Wegɔɔnle 20 - Kazambale lé Sebe Sauunu 1979

Lɛɛ wuru soru

¹ A zuo maa lanje do ye sina la gi, yé é zun, ’té guru lé a wɔlɛ ma nyaana ’ka lo, alé lakléwɔlɛ valé gɔgɔbale blɛn a a lee.

² É dragɔn kun, méné kwa lé é ke yonufaatagɔné valé Satan nya, é a kun, yé é a yere lɛɛ wuru soru zé nya.

³ É a vuli guru lé a wɔlɛ ma nyaana ’ka lo, a gi, yé é a lɛ tan a ta yé é a ’léé béé, té ’é bɛnnu saan é dɛrɛ lo we gi, fɔɔ yé lɛɛ wuru soru lɛ é sɔɔ. ’Bɛ zuo é a lé wo daan a ma sɛ.

⁴ Yé maa webleblinnu ye, yé Bale weblele se kɛlɛ wotazannu lɛ. Yé munu lé wo wo ’wuo kini Jézu lé we fele valé Kazambale dére lé we ma koo, munu lé wo ’ka dia lɛ ’wo bli la wi valé é yili ’lɛ lo, ’té wo ’ka wi lé tɔmase gyɛ lɛ, dé wo yarapɛla léé, dé wo bɛ la léé, ana lo, maa wo boennu ye. Wo nwa é yuɛma é ziin yé wo pla munu nwiin Krist va lɛɛ wuru soru.

⁵ Migale pɔnénu ’ka nwa lɛ é yuɛma lo fɔɔ yé lɛɛ wuru soru lɛ sɔɔ a zo. Migale nwale vininzan lé.

⁶ Munu lé wozé ke migale nwale vininzan va, wa mi sauunnu nya yé wozé a néné. Wo gulii ’ka dan ga lɛ lo, naa, wa Kazambale valé Krist banzannu nya yé wo dan pla lɛ munu nwiin a va lɛɛ wuru soru.

⁷ Dé lɛɛ wuru soru lɛ sɔɔ, wo dan Satan bɔra lɛ bokɔn gi.

⁸ É dan bɔra lɛ yé ’é go tɛrɛ faa la bɛnnu saanle we ma; Gɔg valé Magɔg tɛrɛlamunu lé, yé é wo zén ékeva gulidanle we gi; wo ’léé a bélé wɛyi gɔɔn ma nyéné zo.

⁹ Yé wo gié tɛrɛ faa ta, yé Kazambale lé munu nyanana valé fla lé é sɔ Bale lɛ, wa zi lɛ sɔɔ, naa, kyɛ si la gi yé é wo ble.

¹⁰ Yé yonufaatagɔné lé é wo saan, wa vuli kyɛ lé ke blɛn bélé gyankyɛ zo, ’té wo povun zén a va, a va, fɛana lé wi valé viébalelayezan ke, ana; yé wo dan nyané pa lɛ wo ta bladi nyanadi lɛɛfafama, a glɛ ’ka lo.

Wo we ble webleblin fu blɛn na

¹¹ A zuo maa webleblin fu blɛn valé étazan ye. Tɛrɛ valé la fwi a lee baa, yé wo dɔna ’ka é dɛrɛ lo.

¹² Yé maa migalenu ye, mi blɛnnu valé mi planu, ’té wa é dɔle webleblin ’lɛ. Wo sɛbɛnu fuo. Yé wo sɛbɛ do fuo é ziin, ’bɛ ɛ ke mibélilenu tɔgyɛlasɛbɛ nya. Yé wo migalenu lé we ble ’wo kɛlɛwe yɛrama, wenuan wo ke é gyɛle sɛbɛ ’konu gi, a yɛrama.

¹³ Wɛyi ézé migalenu bɔra a gi, yé ga valé gamunu nyanana wozé mi galenu bɔra a gi, yé wo wolé we ble do do wo kɛlɛwenu yɛrama.

¹⁴ Yé wo ga valé gamunu nyanana vuli kyɛ lé ke blɛn bélé gyankyɛ zo, a va. Yee kyɛ blɛn lé ke gale fiézan nya, ’té mi gulii ga é wo sin bɛ.

¹⁵ Munuan wo tɔ ’ka é gyɛle mibélilenu tɔgyɛlasɛbɛ gi lo, wo wo vuli yee kyɛ blɛn ’ko ɛ va.