Wegɔɔnle 6 - Kazambale lé Sebe Sauunu 1979

Zɔrɔkaanyɔɔnu

¹ ’Blané zɔrɔkaanyɔɔ sɔrafié va zɔrɔkaanyɔɔ do bɔi aan wo, ’té maa a naginian, yé maa a ’ma léé, fɛyuɛmale do we fe é dére nya bélé zagele banle zo yé é léé: ’I da.

² Yé maa a naginina, yé bé ye, wisoo fu bɔra. Gulidansa a a tazan lee; wo tɔkoro nɔ a lɛ; é a guliwuo volɛzan nya, yé é go guliwuo vole ’é lɛ bɛ gini lɛ.

³ É zɔrɔkaanyɔɔ fiézan bɔi aan wo, maa fɛ yuɛmale fiézan dére ’ma yé é léé: ’I da.

⁴ Yé wisoo sɔɔn bɔra. Wa se kɛlɛ atazan lɛ léé, ’é vole drɔɔ si tɛrɛ la, munu lé ’wo ke bɔrɔ bole we gi, yé wo gwɔun blɛn do nɔ a lɛ.

⁵ É zɔrɔkaanyɔɔ yaazan bɔi aan wo, maa fɛ yuɛmale yaazan dére ’ma yé é léé: ’I da. ’Té maa a naginian, yé bé ye, wisoo ti bɔra. Fɛ pɛzéwofɛ a atazan lee.

⁶ Maa dére do ’ma fɛ yuɛmale ziɛn meléna yé é léé: Buruwɔlɛ kana nya do dénié do; sɔnmlén kana nya yaa dénié do; té i nyɔnɔ valé dɔrɔ sɛrɛ lo.

⁷ É zɔrɔkaanyɔɔ ziɛnzan bɔi aan wo, maa fɛ yuɛmale ziɛnzan dére ’ma yé é léé: ’I da.

⁸ Maa a naginina yé bé ye, kyɛyee wisoo bɔra. Wo atazan tɔ laama ga, yé gamunu nyanana a a va. Wa se kɛlɛ wo lɛ léé, ’wo tɛrɛ fén ziɛnzan tamunu gyɛ, gwɔun koo, lɔrɔ koo, migyɛgyɛ koo, bwigiwinu koo, wo nya.

⁹ É zɔrɔkaanyɔɔ soruzan bɔi aan wo, munu lé wo wo gyɛ Kazambale dére valé wolé wenayedére fele ma, maa wo boennu ye balebanna wuo.

¹⁰ Wo siaa dére plɛplɛ nya yé wo léé: Mizan bozen sauun, i a mɔnna; bléyi kyɛn nya lé i dan munu lé we ble lɛ yé i ko nyɛ lɛgi pa tɛrɛlamunu maa?

¹¹ Wo sɔ fu nɔ wo lɛ do do, yé wo lé wo lɛ léé: ’Ka flin sɛ é ziin, fɔɔ yé ka va nyanama pa béénu valé ka bwenu lé wo dan wo gyɛ lɛ bélé ka zo, yé wo ’léé lɛ é sɔɔ.

¹² É zɔrɔkaanyɔɔ suiɛdozan bɔi aan wo, maa a naginina, yé tɛrɛ manyɔɔn blɛn, yé yiri kɛlɛ é ti bélé wikyɛɛ bɔlɔ zo, yé moné yara faa kɛlɛ bélé nyɛ zo,

¹³ yé monénénu si la gi yé wo dia tɛrɛ va bélé bɔrɔyili lé, fu plɛplɛ ke a nyɔɔnna yé é a poro toroné zana, a zo.

¹⁴ La go, bélé sɛbɛ lé wo ke a plinna, a zo; yé gɔnu faa valé wɛyi worona tɛrɛnu si ’wo dɔna.

¹⁵ Tɛrɛ la minwiinzannu koo, mi blɛnnu koo, sunyanwiinzannu koo, fuablezannu koo, vanu koo, luunu faa valé minénu koo, wo yɔɔ gɔmagurunu gi, é valé gɔlɛ blɛnblɛnnu méléna.

¹⁶ Yé wo lé gɔnu valé gɔlɛnu lɛ léé: ’Ka dia ko ta, yé ’ka ko ta yɔɔ fuablintazan yara valé ’Blané lé bliflile lee;

¹⁷ naa, wo blifliyi blɛn bɔ yé mi kyɛn ɛ bɔa dɔle lɛɛ?