Wegɔɔnle 5 - Kazambale lé Sebe Sauunu 1979

Sɛbɛ valé ’Blané

¹ A zuo maa sɛbɛ do ye webleblin tazan bɛyi lee. Wo sɛbɛ gyɛ a gi valé a lala yé wa lɛ tan zɔrɔkaanyɔɔ sɔrafié nya.

² Yé maa lanje plɛplɛ ye, ’té éé siaan dére plɛplɛ nya léé: De ɛ lé sɛbɛ lɛ so yara léé? De ɛ lé zɔrɔkaanyɔɔ bɔi yara léé?

³ Yé la gi koo, tɛrɛ la koo, tɛrɛ wuo koo, mi do kpen ’ka ana yé ’bɛ é bɔa a lɛ sole lɛ yé ’bɛ a nagini lo.

⁴ Mian alé sɛbɛ lɛ so yara lé yé é a nagini, wo ’ka ’bɛzan ye lɛ lo, amalé an wuvɔ é baba.

⁵ Mi segelenu va mi do lé an lɛ léé: Té i wuvɔ lo; bé ye, Juda bɛn lé golizra, David Punla, a ’wuo vo a lɛ, alé sɛbɛ lɛ sole valé zɔrɔkaanyɔɔ sɔrafié bɔile we gi.

⁶ Webleblin koo, fɛ yuɛmale ziɛn koo, mi segelenu koo, maa ’Blané ye é dɔle wo méléna; é a bélé fɛan zo lé a bɔrɔ a é bole, a zo. A béli a sɔrafié, yé a yuɛ a sɔrafié, wo lé ke Kazambale léli sɔrafié lé é wo nwunvɔ tɛrɛ faa la, wo nya.

⁷ É da, yé é sɛbɛ si webleblin tazan bɛyi lee.

⁸ É sɛbɛ si aan wo, fɛ yuɛmale ziɛn valé mi segele yɔ do wɔlɛ ziɛn dia ’wo bli ta ’Blané ’lɛ, ’té kɔnɔ valé kyankananu a wo lee do do, yé lasikɔrɔ lé é ke Kazambale lé munu lé bazorolenu nya, é a é fanle yee kananu nya.

⁹ Yé wo vo lɛrɛ dɛrɛ vɔna yé wo léé: Ilé sɛbɛ sile valé zɔrɔkaanyɔɔ bɔi yara lé, naa, wo i gyɛ saraka nya, azama, yé bɛn faa koo, dére faa koo, migɔnɔ faa koo, bɛntɛrɛ faa koo, i munu si wo va yé i wo tabo i nyɛ nya Kazambale zé nya;

¹⁰ yé i wo kɛlɛ bɛngɔnɔ do nya, kolé Bale banzannu nya, yé wo dan pla lɛ tɛrɛ nwiin, amalé ilé sɛbɛ sile valé zɔrɔkaanyɔɔ bɔi yara lé.

¹¹ Maa a nagini yé maa lanje kiɛre dére ’ma, ’té wa webleblin koo, fɛ yuɛmalenu valé mi segelenu koo, wo zi, yé woo lanjenu ’léé a wuru é wuru baa kiɛre kiɛre nya, yé wo nɔnɔ ’léé ’ka lo.

¹² Wa fé dére plɛplɛ nya léé: ’Blané lé wa bɔrɔ bo, plɛplɛ koo, fua koo, wedɔɔle koo, gla koo, tɔbɔle koo, kɛlɛle blɛn koo, tɔzinfele koo, alé wo ye yara lé.

¹³ Yé é ziin, kɛlɛfɛnu faa lé é ke la gi koo, tɛrɛ la koo, tɛrɛ wuo koo, wɛyi ta koo, wona, ’bɛ gi léé, fɛfaana fɛnu, maa wo dére ’ma, ’té wa fé léé: Tɔzinfele koo, tɔbɔle koo, kɛlɛle blɛn koo, plale mi nwiin koo, wa webleblin tazan valé ’Blané zé nya lɛɛfaama.

¹⁴ Yé fɛ yuɛmale ziɛn léé: Iiin, é a a zo. Yé mi segelenu dia ’wo bli la, ’té woo Bale bɔa.