Wegɔɔnle 3 - Kazambale lé Sebe Sauunu 1979

We lé é a fe Saad léglizi lɛ

¹ ’I sɛbɛ pa Saad léglizi lé lanje lɛ zia. ’Bé fe a lɛ léé: Mi lé Kazambale léli sɔrafié valé monéné sɔrafié ke a lee, a dére lé é ke ’ko: Maa i kɛlɛwenu dɔɔ. Maa a gi dɔɔ léé, i a mi yuɛmale nya munu yuɛ gi, dɔlé ’té i a é gale.

² ’I vo é yuɛma, yé yee lé é vo i lee, ’té é bɔ nyaana bɛ, ’bé dɔ gligli; naa, maa a ye léé, gun a i kɛlɛwenu ma anlé Bale yuɛ gi.

³ Amalé wean wa fe i lɛ yé bé ’ma, a sele ’é dɔ i gi ma, yé bé kɛlɛ, yé ’i bli nɔla. Dé i ’ka voo é yuɛma lo, maa dan da lɛ bélé kyeenwozan zo, yé bléyian va lé maa dan bɔra lɛ i ma fiaa i ’ka dan a gi dɔɔ lɛ lo.

⁴ Naa, ’kaa Saad mi kenu ana duowo, ka ’ka kalé sɔnu tiri dɔ lɛ lo; amalé a yara lé ka dan tawo lɛ an va sɔ funu nya ka ta.

⁵ Mian we ’ko ’wuo vo a lɛ, wo dan sɔ fu zén lɛ a ta; yé maa ’ka dan a tɔ fwi lɛ mi bélilenu tɔgyɛla sɛbɛ gi lo, yé maa dan a tɔ bɔra lɛ an Ti valé élé lanjenu yara.

⁶ Mian we ’ma tɔné ke a ’wuo ma, we lé Kazambale Léli ke a fena léglizinu lɛ, ’é a ’ma ma.

We lé é a fe Filadɛfi léglizi lɛ

⁷ ’I sɛbɛ pa Filadɛfi léglizi lé lanje lɛ zia. ’Bé fe a lɛ léé: Mi sauun valé Webozen, ’té David lé lakléwɔlɛ ke a lee, dé é a lɛ so, mi do kpen ’ka a lɛ taan lo, dé é a lɛ tan, mi do kpen ’ka a lɛ soo lo, a dére lé é ke ’ko:

⁸ Maa i kɛlɛwenu dɔɔ. Bé ye, plɛplɛ kiéné a i lee, i tawo an dére ta, yé i ’ka an tɔ yɔɔ lɛ lo, amalé an zi lɛ so i lɛ, yé mi do kpen ’ka bɔa a lɛ tanle lɛ lo.

⁹ Bé ye, Satan lé zén‐ékevamunu lé woo viéwoo léé, ’wa Juifinu nya, dɔlé ’té wo ’ka a nya lo, maa dan wo va mi kenu nɔ lɛ i lɛ; bé ye, maa dan da lɛ wo nya, yé wo dan ’wo ’wuo wɔra lɛ i gane wuo, yé wo dan a gi dɔɔ lɛ léé, i sɔ an lɛ.

¹⁰ I tawo an dére ta yarapalale nya, amalé maa é ziin, bléyi tɔntɔn lé é dan bɔ lɛ tɛrɛ faa la, tɛrɛlamunu gi danle we gi bɛ, maa dan ka tabin lɛ ’bɛ bléyi va.

¹¹ Bé ye, an dan da lɛ é kele. Fɛ lé é ke i lee, ’i kun a ma kli, té mi do kpen ilé tɔkoro si i lee lo.

¹² Mian we ’ko ’wuo vo a lɛ, maa dan a kɛlɛ lɛ kɔn wɛyili nya anlé Bale lé kɔn blɛn gi, yé é ’ka dan bɔra lɛ ’bɛ gi é dɛrɛ lo; anlé Bale tɔ koo, anlé Bale lé fla lé é ke Jérusalɛm dɛrɛ lé é dan si lɛ la gi anlé Bale va yé é zun, a tɔ koo, an tɔ dɛrɛ koo, maa dan wo gyɛ lɛ a ta.

¹³ Mian we ’ma tɔné ke a ’wuo ma, we lé Kazambale Léli ke a fena léglizinu lɛ, ’é a ’ma ma.

We lé é a fe Laodisé léglizi lɛ

¹⁴ ’I sɛbɛ pa Laodisé léglizi lé lanje lɛ zia. ’Bé fe a lɛ léé: Mi lé ke Amɛɛn nya, yarapawela wenayezan bozen nya, Kazambale lé fɛ kɛlɛle pélisiale nya, a dére lé ke ’ko:

¹⁵ Maa i kɛlɛwenu dɔɔ. I ’ka drɔɔdrɔɔ lo, yé i kyɛ ’ka lo. É sɔ an lɛ léé, i kyɛ ’é kɛlɛ; dé ’bɛ kaan lo, ’i kɛlɛ drɔɔdrɔɔ.

¹⁶ I a wɔlɔwɔlɔ, yé i ’ka drɔɔdrɔɔ lo yé i kyɛ ’ka lo, amalé maa dan féé lɛ i nya.

¹⁷ Bii léé, ’é a fua nya, yé ’é a fua blena yé ’é mawe ’ka fɛ do kpen gi lo, yé i ’ka a gi dɔɔa léé, i a wenaanébɔmazan koo, nyanaizénlazan koo, nyanégyɛzan koo, yuɛwiizan koo, mi porole koo, wo nya lo;

¹⁸ amalé maa we plaan i lɛ léé, ’i fɛnu ’ko lɛ an lee: kyan lé wa gi dan kyɛ nya, ’bé lɔ ilé fuablele we gi, yé ’i sɔ funu lɔ, wo zénle i ta we gi léé, té i porole yara i gyɛ lo, yé ’i yuɛ lia lɔ yé bé zén i yuɛ va, ilé fɛna yele we ma.

¹⁹ Munu faa lé wo sɔ an lɛ, maa we plaan wo lɛ plɛplɛ yé maa we lɛdɔa wo gi. Amalé i fuu ’é dɔ i ta yé ’i bli nɔla ma.

²⁰ Bé ye, maa a é dɔle kɔn ’léé, ’té maa duoli gya. Dé mian é an dére ’ma yé é kɔn lɛ so an lɛ, ’té maa a wɔrana a va, yé maa fɛ blé a va yé éé fɛ blé an va.

²¹ Mian we ’ko ’wuo vo a lɛ, ko dan nyana lɛ a nya anlé webleblin ta, bélé fɛan zo lé a ’wuo vo an lɛ yé an Ti an nyana ’é va élé webleblin ta, a zo.

²² Mian we ’ma tɔné ke a ’wuo ma, we lé Kazambale Léli ke a fena léglizinu lɛ, ’é a ’ma ma.