Wegɔɔnle 4 - Kazambale lé Sebe Sauunu 1979

Lagi Bale bɔbɛ

¹ ’Bɛ zuo, maa a nagini, ’té la lɛ a é sole. Dére lé maa a ’ma é vinin bélé béli vun zo, é we fe an lɛ yé é léma: ’I da loru ’ko, yé we lé é dan bɔ lɛ é voéla yé maa a nagɔɔn i lɛ.

² Tɔɔn yé maa si an pɔlɛ gi yé an nɔla miléli nya. Yé bé ye, webleblin a la gi, ’té mi do a é nyanale yee webleblin ’ko ta.

³ Mi lé é ke é nyanale é a bélé jasipegɔlɛ valé saadɔanegɔlɛ zo; yé webleblin zi lɛ a é sɔɔle bɔmlɛ lé é ke émérodegɔlɛ zo, a nya.

⁴ Maa webleblin yɔ do wɔlɛ ziɛn ye yee webleblin ’ko zi, ’té mi segele yɔ do wɔlɛ ziɛn a é nyanale ’bɛnu ta, ’té sɔ fu a wo ta yé kyankoronu a wo ’wuo ma.

⁵ Webleblin éé lɛɛ yuɛ wuo vɔa, ’té éé dérenu fé, ’té éé zagelenu baan. Kyɛbɔ sɔrafié lé wo ke Kazambale léli sɔrafié nya, wa bina plɛplɛ webleblin ’lɛ.

⁶ Yé fɛ do a é ziin webleblin ’lɛ; é a bélé wɛyi zo, naa, ’yi kaan lo, é a bélé vlinvlin zo, bélé vlinvlin wezan lé, woo yɛrɛ yé a zi, a zo. Fɛ yuɛmalé ziɛn ana webleblin zi, a bɛ ziɛn la; wo ’lɛzia valé wo zuozia a é sɔɔlale yuɛnu nya.

⁷ Fɛ yuɛmale vininzan a bélé golizra zo; yé a fiézan a bélé diriné zo; a yaazan yara a bélé mi yara zo, yé a ziɛnzan a bélé gola lé éé sié, a zo.

⁸ Fɛ yuɛmale ziɛn faa do do bɛa a suiɛdo suiɛdo, yé wo zi valé wo gi a é sɔɔlale yuɛnu nya. Yé bladi nyanadi wa fé léé: Mizambale, Plɛplɛfaazan, ’té é ke ana é kyɛn, ’té é ke, ’té é dan bɛ, é a sauun, sauun, sauun, ’té wo ’ka daan a fele ma lo.

⁹ Webleblin tazan lé é ke é yuɛma lɛɛfaama, bléyian va lé fɛ yuɛmalenu a a tɔ zin fena, ’té wa tɔ bɔa, ’té wa bɔ vɔa,

¹⁰ ’bɛ bléyi va mi segele yɔ do wɔlɛ ziɛn dia ’wo bli ta webleblin tazan ’lɛ, yé mi lé é ke é yuɛma lɛɛfaama, ’té ’bɛnu a bɔa. Yé wo ’wolé kyankoronu dia webleblin ’lɛ, yé wo léé:

¹¹ Kozan, kozé Bale, i fɛnu faa kɛlɛ; ilé blibɔmale nya lé wo ke, yé wa é kɛlɛle, amalé kɛlɛle blɛn koo, tɔbɔle koo, plɛplɛ koo, ilé wo ye yara lé.