Rom munu 16 - Kazambale lé Sebe Sauunu 1979

Weale lé

¹ Kaa buru Fébé lé é ke Sansré léglizi wuole nya bɛ, alé we lé maa a fe ka lɛ ’ko.

² ’Ka a kun Kazambale lé munu lé mi kunbɛ nya, Kaazan lé we ma, yé dé a mawe dɔ fɛan gi, ’ka bɔ a va. É bɔ mi kiɛre va, yé é bɔ maabozen va, ’bɛzama.

³ An we Prisil valé Akilas lé wo ke anlé nyanama pa béénu nya Jézu Krist gi, wo va;

⁴ wo ’wobozen bɔra ga lɛ an bélile we ma. Maa doan, maa wo bɔ vɔa lo; bɛnnu lé léglizigimunu faa a wo bɔ vɔna é ziin.

⁵ Léglizigimunu lé wo keeé ékema wolé kɔn gi bɛ, an we wo va. Épainɛt lé é ke Krist lé fɛ vininzan nya Azi, ’té é sɔ an lɛ bɛ, an we a va.

⁶ An we Mari lé, é nyané kiɛre ble kalé we ma bɛ, a va.

⁷ Andrɔniku valé Junias lé wo ke an lelenu nya, an we wo va; wa é ziin an va kasola béénu nya, wa mi segelenu nya nwunvɔmunu va yé wa é ziin Krist gi an ’lɛ.

⁸ An we Anplias lé é sɔ an lɛ Mizan gi, a va.

⁹ An we Uubɛn lé é ke an va nyanama pa béé nya Krist gi, a va, é valé Sakis lé é sɔ an lɛ, a va.

¹⁰ An we Apélɛs lé, é é bli vole Krist lɛ nagɔɔn weboen nya, a va. An we Arisobul lé kɔngimunu va.

¹¹ An we an lele Érodiɔn va. An we Naasis lé kɔngimunu lé wo ke Mizan gi bɛ, wo va.

¹² An we Trifɛne valé Trifoz lé wo ke nyanama pana Mizan zé nya bɛ, wo va. An we Pɛɛsid lé é sɔ an lɛ, a va. É Mizan lé nyanama pa kiɛre.

¹³ An we Rufus lé é ke Mizan lé mi vabole nya, é valé a bu lé é ke é ziin an bu nya, wo va.

¹⁴ An we Asɛnkrit koo, Flégɔn koo, Eɛmɛs koo, Patrobas koo, Emas koo, bwenu lé wo ke wo va koo, wo va.

¹⁵ An we Filolɔg valé Juli koo, Néré valé é buru koo, Olɛnpe koo, wo valé Kazambale lé munu lé wo ke wo va koo, wo va.

¹⁶ ’Ka we ka ke va ka bɔn gi fu nya. Krist lé léglizigimunu faa we ka va.

¹⁷ An bwenu, maa we plaan ka lɛ léé, ’ka yuɛ pa kabozen va, munu lé woo munu kinié ékema, ’té woo wo diéraan bɛ, yé ’té woo sɔn vɔa wepaadére lé ka a nyi si, a ma bɛ, wolé we ma. ’Ka si wo ma baa.

¹⁸ Naa, mi ’ko zoɛnu ’ka Kaazan Krist wuozannu nya monomono lo, naa, wa ’wobo bun‐an wuozannu nya, ’té woo mi tɔɔtɔɔnu bli sɛra dére nénénu valé dabli dérenu nya.

¹⁹ Dé é a kazé nya, mi faa a gi dɔɔ léé, ka tɔné gi a drɔɔ. Bɛwemalé an gi éé nanaan kalé we ma yé é sɔ an lɛ léé, ’ka bɔ wezin kɛlɛle lɛ kiɛre kiɛre, yé ’ka kɛlɛ mi tidiannu nya wenyané kɛlɛle vazia.

²⁰ Mi vo drɔɔ Bale é dan Satan ’wii lɛ ka gane wuo laoɛ. Kaazan Jézu Krist lé zin ’é kɛlɛ ka ta ma.

²¹ An va nyanamapa béé Timoté we ka va, é valé an lelenu Lusius koo, Jazɔn koo, Sosipatɛɛ koo, wo we ka va.

²² Maa, Tɛɛtius lé an ke sɛbɛ ’ko gyɛna bɛ, an we ka va Mizan gi.

²³ An yabazan Gaius lé é ke é ziin léglizigimunu faa yabazan nya, é we ka va. Flamunu lé gɔɔlitadɔzan Éras we ka va, é valé bwe Kaatus nya.

²⁴ Kaazan Jézu Krist lé zin ’é vo ka faa ta ma. Amɛɛn.

Bale drɔɔ vɔle lé

²⁵ Mi lé éé bɔa ka dɔle lɛ gligli anlé Wenéné valé Jézu Krist lé wefele yɛrama, we lé é ke é yɔɔle Bale bli gi, a bɔrale yɛrama bɛ, wa tɔ zin fe ma. We ’ko a é yɔɔle é li,

²⁶ naa, sin, a ta bɔra balelayemunu lé sɛbɛ gyɛle nya. Gakelebale a béli dɔ a zo, yé sin wa nagɔɔn bɛnnu faa lɛ, wo bli vole Kazambale lé we lɛ we gi yé wa lɛdɔma.

²⁷ Bale lé é ke wedɔɔzan nya é do kpen bɛ, ’wa tɔ zin bɔ Jézu Krist lé we ma lɛɛfaama, té a glɛ é dɔ lo. Amɛɛn.