Rom munu 3 - Kazambale lé Sebe Sauunu 1979

¹ ’Té kɛlɛle Juifinu nya tɔnɔ a mɛ fɛ nyaa? ’Té ganedɔle tɔnɔ a mɛ fɛ nyaa?

² É a blɛn bɛ faa ma; a vininzan lé ke ’ko: Kazambale é dérenu bɛ pa Juifinu lee.

³ Yé dé wo va mi kenu bli ’ka é pale lo, bɛwemalé Kazambale ’ka é dére tawe kɛla loo?

⁴ Gba, é ’ka ’bɛ zo lo. ’Wo Kazambale dɔɔ wezen fezan nya ma, yé ’wo munu faa dɔɔ viézannu nya ma, fɛan zo lé é a é gyɛle sɛbɛ gi, a zo; wo léé: ’Wo i ye mi tegele nya i dérenu ma ma, Yé dé wo ilé we ble té we ’é i gyɛ lo ma.

^5-6 Naa, dé kolé weple éé Kazambale lé we tegele nagɔɔn‐an wéiin, ’té mɛ we lé ko féé? Dé Kazambale éé we lɛgi paan, ’té éé weple kɛlaa? Gba! Maa a wefena mi lé wefebɛ gi. Dé é kɛlɛ ’bɛ zo, ’té Kazambale éé tɛrɛlamunu lé we blé kaa?

⁷ Dé maa viéwo, dé ’bɛ lé we ma lé munu Kazambale tɔ bɔ taawo léé, Bale éé we fé é boen ma, mɛmalé ’naan yé wo anlé we ble bélé fɛan zo lé maa a wenyanékɛlɛzan nya, a zoo?

⁸ É ’ka lé, ko wenyané kɛlɛ yé ’bɛ ’wuo ’é pla wezin nya loo? Yé weboen lé, mitɔsɛrɛmunu an wɔra ka ’léé, léé, Pɔl ɛ fe a zo. A yara lé wo we lɛdɔ munu ’konu gi.

Mi do kpen ’ka tegele lo

⁹ É dɔ ka gi kaa? Ko Juifinu zé we néné mini bɛn bɛnu zé taa? Gba. Naa, ko a nagɔɔn é kwakwa wéiin léé, munu faa a wenyané lé luu nya, Juifinu koo, Grɛkinu koo, woo faa lé,

¹⁰ bélé fɛan zo lé é a é gyɛle sɛbɛ gi, a zo; wo léé: Mi tegele ’ka lo, A do kpen ’ka lo;

¹¹ Mi do kpen ’wuo ’ka é ta lo, Mi do kpen ’ka Kazambale naginian lo.

¹² Wo faa zi saan, yé wo faa a é boa; Wezin kɛlɛzan ’ka wo va lo, A do kpen ’ka lo.

¹³ Wo bɔrɔ gi a bélé mi vun lɛ sole zo, Woo dabli kɛla mi lɛ wo néné nya, Ménénwunnu suiɛ nyi a wo lɔlu gi.

¹⁴ Wo ’léé a é fanle balepale valé wenyané saa nya.

¹⁵ Tawo kele gane a wo wuo mi nyɛ nwɛɛnle we ma;

¹⁶ Zamaga valé nyanéblele a wolé zi ta;

¹⁷ Wo ’ka vole drɔɔ zi dɔɔa lo;

¹⁸ Kanale Kazambale lee ’ka wo bli gi lo.

¹⁹ Ko a gi dɔɔ léé, we faa lé bélidɔwe ke a fena, é a fena munu lé wo ke bélidɔwe la, wo lɛ, mi faa ’léé lɛ tanle we gi yé munu faa ’é kɛlɛ wegyɛmunu nya Kazambale yuɛ gi.

²⁰ Naa, mi do kpen ’ka dan kɛlɛ lɛ tegele a yuɛ gi bélidɔwe kɛlɛwenu nya lo, naa, bélidɔwe éé mi bɔn‐in kinié léé, ’é a wenyanékɛlɛzan nya.

Mi éé kɛla tegele blipale ma

^21-22 Naa, Kazambale éé mi kɛla tegele fɛan zo, ko ye sin, yé ko ye léé, bélidɔwe gin ’ka a ma lo; Kazambale éé mi kɛla tegele fɛan zo, bélidɔwe valé balelayemunu ana we fe; yee lé ke léé, mi faa lé wo bli ke Jézu Krist lɛ, Kazambale éé wo kɛla tegele blipale ma. Glɛ ’ka munu gi lo, azama.

²³ Naa, munu faa wenyané kɛlɛ yé Kazambale lé fuasan vuru wo faa ma;

²⁴ alé zin nya lé wo kɛlɛ tegele é pla, Jézu Krist lé wo tabole we ma.

²⁵ Kazambale Jézu dɔ wenyané ’yibofɛ nya, a nyɛ lé we ma, blipaalɛmunu zé nya. Kazambale we ’ko kɛlɛ a gɔɔnle we gi léé, ’é a tegele. Wenyanénu lé munu a kɛlɛ é vinin, Kazambale bli tiéé bléyi va, Kazambale fii pla ’bɛnu ta,

²⁶ a tegele nagɔɔnle we gi bléyi ’ko va, yé munu a gi dɔɔ léé, é a tegele yé mian éé bli voo Jézu lɛ, éé ’bɛzan kɛla tegele.

²⁷ Bɛwemalé, mibozen tɔbɔwe a kyɛɛn? É ’ka lo. Bélidɔwe kyɛn ma lé é ’ka loo? Bélidɔwe lé mi a kɛla, ’bɛ léé? Gba. Blipale lé bélidɔwe ma lé é ’ka lo.

²⁸ Naa, é dɔ ko gi léé, mi éé kɛla tegele blipale ma, ’té bélidɔwe kɛlɛwenu gin ’ka a ma lo.

²⁹ Kazambale ’a Juifinu saa lé Bale nyaa? Gba. É ’ka bɛn bɛnu lé Bale nya loo? Yee lé. É a é ziin bɛn bɛnu lé Bale nya.

³⁰ Bale a do kpen, yee ɛ ganedɔmunu kɛla tegele blipale ma, yé yee ɛ ganédɔlomunu kɛla tegele blipale ma. Amalé é a bɛn bɛnu lé Bale nya é ziin.

³¹ ’Té ko bélidɔwe kɛla weboa nya blipale nyaa? Gba. Ko bélidɔwe dɔa gligli.