kaalé we ma é ziin, kaa lé, kaalé blipale é dan nɔla lɛ kaa ma we tegele nya bɛ, kaalé we ma; kaa lé, kaa bli vo mi lé é Kaazan Jézu nwa gamunu va bɛ, a lɛ, kaalé we ma lé é a sɛbɛ gi.

²⁵ Kaalé wesɛrɛle ma lé Bale Jézu nɔ ga lɛ, yé é nwa gale va kaa kɛlɛle tegele we ma.