Rom munu 13 - Kazambale lé Sebe Sauunu 1979

É a lé wo pla minwiinzannu wuo

¹ Mi faa ’é pla minwiinzannu wuo ma; naa, plale mi nwiin lé é ’ka sié Kazambale va lo, é ’ka lo, yé minwiinmunu lé wo ke ana, Kazambale ɛ wo dɔ.

² Bɛwemalé mian éé sɔn vɔa minwiinzannu ma, Kazambale lé béli lé é a dɔ, éé sɔn vɔa ’bɛ ma é ziin, yé munu lé woo sɔn vɔa a ma, wo dan wobo gyɛ lɛ we nya.

³ Mi ’ka kanaan minwiinmunu lee wezin kɛlɛle ma lo, naa, wenyané kɛlɛle ma lé éé kanaan. É sɔ i lɛ léé, té ’é kana minwiinzannu lee loo? ’I wezin kɛlɛ yé wo dan i ze vɔ lɛ.

⁴ Minwiinzan a Kazambale wuozan nya ilé wezin yele we ma. Naa, dé i wenyané kɛla, ’i kana ma; naa, gwɔun ’ka a lee é pla lo, é a Kazambale wuozan nya we lɛgi pale valé we lɛdɔle wenyanékɛlɛmunu gi we ma.

⁵ É a lé mi é pla a wuo; é ’ka plaan a wuo kanale we lɛdɔle ’é gi saa lé we ma lo, naa, é a lé é kana a lee é ziin wevasibli lé we ma.

⁶ We ’ko duo ma lé ka lɛnpo banwoo. Minwiinmunu a Kazambale wuozannu lé wo yara ke é pale nyanama ’ko ta, wo nya.

⁷ Fɛ lé é a lé wa nɔ mi lɛ, ’ka a nɔ wo lɛ ma; ’ka lɛnpo gɔnɔ faa banwo é banwolɛmunu lɛ, ’ka kana ka kana lee munu lee, mi lé é a lé ka a lɛdɔama, ’ka a lɛdɔma ma.

⁸ Dé é ’ka ka ke lɔrɔ pale nya lo, té mi do kpen lé vɛɛn é kɛlɛ ka ma lo; naa, mian mi bɛnu éé sɔa a lɛ éé Kazambale lé bélidɔwe lɛ sɔɔan.

⁹ Bélidɔwenu lé ke ’ko: té i le bɛ valé gɔné bɛ gini lo; té i mi gyɛ lo; té i kyeenwo lo; té i bli é bɔ fɛnu ma lo; yé dé a bɛ ana é ziin, ’bɛ koo, a faa lɛ a é sɔɔle dére ’ko nya, léé, ’i bɔluzan ’é sɔ i lɛ bélé biibozen zo.

¹⁰ Sɔlɛle ’ka wenyané kɛla ’é bɔluzan lɛ lo, bɛwemalé sɔlɛle a bélidɔwe lɛsɔɔle nya.

¹¹ Wean ma lé we ’ko ke blɛn, yee lé é ke ’ko: bléyi lé ko ke a gi ’ko, ka ’ka ’bɛ gi dɔɔa loo? Ka vuobléyi bɔ yi bla, naa, sin kaa sile we gi bɔ é pu é mini kaa bli kɛlɛ a lɛ bléyian va, ’bɛ lɛ.

¹² Béli tanna mɔn, é vo sɛ yé tu é kini. Bɛwemalé ’ka daan gunuti va we kɛlɛle ma, yé ’ka yiéyi lé gulidanfɛnu sia.

¹³ ’Ka tawo tegele yiéyi tawobɛ nya. Té ka kɛlɛ bun‐anzannu valé nwɛ tanzannu nya lo, té ka ka dɔbɛ kyɛn lé sɔlɛwe kɛlɛ lo, té ka pɛnpɛnné gyɛ lo, té ka we sia lo, té ka maawo lo.

¹⁴ Naa, ’ka nɔla Mizan Jézu Krist nya brɔkɔɔ; té ’ka ka dɔbɛ kyɛn lé gibɔrɔ pa lo, alé blibɔmawenu kɛlɛle we gi lo.