Wegɔɔnle 8 - Kazambale lé Sebe Sauunu 1979

Zɔrɔkaanyɔɔ sɔrafiézan?-?lasikɔrɔ kyɛblégi kyanbɔ

¹ É zɔrɔkaanyɔɔ sɔrafiézan bɔi aan wo, wo tadɔ la gi tétété, é lɛrɛ buu bɔ.

² Lanjenu sɔrafié lé woo dɔa Kazambale ’lɛ, maa wo ye, yé wo béli sɔrafié nɔ wo lɛ.

³ Yé lanje bɛ da, yé ’bɛ dɔ balebanna ta, ’té lasikɔrɔ kyɛblégi kyanbɔ a ’bɛ lee; wo lasikɔrɔ kiɛre nɔ a lɛ, alé wo nɔle balebanna lé wa kɛlɛ kyan nya, ’té é ke lasikɔrɔ zé nya bɛ, ’té é ke fuablin ’lɛ, a ta we gi, é valé Kazambale lé munu faa lé bazorolenu nya.

⁴ Lasikɔrɔ goi valé Kazambale lé munu lé bazorolenu si lanje lee yé wo go loru Kazambale yara.

⁵ Yé lanje lasikɔrɔ kyɛblégi kyanbɔ si, yé é a fan balebanna ta kyɛ nyɛ nya yé é a vuli tɛrɛ va. Yé dérenu we, ’té zagelenu éé baan, ’té lɛɛ éé yuɛ wuo vɔa, ’té tɛrɛ ma éé nyɔɔn‐an.

Bélinu

⁶ Yé lanjenu sɔrafié lé béli sɔrafié ke wo lee, wo ’wo ma’lɛrɛ béli fɛnle we gi.

⁷ A vininzan béli fɛn, yé goowɔlɛlɛɛ valé kyɛ lé ke é vɔɔle nyɛ nya, wo wo vuli tɛrɛ va; yé tɛrɛ fén yaazan kyɛ ble, yé tɛrɛ faa la, yili yaa yaa va, yili do do kyɛ ble, yé lu drɔɔdrɔɔ faa kyɛ ble.

⁸ Lanje fiézan béli fɛn, yé fɛ do lé é ke bélé gɔ blɛn zo, ’té kyɛ a zi lɛ sɔɔ, wa vuli wɛyi va. Yé wɛyi fén yaazan kinin nyɛ nya,

⁹ yé dé ’yi wuo fɛ yuɛmalenu a yaa, a do é gaan yé a fié é voo. Yé dé ’yitagoro a yaa fɛofɛana, a do é sɛra, yé a fié é voo.

¹⁰ Lanje yaazan béli fɛn, yé monéné blɛn lé éé bié bélé sona zo, é si la gi yé dé yuu a yaa tɛrɛan ta éé diaan a do ta yé a fié é voo, yé yee monéné dia é ziin ’yibɔnanu ta.

¹¹ Wo monéné ’ko tɔ laama Abisɛnt. ’Yi yaazan nɔla abisɛnt nya, yé ’yi vo bélé ziri zo, amalé ’yi munu gyɛ.

¹² Lanje ziɛnzan béli fɛn yé é yiri fén yaazan diri yé é moné fén yaazan diri, yé é monéné yaa yaa va monéné do do diri, yé fɛna fu ta yuo vɔ sɛ, yé béli gunu taa dɔra.

¹³ Maa a nagini yé gola lé é ke sina la méléna, maa a dére plɛplɛ ’ma yé é léé: We tɔntɔn, we tɔntɔn, we tɔntɔn é dan kɛlɛ lɛ tɛrɛlamunu lɛ, béli bɛ yaa lé lanje yaa é dan a fɛn lɛ bɛ, alé we ma.