Wegɔɔnle 22 - Kazambale lé Sebe Sauunu 1979

¹ Yuu lé éé mi voo é yuɛma, ’té a yuɛ a sésé bélé vlinvlin wezan zo, ’té éé sié Kazambale valé ’Blané lé webleblin gi bɛ, lanje a gɔɔn an lɛ.

² Éé yoroan fla vuun méléna. Mibéliyili a é dɔle yee yuu gɔ fié la; éé poro yuɛɛ do do baan gɔnɔ vu ta fié, moné ma moné ma, yé a laanu a bɛnnu bélifɛ nya.

³ Balepale ’ka é dɛrɛ lo. Kazambale valé ’Blané lé webleblin é dan kɛlɛ lɛ fla; a wuomunu é dan a bɔ lɛ,

⁴ yé wo dan a yara ye lɛ, yé a tɔ é dan kɛlɛ lɛ wo yarapɛla.

⁵ Béli ’ka dan tan lɛ é dɛrɛ lo; Mizambale é dan wo ta kini lɛ, amalé wo mawe ’ka kyɛbɔ valé yirisan gi lo. Yé wo dan pla lɛ munu nwiin lɛɛfaama.

Jézu dale bɔ é pu

⁶ É lé an lɛ léé: We ’ko a sɔbɛlawe nya, yé é a webozen nya; yé Mizan, balelayezannu lélinu zé Bale, é ’élé lanje nwunvɔ wenu lé wo kɛlɛbléyi bɔ é pu, wo nagɔɔnle we gi ’é wuozannu lɛ.

⁷ Yé bé ye, an dale bɔ é pu. Mi lé éé tawoo dére ’konu valé sɛbɛ ’ko lé balelayewe ta, azé a néné.

⁸ Maa Jan lé an we ’konu ’ma yé maa wo ye. Maa a ’ma aan wo yé maa a ye, maa dia lanje lé é wo gɔɔn an lɛ, a gane ma, a bɔle we gi.

⁹ Naa, é lé an lɛ léé: Té bé kɛlɛ lo. Bii koo, i bwe balelayemunu koo, munu lé wo ke tawona sɛbɛ ’ko dérenu ta koo, maa a ka vazan do nya. ’I Kazambale ɛ bɔ.

¹⁰ É lé an lɛ léé: Balelaye dérenu lé é ke sɛbɛ ’ko gi, té i wo lɛ tan lo, naa, a bléyi bɔ é pu.

¹¹ Mi lé é ke mi ple nya, ’é vo élé weple gi; mi lé a tiri ke é dɔle, ’é vo é tiridɔle gi; mi tegele ’é vo élé we tegele kɛlɛna; mi lé é ke sauun ’é vo duowo sauun.

¹² Bé ye, an dale bɔ é pu, yé mi banwofɛnu a an lee, munu banwole we gi do do wo kɛlɛwenu yɛrama.

¹³ Maa lé ke Alfa valé Oméga nya, a vininzan valé a voélazan nya, we pélisiana valé we ’wuoplana nya.

¹⁴ Munu lé woo ’wolé sɔnu zuruwo, mibéliyiliporo blele se valé wɔrale fla ’léé zia se yele we gi, wozé a é zima.

¹⁵ Blénnu koo, yokɛlɛmunu koo, pɛnpɛnnégyɛmunu koo, migyɛmunu koo, miyilibɔzannu koo, munu lé vié sɔ wo lɛ ’té wa woo koo, wa béera.

¹⁶ Maa Jézu, maa anlé lanje nwunvɔ we ’konu lé we fele ka lɛ we gi, léglizinu gi. Maa ɛ ke David kulu valé a punla nya, bladi monéné bile nya.

¹⁷ Yé Kazambale Léli valé bosizan léé: ’I da. Yé dé mianzan a ’ma, ’bɛzan ’é ’i da vɔ ma. Mian ’yiminilɔrɔ ke a gyɛna, ’é da ma; yé mian é sɔ a lɛ léé, ’é mivoéyuɛma ’yi si, ’bɛzan a si é pla ma.

¹⁸ Dé é a miomian nya, yé é sɛbɛ ’ko lé balelaye dérenu ’ma, maa lé a lɛ léma: Dé mian é we bɛ pa a va, Kazambale é dan a gyɛ lɛ migyɛgyɛnu lé wo wolé we gyɛ sɛbɛ ’ko gi, wo nya.

¹⁹ Dé mian é dére kenu si sɛbɛ ’ko lé balelaye wenu va, mibéliyili valé fla sauun lé, wo wolé we gyɛ sɛbɛ ’ko gi, Kazambale é dan azé si lɛ a lee.

²⁰ Mi lé é ke we ’konu fena, é léé: Iin, an dale bɔ é pu. Amɛɛn! Mizan Jézu, ’i da.

²¹ Mizan Jézu lé zin ’é vo ka faa ta ma.