Rom munu 15 - Kazambale lé Sebe Sauunu 1979

’I bɔluzan sɔlɛwe kɛlɛ, té ibo zé kɛlɛ lo

¹ Kaa lé kaa ke plɛplɛ, é a lé kaa bɔ mi tɔɔtɔɔnu va.

² We lé é sɔ kaa bɔluzan lɛ, ’té é ke wezin nya wo vazia, kaa faa do do ’é yee ɛ kɛlɛ ma, wo dɔle gligli we ma.

³ Yé é ziin, Krist ’ka ébozen sɔlɛwe kɛlɛ lɛ lo; naa, é a é gyɛle sɛbɛ gi ’ko zo, léé: Munu lé woo i sɔnɔan, maa lé wo an sɔnɔ.

⁴ Yé we faa lé wa gyɛ é kyɛn sɛbɛ gi, wa gyɛ we paale kaa gi we ma, léé, kaa bli ’é kɛlɛ we lɛ. Dé kaa bli kɛlɛ tiéé, ’té Kazambale lé sɛbɛ éé kaa tɔrɔ paan, ’bɛna lé kaa bli é dan kɛlɛ lɛ we lɛ.

⁵ Kazambale lé éé mi bli kɛla tiéé, ’té éé mi tɔrɔ paan, ’é ka bli kɛlɛ ékeva do ma, Jézu Krist zé zo, léé,

⁶ Kaazan Jézu Krist Ti lé é ke é ziin alé Bale nya, ’ka a tɔ bɔ ékeva bli do valé dére do nya.

Bɛn bɛnu woo Wenéné maan

⁷ Bɛwemalé ’ka ka ke si é zima, bélé fɛan zo lé Krist ka si, a zo, Kazambale tɔ bɔle we gi.

⁸ ’Bɛ gi léé, Krist kɛlɛ ganedɔmunu wuozan nya, yé blivolɛdére lé Bale a fe ko tranu lɛ, é ’bɛ lɛ sɔɔ yé ’bɛ nya lé é a gɔɔn léé, Kazambale a wezen fezan nya, é ’ka viéwoo lo.

⁹ Yé ’bɛ saa kaan lo, bɛn bɛnu é ziin, woo Kazambale tɔ bɔa alé nyanai zénle wo ta we ma. We ’ko a é gyɛle Kazambale lé sɛbɛ gi, léé, Bɛwemalé maa dan i tɔ bɔra lɛ bɛnnu va, Yé maa dan i tɔ bɔ lɛ lɛrɛvɔle nya.

¹⁰ Yé wo lé é ziin léé: Bɛnnu, ka gi ’é nana alé munu va.

¹¹ Yé é ziin: ’Kaa bɛnnu faa, ’ka Mizambale tɔ zin fe. ’Kaa munu faa, ’ka a tɔ zin fe.

¹² Ézai lé é ziin léé: Izai punla é dan nɛɛ lɛ Yé é dan nwa lɛ yé é dan pla lɛ bɛnnu nwiin; Bɛnnu bli é dan vo lɛ yee ɛ lɛ.

¹³ Blivolɛ Bale ’é ka fan gi nanale nya yé ’é ka vo drɔɔ bɛ faa ma ka pale a ta we ma, fɔɔ yé ka bli é vo a lɛ tegelee, Léli Sauun lé plɛplɛ nya.

¹⁴ An bwenu, dé é a kazé we nya, maabozen a gi dɔɔ léé, ka a mi zin babanu nya, yé ka we faa dɔɔ, yé ka bɔa é ziin we plale lɛ ka ke lɛ.

¹⁵ Naa, duowo, zin lé Kazambale a kɛlɛ an lɛ an kɛlɛle Jézu Krist lé nyanamapazan nya bɛnnu méléna we gi bɛ, alé we ma lé an sɛbɛ gyɛ ka lɛ an dére plɛplɛ nya, we kenu sele dɔle ka gi we ma.

¹⁶ Bale va nyanama lé ke Kazambale lé Wenéné fele nya, yee lé maa ke a pana bɛn bɛnu va léé, Léli Sauun lé we ma bɛnnu ’é kɛlɛ saraka lé é sɔ Kazambale lɛ, a nya.

¹⁷ Bɛwemalé, maa anbo ze vɔa Jézu Krist gi Kazambale lé nyanama lé we ma.

¹⁸ Naa, wenu lé Jézu Krist a kɛlɛ maa nya, yé bɛn bɛnu ’é kɛlɛ a lɛdɔmazannu nya, ’bɛ we saa lé maa a fé, maa ’ka we bɛ fé lo. An dére valé an kɛlɛwenu koo,

¹⁹ gyɛzorowenu valé weblɛnblɛnnu kɛlɛle koo, Léli Sauun lé plɛplɛ koo, wo nya lé Jézu Krist bɛn bɛnu kɛlɛ ’é lɛdɔmazannu nya. ’Bɛ zo lé an Krist lé Wenéné faa nwɛɛn di, é sia Jérusalɛm valé é sɔnɔ tɛrɛnu ma fɔɔ yé é bɔ Iliri tɛrɛ la.

²⁰ An giwe lé ke léé, ’maa Wenéné ’ko fe fɛana lé wo ’ka tan Krist tɔ ’ma lɛ monomono lo, wona, té maa kɔn dɔ mi bɛ lé kɔngane ta lo we gi;

²¹ fɛan zo lé é a é gyɛle sɛbɛ gi, a zo; wo léé: Munu lé wo ’ka tan alé we fe lɛ wo lɛ lo, wo dan a ye lɛ. Yé munu lé wo ’ka tan alé we ’ma lɛ lo, wo dan a gi ’ma lɛ.

É sɔ Pɔl lɛ léé, ’é go Rom

²² We ’ko ɛ an gole ka va yi ga gɔnɔ kiɛre.

²³ Naa, sin, maa nyaa wenéné fele nya fɛfaana tɛrɛ ’konu ta. A lɛɛ kiɛre lo, é sɔ an lɛ léé, dé maa a gona Esipanye maa gié ka vazia.

²⁴ Dé maa a gona ana, dé an nyanale ka va lɔrɔ si an ma sɛ, an bli a a lɛ léé, ka dan go lɛ an pa lɛ ana.

²⁵ Sin, maa dan go lɛ Jérusalɛm, bɔle Kazambale lé munu va we gi.

²⁶ Naa, é sɔ Masédɔane munu valé Akai munu lɛ léé, ’wo gɔɔli nɔ nyanégyɛzannu lé wo ke Kazambale lé munu nya Jérusalɛm, wo lɛ.

²⁷ A kɛlɛle sɔ wo lɛ é zima; yé é a lé wa kɛlɛ. Naa, dé bɛnnu wozé lélifɛ zin kenu ye Juifinu va, é a lé bɛnnu ’é bɔ Juifinu va tɛrɛlawenu gi.

²⁸ Dé an we ’ko kɛlɛle lɛ sɔɔ faa, dé maa blɛ ’konu nɔ wo lɛ, maa dan go lɛ Esipanye yé maa gié ka vazia.

²⁹ Maa gi dɔɔ léé, dé maa a gona ka va, maa dan go lɛ Krist lé drɔɔ vole lɛsɔɔle nya an ta.

³⁰ An bwenu, maa we plaan ka lɛ Kaazan Jézu Krist tɔ nya, é valé Kazambale Léli lé sɔlɛle nya léé, ’ka bɔ an va bazorole nya anlé we ma Kazambale lɛ.

³¹ ’Ka laa Kazambale lee léé, Judé munu lé wo bli ’ka é pale lo, té ’wo an kun lo, yé blɛnu lé maa a gona wo nya Jérusalɛm, ’wo sɔ Kazambale lé munu lɛ,

³² yé dé é sɔ Bale lɛ yé an bɔ ka va gi nanale nya, yé an flin ka va sɛ.

³³ Mi vo drɔɔ Bale ’é vo ka faa va ma. Amɛɛn.