Wegɔɔnle 7 - Kazambale lé Sebe Sauunu 1979

Wo tɔmase gyɛ Izraɛlnu mi baa yɔ yaa wɔlɛ vu ta fié ma

¹ ’Bɛ zuo, maa lanje ziɛn ye é dɔle tɛrɛ sun ziɛn ta; wo kun tɛrɛ la fu ziɛn ma, té fu ’é gié tɛrɛ koo, wɛyi koo, yilinu koo, wo ma lo we gi.

² Yé maa lanje bɛ ye, ’té ’bɛ si yirinwanazia Bale yuɛmale lé tɔmase gyɛfɛ nya é lee; é siaa plɛplɛ lanje ziɛn lé wa se kɛlɛ wo lɛ léé, ’wo wenyané kɛlɛ tɛrɛ valé wɛyi ma, wo lɛ, yé é léé:

³ Té ka wenyané kɛlɛ tan tɛrɛ koo, wɛyi koo, yilinu koo, wo ma lo, fɔɔ ko tɔmase gyɛ kozé Bale wuomunu yarapɛla.

⁴ Yé munu lé, tɔmase ke é gyɛle wo yara, maa wo ’léé ’ma; wa mi baa yɔ yaa wɔlɛ vu ta fié, yé wo si Izraɛl bɛnnu faa gi:

⁵ Juda bɛn gi mi a baa suiɛdo; Rubɛn bɛn gi mi a baa suiɛdo; Gad bɛn gi mi a baa suiɛdo;

⁶ Azɛɛ bɛn gi mi a baa suiɛdo; Néfitali bɛn gi mi a baa suiɛdo;

⁷ Manasé bɛn gi mi a baa suiɛdo; Siméɔn bɛn gi mi a baa suiɛdo; Lévi bɛn gi mi a baa suiɛdo; Isakaa bɛn gi mi a baa suiɛdo;

⁸ Zabulɔn bɛn gi mi a baa suiɛdo; Jozɛfu bɛn gi mi a baa suiɛdo; Bɛnjamɛn bɛn gi mi a baa suiɛdo; wo tɔmase gyɛ ’bɛnu yarapɛla.

Mi gu blɛn lé woo sié bɛn faa gi

⁹ ’Bɛ zuo maa a naginina, yé bé ye, mi gu blɛn lé, wo si bɛntɛrɛ faa koo, bɛn do do faa koo, migɔnɔ do do faa koo, dére faa koo, wo gi, wo ana, yé mi do kpen ’ka bɔa wo nɔnɔle lɛ lo. Wo dɔ webleblin valé ’Blané ’lɛ, sɔ funu nya ’wo ta, ’té yɔlaanu a wo lee.

¹⁰ ’Té woo siaan dére plɛplɛ nya léé: Bélile a kozé Bale lé é ke é nyanale webleblin ta, a lee, ’é valé ’Blané lee.

¹¹ Yé lanjenu faa dɔ webleblin koo, mi segelenu koo, fɛ yuɛmale ziɛn koo, wo zi; ’té woo buaan ’wo yara webleblin ’lɛ, ’té woo Kazambale bɔa,

¹² yé wo léé: Amɛɛn! Tɔzinfele koo, kɛlɛle blɛn koo, wedɔɔle koo, bɔvɔle koo, tɔbɔle koo, plɛplɛ koo, gla koo, wa kolé Bale zé nya lɛɛfaama ma! Iiin, é a a zo.

¹³ Mi segelenu va mi do kun wefele ma yé é lé an lɛ léé: Munu lé sɔ fu ke wo ta, denu lé ke wo nyaa? Wo si kyɛɛn?

¹⁴ Maa lé a lɛ léé: Anzan, bii ɛ ’bɛ gi dɔɔ. É lé an lɛ léé: Wa munu lé wo si nyané blɛn gi, wo nya; wo ’wolé sɔnu zuru ’Blané nyɛ nya yé wo kɛlɛ fu tata.

¹⁵ Bɛwemalé wo ke Kazambale lé webleblin ’lɛ, ’té wa bɔa bladi nyanadi Balebangikɔn gi. Webleblin tazan é dan élé sɔkɔn dɔ lɛ wo ta;

¹⁶ lɔrɔ ’ka dan wo gyɛ lɛ é dɛrɛ lo, ’yiminilɔrɔ ’ka dan wo gyɛ lɛ é dɛrɛ lo, yiri valé kyɛsan do kpen ’ka dan wo gyɛ lɛ é dɛrɛ lo.

¹⁷ Naa, ’Blané lé é ke webleblin guru la, é dan wo pa lɛ yé é go wo nya mivoéyuɛma ’yi’wuonu va, yé Kazambale é dan wo yuɛyi faa si lɛ.