Wegɔɔnle 9 - Kazambale lé Sebe Sauunu 1979

¹ Lanje soruzan béli fɛn, yé maa monéné do ye sina la gi, yé é dia tɛrɛ va. Guru lé a wɔlɛ ma nyaana ’ka lo, wo alé lakléwɔlɛ nɔ yee monéné lɛ,

² yé é a lɛ so. Kyɛgoi nwa guru ’ko gi, bélé ’furu blɛn lé kyɛgoi zo; yiri valé lagi gunu dɔra guru gi kyɛgoi nya.

³ Gangannu bɔra kyɛgoi va, yé wo nwɛɛn tɛrɛ la; yé Bale plɛplɛ nɔ wo lɛ bélé tɛrɛla gableseené zé zo.

⁴ É lé wo lɛ léé: Té ka wenyané kɛlɛ tɛrɛ la lunu koo, blalaanu koo, yilinu koo, wo do ma lo, naa, munu lé Kazambale lé tɔmase ’ka wo yarapɛla lo, wo saa lɛ lé ’ka kɛlɛ.

⁵ Wo zi nɔ wo lɛ léé, ’wo nyané pa munu ta moné soru, naa, té ’wo wo gyɛ lo; nyané lé wa pa wo ta, é a bélé gableseené suiɛ lee nyanéblele zo, ’té dé é a dɔ mi ma.

⁶ ’Bɛ yinu nya, é dan sɔ lɛ munu lɛ léé, ’wo ga, yé wo ’ka dan ga lɛ lo; ga lɔrɔ é dan wo gyɛ lɛ, ’té ga a é sile wo ma baa.

⁷ Gangannu ’ko, wa bélé wisoonu lé wo wo ma’lɛrɛ gulidanle we ma, wo zo. Fɛnu a wo ’wuo ma bélé kyankoronu zo, yé wo yaranu a bélé mi yara zo.

⁸ Wo nwun a bélé lomu nwun zo, yé wo suiɛnu a bélé golizra suiɛ zo.

⁹ Wo golɛtayɔɔfɛnu a bélé golɛtayɔɔfɛnu lé ke foliɛwɔlɛ nya, wo zo, yé wo bɛanu vun éé wé bélé goronu lé, wisoo kiɛrɛ ke wo ganana guli danna, wo vun wele zo.

¹⁰ Wo wolinu a bélé gableseené woli valé foliɛwɔlɛ lɛma?-?bole zo, yé wo wolinu gi lé kle pale munu ta moné soru lé plɛplɛ ke.

¹¹ Guru lé a wɔlɛ ma nyaana ’ka lo, alé lanje ɛ ke wo nwiinzan nya; wa laama Ébru dére gi Abadɔn, yé wa laama é ziin Grɛki dére gi, Apɔliɔn.

¹² We tɔntɔn vininzan gié. Bé ye, we tɔntɔn fié a dana ’bɛ zuo.

¹³ Lanje suiɛdozan béli fɛn, yé maa dére do ’ma sina balebanna lé wa kɛlɛ kyan nya, ’té é ke Kazambale ’lɛ, a béli ziɛn gi,

¹⁴ yé é lé lanje suiɛdozan lé, béli ke a lee, a lɛ léé: Lanje ziɛn lé wo ke é yerele Yufrat yuu blɛn ta, ’i wo fuo.

¹⁵ Yé lanje ziɛn lé wo ma’lɛrɛle nyaa, lɛrɛ koo, yi koo, moné koo, lɛɛ koo, wolé we ma, wo wo fuo léé, mi faa va, wo mi yaa yaa va mi do do gyɛ.

¹⁶ Maa gulidanmunu va wisootazannu ’léé ’ma; wo ’léé a mi baa é baa yɔ fié wɔlɛ vu.

¹⁷ ’Ko zo lé maa wisoonu valé wotazannu ye yuɛzi gi, wo golɛtayɔɔfɛ yuɛɛ a bélé kyɛ koo, yasɛnt gɔlɛ koo, povun koo, wo yuɛɛ zo. Wisoonu ’wuo a bélé golizranu ’wuo zo; kyɛ koo, kyɛgoi koo, povun kyɛ koo, ’té éé bɔraan wo ’léé.

¹⁸ Kyɛ koo, kyɛgoi koo, povun kyɛ koo, fɛ yaanu lé wo ke sina wo ’léé bɛ, wo nya lé, dé mi a yaa, wa do gya yé a fié éé voo.

¹⁹ Naa, wisoonu lé plɛplɛ a ’wo ’léé valé ’wo woli gi; wo wolinu a bélé ménénu zo; yé yee méné ’wuo nya lé woo wenyané kɛla.

²⁰ Mi koɛnu lé, fɛ yaa ’ko ’ka ’bɛnu gyɛ lɛ lo, ’bɛnu ’ka ’wo bli si lɛ ’wo bɛ kɛlɛfɛnu lɛ lo; miyilinu lé wa kɛlɛ kyan koo, gɔɔlifu koo, zéné koo, gɔlɛ koo, yili koo, wo nya, ’té wo ’ka bɔa fɛ yele valé we ’male valé tawole lɛ lo, munu ’ka daan lɛ wo bɔle valé yonu bɔle ma lo;

²¹ wolé migyɛle koo, wolé yo kɛlɛle koo, wolé pɛnpɛnné gyɛle koo, wolé kyeenwole koo, wo ’ka ’wo bli nɔla lɛ ’bɛnu kɛlɛle ma lo.