Wegɔɔnle 21 - Kazambale lé Sebe Sauunu 1979

La dɛrɛ valé tɛrɛ dɛrɛ

¹ A zuo maa la dɛrɛ valé tɛrɛ dɛrɛ ye, naa, la vinin valé tɛrɛ vinin san, yé wɛyi ’ka ana é dɛrɛ lo.

² Fla sauun lé ke Jérusalɛm dɛrɛ nya, maa a ye sina la gi Kazambale va yé é zun. A ma a é ’lɛrɛle bélé bosizan lé é ’lɛrɛ é zana lɛ, a zo.

³ Yé maa dére plɛplɛ do ’ma, é si webleblin va yé é léé: Kazambale nyanana kɛlɛ munu va sin. É dan vo lɛ wo va, yé wo dan kɛlɛ lɛ alé munu nya, yé Kazambale bozen é dan kɛlɛ lɛ wo va.

⁴ É dan wo yuɛyi si lɛ yé mi ’ka dan ga lɛ é dɛrɛ lo; wo ’ka dan gyɛ bo lɛ é dɛrɛ lo; wo ’ka dan wuvɔ lɛ é dɛrɛ lo; wo ’ka dan nyané ble lɛ é dɛrɛ lo, naa, we vininnu faa gié.

⁵ Yé webleblin tazan léé: Bé ye, maa fɛnu faa kɛlɛ fɛ dɛrɛnu nya. Yé é léé: ’Bé gyɛ ma, naa, we ’ko a sɔbɛlawe nya yé é a webozen nya.

⁶ É lé an lɛ léé: A kɛlɛle nyaa. Maa ɛ ke Alfa valé Oméga nya, we pélisiana valé we ’wuoplana nya. Mian ’yiminilɔrɔ ke a gyɛna, maa dan mivoéyuɛma ’yi’wuo?-?la’yi nɔ lɛ a lɛ é pla.

⁷ Mian we ’ko ’wuo vo a lɛ, é dan fɛ ’konu ye lɛ ézé tɔnɔ nya; maa dan kɛlɛ lɛ alé Bale nya yé é dan kɛlɛ lɛ an be nya.

⁸ Naa, kanazannu koo, blipaanlomunu koo, we gin dɔle kɛlɛzannu koo, migyɛzannu koo, pɛnpɛnnégyɛmunu koo, yokɛlɛmunu koo, miyilibɔzannu koo, viéwomunu faa koo, wozé é dan kɛlɛ lɛ kyɛ lé ke blɛn bélé gyankyɛ zo, ’té wo povun zén a va, a nya, yee lé ke gale fiézan nya, ’té mi gulii ga é wo sin bɛ.

Jérusalɛm dɛrɛ

⁹ A zuo, lanje sɔrafié lé, kana sɔrafié ke wo lee, ’té wo ke é fanle migyɛgyɛ sɔrafié voélazannu nya, wo va lanje do we fe an lɛ yé é léé: ’I da, yé bosizan lé é ke ’Blané na nya, maa a nagɔɔn i lɛ.

¹⁰ Yé an si an pɔlɛ gi yé an nɔla miléli nya, yé é go an nya gɔ blɛn torole nwiin. Yé fla sauun lé ke Jérusalɛm lé, é si la gi Kazambale va yé é zun, a nya, é a nagɔɔn an lɛ.

¹¹ Kazambale lé fuasan a a ta, yé a san a bélé gɔlɛwezan baba san zo, bélé jasipegɔlɛ lé woo yɛrɛ yé a zi bélé vlinvlin wezan zo, a zo.

¹² Alé gɔrɔ poo ’léé a blɛn yé é a é torole. A ’léé a vu ta fié yé lanjenu a é dɔle a ’léé do do, yé Izraɛl benu bɛngɔnɔ vu ta fié tɔ a é gyɛle alé duoli vu ta fié ta do do.

¹³ A ’léé yaa a yirinwanazia yé a yaa a yirinwana bɛyilazia, yé a yaa a yirinwana bɛbolazia, yé a yaa a yirivɔnazia.

¹⁴ Fla gɔrɔ gane vɔna a vu ta fié yé wo ta lé ’Blané lé nwunvɔmunu vu ta fié tɔnu ke é gyɛle do do.

¹⁵ Mi lé é we fe an lɛ, gyan do lé é ke kyan nya, é a a lee, fla koo, a ’léénu koo, alé gɔrɔ koo, wo danle we gi.

¹⁶ Fla sangi ziɛn faa a é bɔle ékema. É fla dan gyan nya yé é kɛlɛ kilo baa do wuru do yɔ do. A sangi koo, a ’wuola koo, a nwale loru koo, wo bɔ ékema.

¹⁷ É gɔrɔ dan yé é kɛlɛ mɛtrɛ nya yɔ yaa wɔlɛ vu ta fié, blami lé fɛdanmafɛ lé é ke lanje lee, a yɛrama.

¹⁸ Wa gɔrɔ kɛlɛ jasipegɔlɛ nya, yé wo fla pa kyan tegele nya, bélé vlinvlin tegele zo.

¹⁹ Fla gɔrɔ ganevɔna a é ’lɛrɛle gɔlɛwezannu gɔnɔ faa nya; a ganevɔna vininzan a jasipegɔlɛ nya, a fiézan a safiigɔlɛ nya, a yaazan a kaasédɔanegɔlɛ nya, a ziɛnzan a émérodegɔlɛ nya,

²⁰ a soruzan a saadɔnisgɔlɛ nya, a suiɛdozan a saadɔanegɔlɛ nya, a sɔrafiézan a krisolitegɔlɛ nya, a sɔraazan a bérilgɔlɛ nya, a sɔraziɛnzan a topazegɔlɛ nya, a vuzan a krizopraze?-?gɔlɛ nya, a vu ta dozan a yasɛntgɔlɛ nya, a vu ta fiézan a amétisegɔlɛ nya.

²¹ Duoli vu ta fié a pɛrɛl vu ta fié nya. Duoli do a pɛrɛl do nya. Wo fla worona vuun la kɛlɛ kyan tegele nya bélé vlinvlin lé woo yɛrɛ yé a zi, a zo.

²² Maa ’ka Balekɔn ye lɛ fla lo, naa, Mizambale, Plɛplɛfaazan valé ’Blané ɛ ke Balekɔn nya.

²³ Fla mawe ’ka yiri valé moné gi é ta kinile we gi lo, naa, Kazambale lé fuasan ɛ a ta kinié, yé ’Blané ɛ ke alé sona nya.

²⁴ Bɛnnu é dan tawo lɛ a san va yé tɛrɛ la minwiinzannu é dan da lɛ ’wolé fua nya a gi.

²⁵ Gunu ’ka dan dɔra lɛ ’bɛna lo, amalé wo ’ka dan a gɔrɔ lɛ tan lɛ é yiéyi lo.

²⁶ Munu é dan da lɛ bɛnnu lé fua valé wo tɔbɔle nya ana.

²⁷ Fɛ tirizan do ’ka dan wɔra lɛ ’bɛna lo; munu lé ’wobo nɔ wenaané naané kɛlɛle valé vié lɛ, wo va mi do kpen ’ka dan wɔra lɛ ’bɛna lo; munu lé wo wo tɔ gyɛ ’Blané lé mibélilenu tɔgyɛlasɛbɛ gi, wo saa ɛ dan wɔra lɛ ’bɛna.