Rom munu 12 - Kazambale lé Sebe Sauunu 1979

Saraka yuɛmale

¹ Bɛwemalé, an bwenu, maa we plaan ka lɛ Kazambale lé nyanai zénle nya léé, ’ka kabozennu nɔ saraka yuɛmale lé é ke Bale zé nya, ’té é sɔ Kazambale lɛ bɛ, a nya, yee ɛ ke kalé Bale bɔle tegele nya.

² Té ka kabo kɛlɛ laomunu zo lo, naa, ka ’wuogibɔrɔle a fɛan zo bɛ, ’ka zi nɔ Bale lɛ yé é ’bɛ nɔla yé ’bɛna lé ’ka kɛlɛ é yɛrama, yé ka bɔ Kazambale lé blibɔmawe dɔɔle lɛ; yee ɛ ke é zima, yee ɛ ke é sɔke, gun ’ka yee ɛ ma lo.

³ Zin lé Bale a kɛlɛ an lɛ, a nya lé maa lé ka faa do do lɛ léé, té ka kabo ye mi zin baba nya lo; naa, bo kiéné bli ’é kɛlɛ ka gi ma, blipale lé Kazambale a guli ka faa do do ma, a yɛrama.

⁴ Naa, fɛan zo lé ko kɔlɛ a do yé a vafɛnu a kiɛre yé ko kɔlɛvafɛnu faa panyanama ’ka do lo bɛ,

⁵ a zo duo lé kaa lé, kaa ke kiɛre, kaa a kɔlɛ do nya Krist gi, kɔlɛvafɛnu nya ékeva.

⁶ Kaa faa lé blɛ a é sile ékema, zin lé Bale a kɛlɛ kaa lɛ, a yɛrama, bɛwemalé mian balelawefele blɛ ke ’bɛ lee, ’bɛzan ’ézé fe élé blipale yɛrama ma,

⁷ mi lé wa laa nyanama pale ma, ’élé nyanama pa é sɔbɛla nya ma; mi lé éé we paan munu gi, ’é yara pa élé we paale ta ma;

⁸ yé mi lé éé we plaan mi lɛ, ’é yara pa élé weplale ta ma. Mian éé fɛ no, ’é a nɔ bli drɔɔ nya ma; yé mian éé we yuɛ gi boo, ’é a kɛlɛ é fuu nya é ta ma; yé mi lé a nyanai éé zén‐é, ’é a kɛlɛ gi nanale nya ma.

’Ka gié Krétiɛn giébɛ nya

⁹ Té ka mi lɔrɔ pa dabli nya lo ma. Wenyané za ’é vo ka gi ma. ’Ka kun wezin kɛlɛle ma plɛplɛ ma.

¹⁰ Ka bwenu ’é sɔ ka lɛ tegele ma. ’Ka ka bɔluzan kɛlɛ blɛn é mini kaboen ta.

¹¹ ’Ka ta ’é kɛlɛ kelekele; té ka kun‐an?-?wo lo. Ka fuu ’é dɔ ka ta ma. ’Ka Mizan mawe kɛlɛ.

¹² Ka gi ’é nana bli kɛlɛle fɛ lɛ lé we ma ma. ’Ka kɛlɛ bli tiéézannu nya nyanéblele gi. ’Kabo nɔ bazorole lɛ.

¹³ Fɛnu lé Kazambale lé munu mawe ke a gi, ’ka a nɔ wo lɛ. ’Ka munu bɛn si é zima.

¹⁴ Munu lé woo nyané paan ka ta, ’ka wo drɔɔ vo. ’Ka wo drɔɔ vo, té ka bale pa wo ma lo.

¹⁵ Ka gi ’é nana, munu lé wo gi ke é nanale, wo va ma. ’Ka wuvɔ, munu lé wo ke wuvɔna, wo va ma.

¹⁶ ’Ka ka ke mawenu dɔɔ ma. Té kabo kɛlɛ blɛn lo. ’Ka nyi si yé ka nyanama kiéné pa. Té ka kɛlɛ wedɔɔzannu nya kabozen yuɛ gi lo ma.

¹⁷ Té ka wenyané lɛgi pa mi do kpen ma wenyané nya lo; we lé é ke é zima mi faa yuɛ gi, ’ka yee ɛ nagini ma.

¹⁸ Dé ka bɔalɛ, ’ka vo mi faa va drɔɔ; té ka ɛ da wesiawe nya lo.

¹⁹ An blibɔmamunu, té ka kabozen lé we lɛgi pa lo; naa, ’ka ’bɛ vo Kazambale lé bliflile lee. Naa, é a é gyɛle sɛbɛ gi léé: Mizambale léé: Maa ɛ we lɛgi paan; maa ɛ mi banwoo.

²⁰ Naa, Dé lɔrɔ a i nyanézan gyɛna, ’i fɛblele nɔ a lɛ. Dé ’yiminilɔrɔ a a gyɛna, ’i ’yiminile nɔ a lɛ; Naa, a kɛlɛle ’bɛ zo nya lé i dan kyɛ nyɛ zun dɔ lɛ a nwiin.

²¹ Té i zi nɔ wenyané lɛ yé é i kele lo; naa, ’i wenyané kele wezin kɛlɛle nya ma.