Rom munu 14 - Kazambale lé Sebe Sauunu 1979

Té ka ka bwenu ma we ble lo

¹ Mi lé a bli ’ka é pale tegele lo, ’ka ’bɛzan si é zima, naa, mi do léé, ’ézé kɛla ’ko zo, yé a do léé, ’ézé kɛla ’ko zo, naa, té ka zavɔ ’bɛ wenu ta lo.

² É dɔ mi do gi léé, ’é fɛnu faa blé, yé mi bɛ lé ’bɛ ke tɔɔtɔɔ, é dɔ ’bɛ gi léé, ’é ’ka wi blé lo.

³ Mi lé é ’ka wi blé lo, té wiblezan é ’bɛzan ye boazan nya lo; yé mi lé é ’ka wi blé lo, té é wiblezan ma we ble lo, naa, Kazambale a si ’ézé nya.

⁴ De ɛ ke bii nya yé i mi bɛ wuozan ma we bléé? Dé é dɔ gli?-?glioo, dé é diéraoo, azan lé we bɛ. Naa, a dɔle gligli lé plɛplɛ a Mizambale lee, bɛwemalé é dan dɔ lɛ gligli.

⁵ É dɔ mi do gi léé, glɛ a yinu gi; yé é dɔ a bɛ gi léé, yinu faa a do. Mi faa do do ’é gi dan tirilii, yé ’é a ma kunna ye ma.

⁶ Mi lé éé glɛ dɔa yinu gi, Mizan bɛan lé éé a kɛla; yé mian éé wi blé, Mizan bɛan lé éé a blé, naa, éé Kazambale bɔ vɔa; mian é ’ka wi blé lo, Mizan lé we ma lé é ’ka a blé lo, ’té éé Kazambale bɔ vɔa.

⁷ Naa, ka va mi do kpen ’ka é yuɛma ébozen zé nya lo; yé é ’ka gaan ébozen zé nya lo.

⁸ Naa, dé ko a é yuɛma, ’té ko a é yuɛma Mizan zé nya, yé dé ko ga, ’té ko ga Mizan zé nya. Bɛwemalé, dé ko a é yuɛmaoo, dé ko gaoo, ’té ko a Mizan zé nya.

⁹ Naa, Krist ga, yé é nwa é ziin é yuɛma plale gamunu valé mi yuɛmalenu nwiin we gi.

¹⁰ Naa, bii, mɛmalé i i bwe ma we bléé? Yé bii, mɛmalé i i bwe yé mi ple nyaa? Naa, kaa faa é dan dɔ lɛ Kazambale lé webleblin ’lɛ.

¹¹ Naa, é a é gyɛlɛ sɛbɛ gi léé: Mizambale léé: Maa a é yuɛma, Mi faa é dan ’wo powuo zun lɛ an ’lɛ Yé mi faa nɛnɛ é dan maa Kazambale tɔ bɔ lɛ.

¹² ’Ko zo lé kaa faa va mi do do é dan ébozen kɛlɛwe nɔnɔ lɛ Kazambale lɛ.

Té i i bwe saan lo

¹³ Bɛwemalé, té ko ko ke ma we ble é dɛrɛ lo; naa, ’i bɔn‐in dan, yé we lé é ke ka bwe do saanwe valé a diérawe nya, té bé kɛlɛ lo.

¹⁴ Maa a gi dɔɔ, yé Mizan Jézu an bɔn gi kini léé, fɛ do kpen tiri ’ka lo, naa, mian é a ye fɛ tiridɔle nya, ’té ’bɛ yuɛ gi lé a tiri ke.

¹⁵ Dé i bwe bli kyɛ dɔ ilé fɛblele we ma, ’té i ’ka we kɛlɛna a vazia sɔlɛle nya lo. Mi lé Krist ga alé we ma, té bé saan ilé fɛblele lé we nya lo.

¹⁶ We lé ke é zima i yuɛ gi, té é kɛlɛ mi tɔ sɛrɛwe nya lo.

¹⁷ Naa, Kazambale plale mi nwiin ’ka fɛblele valé fɛminile lé we nya lo; naa, kɛlɛle tegele koo, vole drɔɔ koo, gi nanale koo, wo nya lé é ke Léli Sauun gi.

¹⁸ Mian éé Krist bɔa we yaa ’ko nya, ’bɛzan ɛ sɔ Kazambale lɛ, ’té ’bezan lé we a é zima munu yuɛ gi.

¹⁹ Bɛwemalé, wenu lé wo mi vo drɔɔ, ’té woo mi faa dɔa gligli, ’ka wo ɛ kɛlɛ ma.

²⁰ Té ka Kazambale lé nyanama sɛrɛ fɛblele lé we nya lo. Fɛ faa gi a é bɔle webozen nya, naa, dé mi kɛlɛ mi bɛ saanzan nya élé fɛblele we ma, ’bɛ a tɔntɔn.

²¹ Dé é a wi blele nyaoo, dé é a nwɛ minile nyaoo, dé weowean éé bɔaléé, é i bwe saan, a nyaoo, é a é zima léé, té i wo do kpen kɛlɛ lo.

²² I bli a é pale fɛan zo bɛ, té bé fe mi bɛ lɛ lo. ’É vo bii valé Kazambale méléna. Mian é ’ka we dɔa ébozen nwiin wenu lé éé wo ze vɔa, a gi lo, ’bɛzan zé a néné.

²³ Naa, mian a bli kɛlɛ fié, fɛ lé éé a blé, alé we ma, we a é dɔle a nwiin. É ’ka a kɛlɛna blipale nya lo, ’bɛzama. We faa lé é ’ka sié blipale va lo, é a wenyané nya.