Rom munu 10 - Kazambale lé Sebe Sauunu 1979

¹ An bwenu, anlé blibɔmawe valé anlé ba lé maa ke a zorona anlé munu lé we ma, yee lé ke ’ko: wo sile we gi lé.

² Maa lé wo ma léé, wo fuu a wo ta Kazambale zuo tawole ma, naa, é ’ka wedɔɔle yɛrama lo.

³ Kazambale éé mi kɛla tegele fɛan zo, wo ’ka a gi dɔɔa lo; wa kwa kulina léé, ’wo ’wobozen kɛlɛ tegele. Kazambale éé mi kɛla tegele fɛan zo, wo ’ka ’bɛ nyi sié lo;

⁴ naa, Krist a bélidɔwe ’wuoplana nya, munu faa lé wo bli voo a lɛ, wo kɛlɛlɛ tegele we ma.

⁵ Naa, kɛlɛlɛ tegele lé éé sié bélidɔwe va, Moizi a gi fe ’ko zo, léé: Mian éé we ’konu kɛla, wo kɛlɛlɛ nya lé é dan vo lɛ é yuɛma.

⁶ Naa, kɛlɛlɛ tegele lé éé sié blipale va, azé wefele a ’ko zo: Té bé fe i bli gi léé: De ɛ dan go lɛ la gii? lo; ’bɛ gi léé, de ɛ go Krist si lɛ ko lɛ la gii?

⁷ Yé é ziin, té bé fe léé: De ɛ dan zun lɛ guru gii? lo; ’bɛ gi léé, dé ɛ Krist nwaan gale va ko lɛɛ?

⁸ ’Té mɛ we lé we tegele a fé we ’ko ma siin? É léé: Dére a i sɔnɔ, é a i ’léé, é a i bli gi. Dére lé mi éé paan a ta, yee lé ko alé we fé. Yee lé ke ’ko:

⁹ Dé i Mizan Jézu tɔ bɔra munu va, yé dé i dɔ a ta léé, Kazambale a nwa gamunu va, i dan si lɛ we gi.

¹⁰ Naa, blipale nya lé mi éé bɔa kɛlɛlɛ lɛ tegele; a tɔ bɔrale munu va nya lé mi éé bɔa sile lɛ we gi, Kazambale lé sɛbɛ a fe fɛan zo, a zo; é léé:

¹¹ Miomian é é bli voo a lɛ, yara ’ka dan ’bɛzan gyɛ lɛ lo.

¹² Glɛ ’ka é dɔle Juifinu valé Grɛkinu gi lo. Wo faa zan a do kpen, Mizan nya, yé é a é zin munu faa lé wa tɔ laan, wo lɛ.

¹³ Naa, miomian é dan Mizan tɔ laa lɛ, é dan si lɛ we gi.

¹⁴ Mian wo bli ’ka a lɛ lo, wo ’bɛzan tɔ laama kaa? Yé mian wo ’ka alé we ’ma lɛ lo, wo bli vo ’bɛzan lɛ kaa? Yé dé wefezan ’ka lo, woo we maan kaa?

¹⁵ Yé dé wo ’ka mi pa lɛ zia lo, wefezan éé kɛla ana kaa? We lé ke é gyɛle sɛbɛ gi, é a ’bɛ zo; wo léé: Munu lé woo vole drɔɔ we fé, ’Té woo wenéné fé, Wo ganenu a é nɔnɔmi.

¹⁶ Naa, wo faa ’ka wenéné lɛdɔ lɛ a ma lo. É ziin, Ézai léé: Mizambale, we lé ko fe bɛ, de ɛ nyi sii?

¹⁷ A zo lé blivole we lɛ éé sié we lé mi a maan, yee ɛ va. Yé we lé mi a maan, éé sié Krist dére ɛ va.

¹⁸ Naa, maa léé: Wo ’ka a ’ma lɛ loo? ’Bɛ kaan lo. Wo dére nwɛɛn tɛrɛ faa la, Yé wenu lé wa fe, wo bɔ fɔɔ tɛrɛ glɛ sina.

¹⁹ Naa, maa laa ka lee: Izraɛl ’ka a gi dɔɔ lɛ loo? É vinin, Moizi léé: Munu lé wo ’ka bɛn tegele nya lo, maa dan kalé maawole nwa lɛ wo va; Yé maa dan kalé bliflile nwa lɛ, bɛnnu lé wo gi ’ka é kinile lo, wo nya.

²⁰ Naa, Ézai é bli ta dɔ plɛplɛ fɔɔ yé é léé: Munu lé wo ’ka an nagini lɛ lo, wo ɛ an ye, Yé munu lé wo ’ka an ma laa lɛ lo, maa anbo nagɔɔn wo ɛ lɛ.

²¹ Naa, é lé Izraɛl lé we ma léé: Maa bɛ soi bladi nyanadi Zavɔbɛn lé a tɔné gi ke plɛplɛ, a lɛ.