Rom munu 1 - Kazambale lé Sebe Sauunu 1979

Weale lé

¹ Maa Pɔl lé an ke Jézu Krist lé luugɔnéné nya, maa ɛ ke sɛbɛ ’ko gyɛna ’kaa Rom munu lɛ. Bale an laa léé, an kɛlɛ nwunvɔzan nya, yé é an dɔ élé Wenéné fezan nya.

² Wenéné ’ko, Kazambale a ma blivolɛdére fe é kyɛn balelayemunu lɔlu nya, Kazambale lé sɛbɛ gi.

³ Wenéné ’ko, Kozan Jézu Krist lé ke Kazambale Be nya, alé we lé; dé é a Jézu lé tɛrɛlakɔlɛ nya, wa yaa David kululazan nya,

⁴ naa, dé é a a léli sauun nya, é a Kazambale Be nya; plɛplɛ lé é nwa a nya gamunu va, ’bɛ a nagɔɔn.

⁵ Yee ɛ lé we ma lé Kazambale zin kɛlɛ an lɛ yé é an kɛlɛ nwunvɔzan nya, léé, ’maa go Jézu tɔ gi yé ’maa munu ye bɛnnu faa méléna, yé ’maa wo nɔla Bale vazia, yé wa lɛdɔma.

⁶ ’Kaa lé Bale ka laa léé, ’ka kɛlɛ Jézu zé nya, ka a wo va mi kenu nya.

⁷ ’Kaa Rom munu faa lé ka we ke Kazambale lee, ’té é ka laa ka kɛlɛle élé munu nya we gi bɛ, an we ka va. Kaa Ti Bale valé Mizan Jézu Krist, ’wo zin kɛlɛ ka lɛ yé ’wo ka vo drɔɔ ma.

É sɔ Pɔl lɛ léé, ’é go Rom

⁸ É vinin, we faa ’lɛ, maa anlé Bale bɔ vɔa Jézu Krist gi ka faa lé we ma, léé, ka tɔ a é bɔle blipale gi tɛrɛ faa la.

⁹ Bale lé maa a bɔa an bli gi a Be lé Wenéné fele nya, é a anlé wenayezan nya léé, an bazoroan ka tɔ ma yifaama, an ’ka daan a ma lo,

¹⁰ ’té maa a laan Kazambale lee yifaama léé, dé é sɔ a lɛ ’é zi nɔ an lɛ sin yé an go ka va.

¹¹ Naa, maa a a va léé, maa ka ye yé ka léliblɛ ke ye an va, ka dɔle gligli we gi;

¹² naa, gba, dé maa a ka va, ’ko ko ke bli ta dɔ plɛplɛ blipale lé ke ko dɔlafɛ nya bɛ, a nya. ’Bɛ fila vɔ.

¹³ Bwenu, é sɔ an lɛ léé, ka a gi dɔɔ léé, gɔnɔ kiɛre nya maa a a va léé, an go ka va, anlé nyanama ma tɔnɔ ke yele we ma ka méléna, bélé fɛan zo lé maa a ye bɛn bɛnu méléna, a zo; naa, fɔɔ bléyi ’ko va maa ’ka tan zi ye lɛ lo.

¹⁴ Grɛkinu valé bwigimunu koo, wedɔɔmunu valé tanyilamunu koo, wo faa lɛ wefele vɛɛn a an ma.

¹⁵ Bɛwemalé é sɔ an lɛ boenwo léé, ’kaa lé ka ke Rom, maa Wenéné ’ko fe ka lɛ é ziin.

Wenéné a plɛplɛ

¹⁶ Naa, yara ’ka an gya Wenéné ma lo. É a Kazambale lé plɛplɛ do nya blipaalɛmunu faa bélifɛ nya, Juifinu zé lé é vinin, ’bɛ zuo é a Grɛkinu zé nya.

¹⁷ Kazambale éé mi kɛla tegele fɛan zo, a na a é gɔɔnle Wenéné ’ko nya, kɛlɛle tegele lé mi a yé blipale ma, ’té éé blipale no munu lɛ bɛ, yee lé, fɛan zo lé é a é gyɛle sɛbɛ gi, a zo, léé: Mi lé é kɛlɛ tegele blipale ma, é dan béli lɛ.

We a munu nwiin

¹⁸ Munu lé wo webozen gi sɛra wolé weple kɛlɛle nya, Kazambale bli a flina wo ma la gi wolé Kazambale lé zi ma wenyané fele faa valé wolé weple faa lé we ma.

¹⁹ Munu é bɔalɛ léé, wo Kazambale dɔɔ fɛnuan ma, Kazambale wo bɔn gi kini wo nya, amalé a na a é gɔɔnle wo lɛ.

²⁰ Weboen lé, Kazambale lé plɛplɛ lé a glɛ ’ka lo, é valé yee Bale dɔbɛ, mi ’ka wo yé ’é yuɛ nya lo, naa duowo, é sia tɛrɛ bɔra bléyi va, wo ta a é bɔrale wéiin; dé mi ’é gi bɔrɔ Kazambale kɛlɛwenu ma, éé Bale lé plɛplɛ valé a dɔbɛ yé kpaklaa, amalé munu dɔna ’ka lo.

²¹ Naa, wo Kazambale dɔɔ aan wo, wo ’ka a bɔ lɛ ’é bɔbɛ gi lo, yé wo ’ka a bɔ vɔ lɛ lo; naa, wolé gibɔrɔle kɛlɛ boawe nya yé wo ’ka ’wo ’wuogibɔrɔ mawe ye lɛ é dɛrɛ lo.

²² Wo ’wobo ze vɔ léé, ’wo ɛ we dɔɔ yé wo kinin ’tugyɛzannu nya,

²³ yé Bale lé é ’ka gaan lo, wo alé fuasan tavɔɔ mi lé ’bɛ éé gaan, a yili nya, ’bɛ valé mianénu koo, ganelawinu koo, tawoplɛlawinu koo, wo yili nya.

²⁴ Bɛwemalé, Kazambale wo nɔ wolé tiridɔwe lɛ wo blibɔmale yɛrama léé, ’wo pɛnpɛnné gyɛ ’wobo kɔlɛ ma;

²⁵ wo Kazambale lé webozen tavɔɔ vié nya yé Fɛfaakɛlɛzan lé, é a lé mi a drɔɔ vo lɛɛfaama a glɛ ’ka lo, wo ’bɛ vo yé wo ’bɛ kɛlɛfɛnu lɛdɔama ’bɛ pa gi, ’té woo ’bɛnu bɔa, azama. Amɛɛn.

²⁶ Bɛwemalé Kazambale wo nɔ ’wolé blibɔmawenu lé ke yaragyɛwe baba nya, wo lɛ; naa, we lé le valé gɔné a kɛla, wo ’bɛ vo, yé we lé le valé le ’ka a kɛla lo, wolé lomu ’bɛ kɛlɛ.

²⁷ A zo duo lé gɔnénu a kɛlɛ; we lé le valé gɔné a kɛla, wo ’bɛ vo yé wobo lɔrɔ wo gyɛ yé wenaanénu lé mi ’ka a kɛla lo, gɔné valé gɔné a kɛlɛ ékeva yé ban lé a yara lé wa ye wo saanle ma ban nya, wa ye ’wobozen kɔlɛ gi.

²⁸ Kazambale dɔɔle gi bɔrɔ ’ka aan wo wo ma lo, Kazambale wo nɔ wolé gi bɔrɔle naanénu lɛ, yaragyɛwe gɔnɔ faa kɛlɛle we ma.

²⁹ Woo weple gɔnɔ faa kɛla, woo we lɛrɛlɛrɛ kɛla, wo bli éé bɔa gɔɔli ma, woo mi blifliwe kɛla, wo bli éé bɔa mi bɛ lé fɛ ma, woo mi gya, woo we sian, woo dabli kɛla, woo mimafɛ kɛla, wa é fanle we ’konu nya;

³⁰ wa we fé kyeen gizannu valé liwozannu nya, wa Balesɔnɔzannu valé misɔnɔzannu nya, wa boblɛnzannu valé bobɔzannu nya, wa wenyané dɛrɛ kɛlɛzannu nya; wa ’wo ti valé ’wo bu ma tɔnégiplɛplɛzannu nya;

³¹ wo ’wuo ’ka wo ta lo, wo ’ka mi zin nya ’wolé munu ma lo, wo ’ka mi lɔrɔ paan ’woboan lo, wo nyanai ’ka zén‐é mi ta lo.

³² Kazambale léé, munu lé woo we ’ko zoɛnu kɛla, a yara lé ’wo ga, wo ’bɛ gi dɔɔoo, ’té wa kɛla duowo, yé dé wo mi bɛnu ye a kɛlɛna, wo léé, ’bɛ a é zima.