Rom munu 11 - Kazambale lé Sebe Sauunu 1979

Izraɛl kuru sɛné lé é vo

¹ Bɛwemalé maa laa ka lee: Kazambale sɔn vɔ élé munu maa? Gba! Maa é ziin, maa a Izraɛl mi nya, Abraam kululazan nya, Bɛnjamɛn bɛn nya.

² Kazambale lé munu lé é wo dɔɔ é kyɛn, é ’ka sɔn vɔ lɛ wo ma lo. We lé Kazambale lé sɛbɛ a fe Éli lé we ma, ka ’ka a gi dɔɔa loo? É Izraɛl tɔ fe Kazambale lɛ fɛan zo, ka ’ka a gi dɔɔa loo?

³ É léé: Anzan Bale, wo ilé balelayemunu gyɛ, yé wo i bannanu yara bua; maa ɛ vo an do kpen, yé wa kwa kulina léé, ’wo an gya.

⁴ ’Naan, Kazambale a zi pa a lɛ nɔɔ? É léé: Mi baa yaa wuru soru lé wo ’ka tan ’wo powuo zun lɛ Baal lɛ lo, maa wo tadɔ anzé nya. Yee kaan loo?

⁵ A zo duo lé, kyɔ é ziin, munu ’léé sɛ lé Bale wo si a va élé zin yɛrama, wo ana tan.

⁶ Naa, dé Bale wo si a va élé zin yɛrama, ’té kɛlɛwenu ’ka a va é dɛrɛ lo; dé ’bɛ kaan lo, ’té zin ’ka zin nya é dɛrɛ lo.

⁷ ’Té mɛ léé? Fɛ lé Izraɛl ke a ginina, é ’ka a ye lɛ lo, naa, munu lé Bale wo si a va, wo ɛ ye; yé mi pɔnénu tɔné gi kɛlɛ yuyu,

⁸ fɛan zo lé é a é gyɛle sɛbɛ gi, a yɛrama; wo léé: Kazambale tanyila bli nɔ wo lɛ; É blala pa wo yuɛ la, É wo tɔné ta vo Fɔɔ kyɔ. Yé David léé:

⁹ Wolé fɛblele ’é kɛlɛ wo ma wo kunsan valé Wo kunséli nya, yé ’wo saan, yé maa we lɛdɔ wo gi tegele.

¹⁰ Wo yuɛ gi gunu ’é dɔra ma, té wo fɛna ye lo we gi; Yé wo koli ’é vo yifaama é plinle ma.

Bɛn bɛnu sile we gi

¹¹ Bɛwemalé maa laa ka lee: Wo saanle lé we ma lé wo diéraa? Gba. Naa, wo saanle lé we ma lé sile we gi bɔ bɛn bɛnu va, wolé maawole nwale we ma.

¹² Naa, dé wo saanle lé we ma lé tɛrɛlamunu fua ble, dé wo kɛlɛle kiéné lé we ma lé bɛn bɛnu fua ble, dé wo faa ’wo bli nɔla Kazambale va ’naan, ’bɛzé ’ka dan mini lɛ koɛnu ta loo?

¹³ Maa lé ’kaa bɛn bɛnu lɛ léé, Bale an nwunvɔ bɛn bɛnu va, ’té maa anbo lé nyanama tɔ zin bɔa,

¹⁴ yé dé an bɔa lɛ, yé maa an bɛnnu lé maawole nwa, wo va mi kenu sile we gi we ma.

¹⁵ Dé Bale sɔn vɔ Juifinu ma yé bɛwemalé é tɛrɛlamunu nana ’é va ’naan, dé wo wɔra é ziin alé zin gi nii? ’Bɛ ’ka dan kɛlɛ lɛ nwale gale va nya loo?

¹⁶ Dé féifɛ vininzannu a Bale zé nya, ’té a pɔnénu a azé nya é ziin. Yé dé yili suni a Bale zé nya, ’té a bɛnu a azé nya é ziin.

¹⁷ Naa, dé wo yilibɛ kenu bɔi é ma, yé bii lé i ke bwi gi ɔliviyili nya, dé wo i dɔ wo pun ’léé, yé ɔliviyili ’yi lé éé sié a suni gi yé i kɛlɛ a ke yezan nya bɛ,

¹⁸ té ibo fila vɔ yilibɛnu va lo. Dé i a ibo fila vɔna, ’i we ’ko dɔɔ ma: biian i suni kɛla lo, suni ɛ bii kɛla.

¹⁹ Bɛwemalé i dan a fe lɛ léé: Wo yilibɛnu bɔi an dɔle wo pun ’léé we ma.

²⁰ ’Bɛ a webozen nya; wo ’ka wo bli pa lɛ lo, amalé wo wo bɔi yé bii a é dɔle blipale nya. Té ibo kɛlɛ blɛn lo ma; ’i kana.

²¹ Naa, dé Kazambale ’ka yili bozen bɛnu vo lɛ lo, bii é ziin, é ’ka dan i vo lɛ lo.

²² Bɛwemalé Kazambale lé zin koo, a wɛwɛ koo, ’ka bɔn‐in bɔrɔ wo ma; munu lé wo diéra, a wɛwɛ a wo ma; yé alé zin a i ta, ’té dé i dɔ gligli zin ’ko gi; dé ’bɛ kaan lo, bii é ziin, é dan sɔn vɔ lɛ i ma.

²³ Naa, Izraɛlnu bli ’ka é pale fɛan zo bɛ lo, dé wo nɔla, dé wo bli pa, Kazambale é dan wo dɔ lɛ wo pun ’léé é ziin, naa, Kazambale é bɔaléé, é wo dɔ wo pun ’léé é pai é ziin.

²⁴ Bii lé i ke bwi gi ɔliviyili dɔbɛ nya, dé wo i bɔi yé wo i dɔ é ziin ɔliviyili bozen lé i ’ka a dɔbɛ nya bɛ lo, a pun ’léé, ’té wonu lé wo ke ɔliviyili bozen dɔbɛ nya, wo ’ka dan wo dɔ lɛ é ziin wobozen lé ɔliviyili pun ’léé loo?

Izraɛl dɔle ’wo pa gi

²⁵ An bwenu, Kazambale lé we yɔɔle lé ke léé, Bale Izraɛl lɛ do tɔné ta vo fɔɔ yé bɛn bɛnu ’léé lɛ sɔɔle ’é wɔra, yé é ’ka sɔ lɛ an lɛ léé, ka vo ka tanyila weyɔɔle ’ko vazia lo, té ka kabo ye wedɔɔzannu nya lo we gi.

²⁶ ’Ko zo lé Izraɛl faa é dan si lɛ we gi, é a é gyɛle sɛbɛ gi fɛan zo, a yɛrama; wo léé: Misiéwegizan é dan si lɛ Siɔn Yé é dan Kazambale lé zi ma wenyané fele si lɛ Jakɔb ’léé;

²⁷ Yé ’bɛ é dan kɛlɛ lɛ anlé gipawe nya wo va, ’Té dé an wolé wenyanénu si wo lee.

²⁸ Dé é a Wenéné lé we nya, wa Kazambale nyanézannu nya kalé we ma; naa, dé é a munu vabole lé we nya, wo sɔ Kazambale lɛ wo tranu lé we ma.

²⁹ Naa, Kazambale bli ’ka nɔlaan élé blɛnu kɛlɛle valé élé mi laale ma lo.

³⁰ Fɛan zo lé ka Kazambale lɛgama é kyɛn, yé wolé Kazambale lɛgamale lé we ma lé Kazambale nyanai zén ka ta,

³¹ a zo duo lé wo é Kazambale lɛgama sin, léé, nyanai lé Bale a zén ka ta, ’é a zén wo é tao é ziin.

³² Naa, Kazambale munu faa kɛlɛ é lɛgamazannu nya, nyanai zénle wo faa ta we gi.

³³ Kazambale lé fua koo, alé wedɔɔle koo, alé gi kinile koo, wo gié é glɛ la. Dé mi Kazambale lé weblele zuo kulioo, é ’ka dɔa a nyaana ma lo, yé mi ’ka a kɛlɛwenu gi maan lo.

³⁴ Naa, De ɛ Mizambale lé gibɔrɔle dɔɔ? Yé de ɛ we pla a lɛɛ?

³⁵ De ɛ fɛ nɔ a lɛ é vinin yé ’bɛzan lé fɛ yele yara lé é ziin?

³⁶ A va lé fɛnu faa éé sié; alé we ma lé fɛnu faa ke; yé fɛnu faa a azé nya. ’Wa tɔ bɔ lɛɛfaama, té a glɛ é dɔ lo ma. Amɛɛn.