Wegɔɔnle 2 - Kazambale lé Sebe Sauunu 1979

We lé é a fe Éfɛz léglizi lɛ

¹ ’I sɛbɛ pa Éfɛz léglizi lé lanje lɛ zia. ’Bé fe a lɛ léé: Mi lé monéné sɔrafié ke a bɛyi lee, ’té éé tawoo kyan fintran sɔrafié méléna, a dére lé é ke ’ko:

² I kɛlɛwenu koo, ilé nyanama koo, i yara pale we la koo, maa wo dɔɔ. Maa a gi dɔɔ léé, i ’ka bɔa dɔle lɛ mi nyanénu lé we nyi wuo lo; munu lé, wo léé, ’wa nwunvɔmunu nya ’té wo ’ka a nya bɛ lo, i wo gi dan yé i wo ye viémunu nya.

³ I yara a é pale we la yé i nyané ble an tɔ ma yé i wɔlɛ gi ’ka nyaa lɛ i ma lo. Maa ’bɛ faa gi dɔɔ.

⁴ Naa, i ma we do a an gi; sɔlɛle lé ke i gi é vinin, é ’ka i gi lao ’bɛ zo lo.

⁵ Bɛwemalé, fɛana lé we ’ko san i lee, ’i gi bɔrɔ ’bɛ ma; ’i bli nɔla yé ’i kɛlɛwe vininnu kɛlɛ ma. Dé i ’ka i bli nɔla lɛ lo, maa dan da lɛ i va, yé maa dan ilé fintran si lɛ é dɔrana.

⁶ Naa, we do a ilé wezin nya duowo; yee lé é ke léé, Nikolat palu gizannu kɛlɛwenu lé a za ke an gi, a za a i gi é ziin.

⁷ Mian we ’ma tɔné ke a ’wuo ma, we lé Kazambale Léli ke a fena léglizinu lɛ, ’é a ’ma ma: Mian a ’wuo é vo a lɛ, mibéliyili lé é ke Kazambale lé fɛna paradi, maa dan a poro nɔ lɛ a lɛ blefɛ nya.

We lé é a fe Simii léglizi lɛ

⁸ ’I sɛbɛ pa Simii léglizi lé lanje lɛ zia. ’Bé fe a lɛ léé: Mi lé é ke mi vininzan nya, ’té é ke a voélazan nya, ’té é ga yé é béli é ziin, a dére lé é ke ’ko:

⁹ Maa ilé kleblele valé nyané lé i gyɛle dɔɔ, naa, i a fua nya duowo. Munu lé wo ’wobo laan Juifinu, ’té wo ’ka a nya lo, ’té wo ke Satan lé zén‐ékevamunu nya bɛ, maa gi dɔɔ léé, wa i tɔ sɛrɛna.

¹⁰ Nyané lé i dan a ble lɛ, té i kana a blele ma lo. Bé ye, yonufaatagɔné é dan ka va mi kenu vɔ lɛ bokɔn gi ka gi danle we ma, yé ka dan nyané ble lɛ yi vu. ’I yara pa a ta fɔɔ yé i gayi é bɔ, yé maa dan vole é yuɛma nɔ lɛ i lɛ ilé tɔkoro nya.

¹¹ Mian we ’ma tɔné ke a ’wuo ma, we lé Kazambale Léli ke a fena léglizinu lɛ, ’é a ’ma ma: Mian we ’ko ’wuo vo a lɛ, a gulii ’ka dan ga lɛ lo.

We lé é a fe Pɛɛgam léglizi lɛ

¹² ’I sɛbɛ pa Pɛɛgam léglizi lé lanje lɛ zia. ’Bé fe a lɛ léé: Mi lé gwɔun ’léé fié sorosoro ke a lee, a dére lé é ke ’ko:

¹³ Maa i nyanana dɔɔ, yé maa a gi dɔɔ léé, ana lé Satan lé blin ke. An tɔ a i ’léé, yé yian nya lé wo anlé yarapawela wenayezan Antipas gyɛ ka va, fɛana lé Satan nyanana ke, ana, ’bɛ yinu nyaoo, i bli ’ka si lɛ anlé we lɛ duowo lo.

¹⁴ Naa, i ma we kenu a an gi, yee lé ke léé, i va mi kenu a Balaam lé wepaale va. Balaam we paa Balak gi léé, ’é saanwe gɔɔn Izraɛlnu lɛ léé, ’wo miyili banwinu ble, yé ’wo ’wobo nɔ pɛnpɛnnégyɛle lɛ.

¹⁵ Yé bii é ziin, i va mi kenu a Nikolat palu gizannu lé wepaale va.

¹⁶ Amalé ’i bli nɔla; dé ’bɛ kaan lo, maa dan i va laoɛ, yé maa dan guli dan lɛ wo va an ’léé gwɔun nya.

¹⁷ Mian we ’ma tɔné ke a ’wuo ma, we lé Kazambale Léli ke a fena léglizinu lɛ, ’é a ’ma ma: Mian we ’ko ’wuo é vo a lɛ, maa dan mana yɔɔle nɔ lɛ a lɛ, yé maa dan gɔlɛ fu nɔ lɛ a lɛ; ’té tɔ dɛrɛ a é gyɛle gɔlɛ ’ko ta, mi do ’ka a dɔɔa lo, ’té dé é ’ka mian wa nɔ a lɛ, a nya lo.

We lé é a fe Tiatii léglizi lɛ

¹⁸ ’I sɛbɛ pa Tiatii léglizi lé lanje lɛ zia. ’Bé fe a lɛ léé: Kazambale Be lé a yuɛ ke bélé kyɛnɛnɛ zo, ’té a ganenu ke bélé zéné lé kyɛ a tana, a zo, a dére lé é ke ’ko:

¹⁹ I kɛlɛwenu koo, ilé sɔlɛle koo, ilé blipale koo, ilé nyanama lé bé pa i yuɛ gi do nya koo, i yara pale we la koo, ilé nyanama voélanu lé é ke di é mini a vininnu ta koo, maa wo dɔɔ.

²⁰ Naa, i ma we do a an gi; yee lé ke léé, lezan Jézabɛl lé é a fe léé, ’é a balelaye le nya, i zi nɔ a lɛ léé, é we paa an wuozannu gi, ’té éé wo saan léé, ’wo ’wobo nɔ pɛnpɛnnégyɛle lɛ, ’té woo miyili banwi blé.

²¹ An bléyi ke nɔ a lɛ, a bli nɔlale we ma, yé é ’ka a va léé, é daan élé pɛnpɛnnégyɛle ma lo.

²² Bé ye, maa dan gyɛ blɛn vɔ lɛ a ma, yé munu lé wo ke a ginina le nya, maa dan nyané blɛn pa lɛ wo ta, ’té dé wo ’ka daan lɛ wo kɛlɛwenu ma lo.

²³ Maa dan alé nénu gyɛ lɛ; yé léglizinu faa é dan a gi dɔɔ lɛ léé, maa ɛ munu bli valé wo gibɔrɔle naginian, yé maa dan ka faa do do banwo lɛ ka kɛlɛwenu yɛrama.

²⁴ Yé ’kaa Tiatii munu pɔnénu lé ka ’ka wepaale ’ko nyi si lɛ lo, ’té we lé wa laan Satan lé we wɔlɛ ma bɛ, ’té ka ’ka ’bɛ gi dɔɔa lo, maa lé ka lɛ léma: Maa ’ka kɔné bɛ dɔna ka nwiin lo;

²⁵ naa, yee lé é ke ka lee, ’ka kun a ma kli fɔɔ yé an da.

²⁶ Mian we ’ko ’wuo vo a lɛ, ’té éé yara paan anlé we kɛlɛle ta fɔɔ yé é bɔ a ’wuoplana, maa dan a pla lɛ bɛnnu nwiin.

²⁷ É dan pla lɛ wo nwiin foliɛwɔlɛ nya é lee, yé é dan wo ’wii lɛ bélé fɛan zo lé woo bɔ ’wiié, a zo, fɛan zo lé an Ti a se kɛlɛ an lɛ, a zo.

²⁸ Yé maa dan bladi monéné nɔ lɛ a lɛ.

²⁹ Mian we ’ma tɔné ke a ’wuo ma, we lé Kazambale Léli ke a fena léglizinu lɛ, ’é a ’ma ma.